ފަލަސްތީނުގެ ދިދަ އަކީ ނިރުބަވެރިކަމަށް ހިތްވަރުދޭ ނިޝާނެއްގެ ގޮތުގައި ކަނޑައަޅައި އާންމު ތަންތަނުގައި ހުންނަ ފަލަސްތީނުގެ ދިދަތައް ނެގުމަށް ފަލަސްތީނުގެ ބިމަށް ވެރިވެގަނެގެން އުފެއްދި އިޒްރޭލުގެ ޔަހޫދީ ދައުލަތުން އެމީހުންގެ ސިފައިންނަށް އަމުރުކޮށްފި އެވެ.
އިޒްރޭލުގެ ސެކިއުރިޓީ މިނިސްޓަރު އިޓަމާ ބިން ގަވީރު ވަނީ އާންމު ތަންތަނުގައި ހަރުކޮށްފައި ހުންނަ ފަލަސްތީނުގެ ދިދަތައް ނެގުމަށް އިޒްރޭލު ސިފައިންނަށް އަންގާފަ އެވެ. އަދި ފަލަސްތީނުގެ ދިދަތައް ނެގުމުގެ ފުރިހަމަ ބާރު ޔަހޫދީ ސިފައިންނަށް ދީފައިވާނެކަމަށް އޭނާ ވަނީ ބުނެފައެވެ.
އިޒްރޭލު ސިފައިންނަށް މިފަދައިން އަންގާ ހުއްދަ ދޫކޮށްފައިވަނީ ނިމިދިޔަ އާދިއްތަ ދުވަހުގައިކަމަށް އަލްޖަޒީރާއިން ވަނީ ރިޕޯޓުކޮށްފަ އެވެ.
ޕަލަސްތީނުގެ ދިދައަކީ ނިރުބަވެރިކަމަށް ހިތްވަރުދޭ ނިޝާނެއްކަމަށް ޔަހޫދީ ދައުލަތުން ކަނޑައަޅާފައިވަނީ، އިޒްރޭލު ސިފައިންނަށް ހަމަލާދިންކަމުގެ ތުހުމަތުގައި ހައްޔަރުކުރި ފަލަސްތީނުގެ ރައްޔިތެއް 40 އަހަރުގެ ޖަލު ހުކުމަކަށްފަހު މިނިވަންވުމުން، އޭނާ އަށް މަރުހަބާ ކިޔުމަށް ފަލަސްތީނުގެ ދިދަ ވިހުރުވާލުމާއި ގުޅިގެންނެވެ.
އެ ކަމާއި ގުޅޭގޮތުން އިޒްރޭލުގެ ސެކިއުރިޓީ މިނިސްޓަރު އިޓަމާ ބުނީ އެއީ ޓެރަރިސްޓަކަށް މަރުހަބާ ކިޔުންކަމަށެވެ. އަދި އެފަދައިން ދިދަ ވިހުރުވާލުމަކީ އެފަދަ އަމަލުތަކަށް ހިތްވަރު ދިނުންކަމަށް އޭނާ ވަނީ ބުނެފައެވެ.
ފަލަސްތީނުގެ ދިދަ އަތުލުމާއި، އާންމު ތަންތަނުގައި ހުންނަ ދިދަތައް ނެގުމުގެ ފުރިހަމަ ބާރު ޔަހޫދީ ސިފައިންނަށް ދީފައިވާއިރު، އިޒްރޭލުގެ އަނިޔާވެރިކަމާއި ދެކޮޅަށް އަޑުއުފުލާ ފަލަސްތީނު ރައްޔިތުން ބުނަމުންދަނީ، އެ ގޮތަށް އެކަން ކުރަން ނިންމީ ފަލަސްތީނުގެ ރައްޔިތުންގެ އަޑު ކަނޑުވާލުމަށްކަމަށެވެ. އަދި ޔަހޫދީންގެ ބާރު ގަދަކުރުމަށެވެ.
ފަލަސްތީނުގެ ދިދަތައް އަތުލިކަމުގައި ވީނަމަވެސް، ޔަހޫދީންނާއި ދެކޮޅަށް ކުރާ މަސައްކަތް އެންމެ ތަންފުކެއްވެސް ފަހަތައް ނުޖައްސާނެކަމަށް ފަލަސްތީނުގެ ރައްޔިތުން ބުނަމުންދާކަމަށް އަލްޖަޒީރާ ނޫހުގައި ވަނީ ރިޕޯޓުކޮށްފައެވެ.
Advertisement
This content is created and paid for by advertisers and does not involve Voice Journalists
