އެމެރިކާގެ ޔުނިވާސިޓީ އެއްގައި ކިޔަވައިދޭ ލެކްޗަރަރ އެއް އޭނާގެ ދަރިވަރުންނަށް އަހަރެމެންގެ މާތް ނަބިއްޔާ މުހައްމަދު ޞޢވގެ ސޫރަ ސިފަކޮށްދީ ކުރަހާފައިވާ ކުރެހުންތަކެއް ދެއްކި މައްސަލައެއް ފެންމަތިވެއްޖެއެވެ.
އެމެރިކާގެ ހެމްލައިން ޔުނިވާސިޓީގައި ކިޔަވައިދޭ އެ ޓީޗަރު، ގްލޯބަލް އާރޓް ހިސްޓްރީ މާއްދާ އޮންލައިންކޮށް ކިޔަވައި ދެމުން ރަސޫލާ ޞޢވގެ ސޫރަ ސިފަކޮށް ފެންކުލައިން ކުރަހާފައިވާ އެ ކުރެހުންތައް ދަރިވަރުންނަށް ދައްކާފައިވަނީ މިދިޔަ އަހަރުގެ އޮކްޓޯބަރު މަހުގެ ތެރޭގައި ނަމަވެސް އެކަން މީޑިއާ އަށް ތިލަވެގެން ގޮސްފައިވަނީ މި ހަފްތާ ތެރޭގައެވެ.
އެމެރިކާގެ އެ ލެކްޗަރަރ ރަސޫލާ ޞޢވ ސިފަކޮށް ކުރަހާފައިވާ ދެ ތަސްވީރެއް ދަރިވަރުންނަށް ދައްކާފައިވާ ކަމަށް ބޭރުގެ މީޑިއާ ތަކުން ރިޕޯޓް ކޮށްފައިވެއެވެ. އަދި އެ ފޮޓޯތައް ދެއްކުމުގެ ކުރިން އެއީ ވަރަށް ނާޒުކު ފޮޓޯ ތަކެއް ކަމަށާ، އެ ބަލަން ބޭނުން ނުވާ ކުދިން އޮންލައިން ކުލާހުން ނުކުތުމަށް ވެސް އަނގަބަހުންނާއި ލިޔުމުން އޭނާ ދަރިވަރުންނަށް އަންގާފައިވާ ކަމަށް ހެމްލައިން ޔުނިވާސިޓީގެ ދަރިވަރުންގެ ނޫހުން ބުނެފައިވާ ކަމަށް ބޭރުގެ ނޫސްތަކުގައި ބުނެފައިވެއެވެ.
އަދި މީގެ އިތުރުން، ރަސޫލުންގެ ސޫރަ ކުރަހާފައިވާ ފޮޓޯތައް ކުރެހުމަކީ ހުއްދަ ކަމެއް ނޫން ކަމަށް މުސްލިމުން ގަބޫލު ކުރާ ކަމަށާ، އެހެން ނަމަވެސް އެ ފޮޓޯތައް ދައްކަނީ ދައްކަން ޖެހޭތީ ކަމަށް އޭނާ ބުނެފައިވާ ކަމަށް ހެމްލައިން ޔުނިވާސިޓީގެ ދަރިވަރުންގެ ނޫހާއި ހަވާލާދީ ބުނެފައިވެއެވެ.
އެމެރިކާގެ ލެކްޗަރަރ ގެ މި މައްސަލަ ފެންމަތިވެ، މުސްލިމް ދަރިވަރުންނާއި ގިނަ އަދަދެއްގެ މުސްލިމުން ވެސް ނުރުހުން ފާޅުކުރުމާއި ގުޅިގެން ހެމްލައިން ޔުނިވާސިޓީން ވަނީ އެ ޓީޗަރު ވަޒީފާއިން ވަކިކޮށްފައެވެ.
އަދި އެ ލެކްޗަރަރ ވަޒީފާއިން ވަކިކުރިކަން އަންގަމުން މިދިޔަ މަހުގެ ފަހު ކޮޅުގައި އެ ޔުނިވަސިޓީން ބުނީ، އޭނާގެ އެ އަމަލަކީ ވަރަށް ބޭއަދަބީ، މުސްލިމުންނާއިމެދު ނަފްރަތު އުފައްދާ ޢަމަލެއް ކަމަށެވެ. އަދި އެކަމަށްޓަކައި އެ ޔުނިވަސިޓީން ވަނީ މައާފަށްވެސް އެދިފައެވެ.
ރަސޫލާ ޞޢވ އާއި، އެނޫންވެސް އެއްވެސް ރަސޫލު ބޭކަލެއްގެ ސިފަ ކޮށް ކުރެހުންތައް ކުރެހުމަކީ ހުއްދަ ކަމެއް ނޫން ކަމަށް ޖުމްހޫރު ޢިލްމުވެރިން ވަނީ އިއްތިފާގުވެވަޑައިގެންފައެވެ.
Advertisement
This content is created and paid for by advertisers and does not involve Voice Journalists
