އިދިކޮޅު ކޯލިޝަނުން ރޭ މާލޭގައި ކުރިއަށް ގެންދިޔަ މުޒާހަރާއެއްގެ ތެރެއިން، އުމުރުން ދުވަސްވީ މީހެއް ހައްޔަރު ކުރި ގޮތުން، ކުރީގެ ފޮރިން މިނިސްޓަރު އަދި އދ. ގެ ސްޕެޝަލް ރެޕަޓުއާއެއްގެ މަގާމުގައި މިހާރު ހުންނެވި ޑރ. އަހުމަދު ޝަހީދުގެ ނުރުހުން ފުލުހުންނަށް އަމާޒު ވެއްޖެއެވެ.

އާއްމުވެފައިވާ ވީޑިއޯއިން ފެންނަ ގޮތުގައި، މުޒާހަރާ ކުރާ ސަރަހައްދުން ބަޔަކު ދުއްވައިގަންނައިރު، އެތަނުގައި އުމުރުން ދުވަސްވީ އަންހެނެއް ވެސް ހުރެއެވެ. އެމީހުންގެ ފަހަތުން ފުލުހުން ދުއްވައިގަނެ، އެންމެ ފުރަތަމަ އަތުޖެހެނީ އެ އަންހެން މީހާއެވެ. އަދި ފުލުހުންގެ ބެލުމުގެ ދަށަށް ގެންދަން އުޅުމުން އެ އަންހެން މީހާ ގަދަދެއްކުމުން، ހަރުކަށިކޮށް އޭނާ ގެންދާތަން ވީޑިއޯއިން ފެނެއެވެ.

އެކަމާ ގުޅިގެން ޑރ. ޝަހީދު ކުރެއްވި ޓުވީޓެއްގައި ވިދާޅުވީ، މުޒާހަރާ ކުރުން ފަދަ، އޭނާއަށް ހައްގު ލިބިފައިވާ ކަމެއް ކުރުމުން ހައްޔަރުކުރުން ބަލައިނުގަނެވޭ ކަމަށެވެ. އަދި އެފަދަ އުމުރުން ދުވަސްވީ މީހެއް ހައްޔަރު ކުރުމުގައި، އާއްމު އެހެން މީހުން ހައްޔަރު ކުރުމުގައި ގެންގުޅޭ ހަރުކަށިކަން ގެންގުޅިފައިވާތީ ޑރ. ޝަހީދު ވަނީ ނުރުހުން ފާޅު ކުރައްވާފައެވެ.

Advertisement

އެކަމާ ގުޅިގެން ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވީ، ފުލުހުންގެ ބެލުމުގެ ދަށަށް އަންހެން މީހާ ގެންދިޔަ ގޮތް ބަލަމުންދާ ކަމަށެވެ.