ބަންގްލަދޭޝްގައި ހަލުވިކަމާއެކު ހިމަބިހި ފެތުރެމުންދާއިރު، ބަންގްލަދޭޝްގެ އިންތިގާލީ ސަރުކާރުން ޔުނިސެފްގެ އިންޒާރަށް ނުބަލައި ވެކްސިން ގަތުމުގެ ނިޒާމަށް ބަދަލު ގެނައިކަމަށް ރިޕޯޓްތައް ބުނެފިއެވެ.

ބަންގްލަދޭޝްގެ ދަ ޑެއިލީ ސްޓަރ ނޫހުގައި ސައިންސް ޖާނަލްގެ ރިޕޯޓަކާ ހަވާލާދީ ބުނެފައިވާގޮތުގައި، މިއަހަރުގެ މާޗް މަހުގެ މެދުތެރެއިން ފެށިގެން މިހާތަނަށް 32,000 އަށްވުރެ ގިނަ މީހުންނަށް މި ބަލިޖެހިފައިވާ ކަމަށް ޝައްކުކުރެވޭއިރު، ބަލީގައި 250 އަށްވުރެ ގިނަ ކުޑަކުދިން ވަނީ މަރުވެފައެވެ. ކުރިން ޔުނިސެފް މެދުވެރިކޮށް ކުރިއަށްގެންދިޔަ ވެކްސިން ހޯދުމުގެ މަރުހަލާ، 2025 ވަނަ އަހަރުގެ ސެޕްޓެމްބަރު މަހު އިންތިޤާލީ ސަރުކާރުން އޯޕަން ޓެންޑަރ ނިޒާމަކަށް ބަދަލުކުރުމާ ގުޅިގެން ޔުނިސެފުން ވަނީ އެކަމުގެ ސަބަބުން އާންމުކޮށް ދެވޭ ވެކްސިންގެ ޚިދުމަތަށް ބުރޫއަރައި ބަލިމަޑުކަމެއް ފެތުރިދާނެކަމުގެ އިންޒާރު ދީފައެވެ.

މި ބަދަލާއެކު ޓެންޑަރ މަރުހަލާ ލިޔެކިޔުމުގެ މަރުޙަލާތަކުގެ ތެރޭގައި ލަސްވެ، ޤައުމުން ވެކްސިން ހުސްވެގެން ދިޔައެވެ. މީގެ ސަބަބުން ކުޑަކުދިންނަށް ޤަވާއިދުން ދޭންޖެހޭ މީސަލްސް-ރުބެއްލާ (އެމްއާރު) ވެކްސިން ދިނުން ހުއްޓުމަކަށް އައިސް، 2025 ވަނަ އަހަރު ވެކްސިން ދެވިފައިވަނީ ޝަރުތުހަމަވާ ކުދިންގެ ތެރެއިން އެންމެ 59 އިންސައްތަ ކުދިންނަށެވެ. ޖެނުއަރީ މަހު މިޔަންމާ އިން އެތެރެވި ރޮހިންޖާ މީހުން ދިރިއުޅޭ ރެފިއުޖީ ކޭމްޕުތަކުން ފެށުނު މި ބަލިމަޑުކަން މިހާރު ވަނީ ބަންގްލަދޭޝްގެ 64 ޑިސްޓްރިކްޓުގެ ތެރެއިން 58 ޑިސްޓްރިކްޓަކަށް ފެތުރި، 21,000 އަށްވުރެ ގިނަ މީހުން ހޮސްޕިޓަލްތަކުގައި އެޑްމިޓްކުރަން ޖެހިފައެވެ. ކުޑަކުދިންނަށް ފައިދާހުރި ކާނާ ނުލިބުމާއި، ވިޓަމިން އޭ ދިނުމުގެ ކެމްޕޭންތައް ހުއްޓިފައިވުމުގެ ސަބަބުން ކުދިންގެ ދިފާއީ ނިޒާމު މަޑުޖެހި، މި ބަލި ފެތުރުން ވަނީ އިތުރަށް ހަލުވިވެފައެވެ.

އިންތިޤާލީ ސަރުކާރުގެ ޞިއްޙީ މުޝީރު ޕްރޮފެސަރު ސައްޔިދުއްރަޙްމާން ސަރުކާރުގެ ނިންމެވުން ދިފާއު ކުރައްވަމުން ވިދާޅުވީ، ކުރީގެ ނިޒާމަކީ ކުއްލި ޙާލަތްތަކަށް ޚާއްޞަކޮށްފައިވާ އުޞޫލަކަށްވާތީ، ދެފުށް ފެންނަ އަދި ޤަވާއިދުގެ ތެރެއިން ހިންގާ ނިޒާމަކަށް ބަދަލުކުރަން ޖެހުނީ ކަމަށެވެ. ނަމަވެސް، މި ބަލީގައި ކުޑަކުދިން މަރުވުމަކީ އިންތިހާއަށް ދެރަވާ ކަމެއްކަމަށް އޭނާ ވިދާޅުވިއެވެ. މި ޙާލަތު ގޯސްވުމާ ގުޅިގެން، އެޕްރީލް މަހު ސަރުކާރުން ވަނީ އަލުން ޔުނިސެފް މެދުވެރިކޮށް ވެކްސިން ހޯދަން ފަށައި، ދުނިޔޭގެ ޞިއްޙަތު ޖަމްޢިއްޔާ ޑަބްލިޔު.އެޗް.އޯ އާއި ވެކްސިން ފޯރުކޮށްދޭ އިއްތިޙާދު ގާވީއާ ގުޅިގެން ކުއްލި ވެކްސިނޭޝަން ކެމްޕޭނެއް ފަށާފައެވެ. އެހެންނަމަވެސް، ބަލި ފެތުރެމުންދާ ހަލުވިމިނަށް ބަލާއިރު، އިމަޖެންސީ ކެމްޕޭންތަކުން އެކަނި ބަލިމަޑުކަން ވަގުތުން ކޮންޓްރޯލްކުރުން ދަތިވާނެ ކަމަށް ކަމާބެހޭ މާހިރުން ވަނީ އިންޒާރު ދެއްވާފައެވެ.