ދިއްލީން ޗެންނާއިއަށް ދަތުރުކުރި އިންޑިގޯ އެއާލައިންގެ ފްލައިޓެއްގައި ފަސިންޖަރެއްގެ ޕަވާ ބޭންކެއްގައި ވައިގެ ތެރޭގައި ރޯވުމާ ގުޅިގެން، ހައިދްރާބާދުގެ ރާޖީވް ގާންދީ އިންޓަނޭޝަނަލް އެއާޕޯޓަށް ކުއްލި ހާލަތުގައި ޖައްސައިފި އެވެ.
މި ހާދިސާ ހިނގާފައިވަނީ، މިއަދު ދިއްލީން ޗެންނާއިއަށް ދަތުރުކުރި އިންޑިގޯ ފްލައިޓެއްގައެވެ. ފްލައިޓުގެ ތެރޭގައި ފަސިންޖަރެއްގެ އަމިއްލަ އިލެކްޓްރޯނިކް ޑިވައިސަކުން ދުން އެރުމާ އެކު، ކެބިން ކުރޫ ވަނީ އެ އަލިފާން ނިއްވާލާފަ އެވެ.
ރައްކާތެރިކަމުގެ ގޮތުން ޕައިލެޓުން ނިންމީ ފްލައިޓު ޗެންނައިއަށް ގެންދިޔުމުގެ ބަދަލުގައި ހައިދަރާބާދަށް ޑައިވާޓު ކުރުމަށެވެ. ފްލައިޓު ރާޖީވް ގާންދީ އެއާޕޯޓުގައި ރައްކާތެރިކަމާ އެކު ޖައްސާފައިވާ ކަމަށާއި، ބޯޓުގައި ތިބި ހުރިހާ ފަސިންޖަރުންނާއި ކުރޫ ސަލާމަތުން ތިބި ކަމަށް އިންޑިގޯ އިން ބުނެފައިވެ އެވެ.
ޗެންނައިއަށް ދަތުރު ކުރިއަށް ގެންދިޔުމަށް ޓަކައި އެހެން ބޯޓެއް ހަމަޖައްސާފައިވާ ކަމަށް ވެސް އެ އެއާލައިނުން ބުނެފައިވެ އެވެ.
މި ހާދިސާ ހިނގި ސަބަބު ބެލުމަށް ކަމާ ބެހޭ ފަރާތްތަކުން ވަނީ ތަހުގީގެއް ފަށައިފައެވެ.
Advertisement
This content is created and paid for by advertisers and does not involve Voice Journalists
