ހުކުރު ދުވަހަކީ އާއްމުކޮށް ހުރިހާ ގޭގެއެއްގައިވެސް މެންދުރު ކެއުމުގައި ކޮންމެވެސް ގޮތަކަށް ކުކުޅު ބޭނުން ކުރާ ދުވަހެކެވެ. ކޮންމެ ހުކުރަކު އެއްގޮތަށް ކުކުޅު ހެދުމުގެ ބަދަލުގައި ތަފާތު ގޮތެއް ޓްރައި ކޮށްލުމަކީ ޔަގީނުން ރަނގަޅު ތަޖުރިބާ އަކަށް ވާނެއެވެ. އެގޮތުން މި ހުކުރު ވޮއިސް ގެ ބަދިގެއިން މި ގެނެސްދެނީ ކްރީމީ ގާލިކް ޗިކަން ތައްޔާރު ކުރާނެގޮތެވެ. ފަރާޓާ އާއި އެކީ ކާލަން މި ކުކުޅު ވަރަށް މީރު ވާނެއެވެ. 

2 ޗިކަން ބްރެސްޓް ( ތުނިކޮށްލަން މެދުން ފަޅައި ހަތަރު ފަޅިއަށް ހަދާފައި) 

4 މޭޒުމަތީ ސަމުސާ ފުށް

4 މޭޒުމަތީ ސަމުސާ ޕާމޭސަން ޗީޒް (ގާނާފައި)

1 ސައި ސަމުސާ ލޮނުމެދު ޕައުޑަރ

2 ސައި ސަމުސާ ނުވަތަ ރަހަލާވަރަަށް ލޮނު

1/2 ސައި ސަމުސާ މުގުރި އަސޭމިރުސް

5 މޭޒުމަތީ ސަމުސާ އޮލިވް އޮއިލް

2 މޭޒުމަތީ ސަމުސާ ބަޓަރ

1 ކުޑަ ފިޔަ ކުދިކޮށް ކޮށާފައި

12 ލޮނުމެދު

1 1/4 ޖޯޑު އެވަޕޮރޭޓެޑް މިލްކް

1/2 ޖޯޑު ގާނާފައި ހުރި ޕާމޭސަން ޗީޒް

1 1/4 ޖޯޑު ޗިކަން ބްރޮތް

1) ކުކުޅުގައި ލޮނު، ލޮނުމެދު ޕައުޑަރ އަދި އަސޭމިރުސް ރަނގަޅަށް އުނގުޅާލާށެވެ. 

2) ތަށްޓެއްގެ ތެރޭގައި ފުށާއި ޗީޒް އެކުލަވައި ލުމަށްފަހު، އޭގެ ތެރެއަށް ފަހަރަކު ކުކުޅު ފަޅިއެއްލައި ރަނގަޅަށް ބޭރުގައި ފުށާއި ޗީޒް އުނގުޅާލާށެވެ. 

3) ދެން ތަވާއަކަށް އޮލިވް އޮއިލް އަދި ބަޓަރ އެޅުމަށްފަހު އޭގެ ތެރޭގައި ކުކުޅު ކޮޅު ރަނގަޅަށް ރޯ ފިލައި ރަން މުށިކުލަ އަރަށްދެން ފްރައި ކޮށްލާށެވެ. 

4) އެއަށްފަހު ކުކުޅު ކޮޅު ނަގައި އެހެން ތަށްޓަކަށް ލުމަށްފަހު އުނދުނުގެ ގިނި ތަންކޮޅެއް މަޑު ކޮށްލާށެވެ. 

5) ދެން ސޯސް ހެދުމަށް، ކޮށްފައި ހުރި ފިޔާ ހަމަ އެ ތަވައިގެ ތެރެއަށް އަޅާލައި މޯޅިވަންދެން ފްރައި ކޮށްލާށެވެ. 

6) އެއަށްފަހު، 6 ލޮނުމެދު ޗިސް ކޮށްލުމަށްފަހު، އެވެސް ތަވައަށް އަޅާލާށެވެ. 

7) ދެން، އޮލިވް އޮއިލް ފޮދު ތަވައަށް އަޅާލުމަށްފަހު، ޗިސް ނުކޮށް ބާކީއޮތް 6 ލޮނުމެދު ވެސް ތަވާއަށް އަޅާލައި ހުރިހާ ތަކެތި ގާތް ގަނޑަކަށް 2 މިނެޓް ވަންދެން ނުވަތަ ލޮނުމެދުގެ ވަސް ރަނގަޅަށް ހިފާލަންދެން ފްރައި ކޮށްލާށެވެ.  

8) ދެން ޗިކަން ބްރޮތް އަޅާލުމަށްފަހު ގާތްގަނޑަކަށް 5 މިނެޓް ވަންދެން ކައްކާށެވެ. 

9) އެއަށްފަހު އެވަޕޮރޭޓެޑް މިލްކް އަޅާލުމަށްފަހު 2-3 މިނެޓް ވަންދެން ކެއްކުމަށްފަހު، ޗީޒް އަޅައިގެންވެސް 2 މިނެޓް ވަންދެން ކައްކާލާށެވެ. 

10) ދެން ބޭނުން ވަރަށް ލޮނާއި އަސޭމިރުސް ކޮޅެއްވެސް އަޅާލުމަށްފަހު، ކުކުޅު ކޮޅުވެސް އޭގެ ތެރޭގައި ރީތިކޮށް ބެހެއްޓުމަށްފަހު 3-2 މިނެޓް ވަންދެން މަޑު ގިނީގައި ކައްކާލާށެވެ. ކްރީމީ ގާލިކް ޗިކަން އެހުރީ ތައްޔާރު ވެފައެވެ.