ހުޅުމާލޭ ދެވަނަ ފިޔަވަހީގައި ހަދާފައިވާ ހިޔާ ފްލެޓު ސަރަހައްދުގައި ހުޅުމާލެ ހޮސްޕިޓަލުގެ ކުލިނިކެއް ހުޅުވަން ނިންމައިފިއެވެ. 

މި ކުލިނިކުގެ ޚިދުމަތް މާދަމާއިން ފެށިގެން ލިބެން ހުންނާނެ އެވެ. 

އެގޮތުން ކޮންމެ ދުވަހެއްގެ ހެނދުނު 10:00 އިން ހަވީރު 5:00 އަށް ހިޔާ ސަރަހައްދުގައި ހުޅުވާ ހުޅުމާލޭ ހޮސްޕިޓަލުގެ ކުލިނިކުން ބަލިމީހުން ބަލާނެއެވެ. ހުކުރު ދުވަސް ނޫން ކޮންމެ ދުވަހެއްގައިވެސް މި ޚިދުމަތް ލިބެން ހުންނާނެއެވެ. 

މި ކްލިނިކުގައި އާންމު ހުރިހާ ބަލިތަކަށް ފަރުވާ ދޭނެ އިރު ހާއްސަ ޑޮކްޓަރުންނަށް ދައްކަން ބޭނުންވާ ފަރާތަކަށް އެ ކްލިނިކް މެދުވެރިކޮށް އެޕޮއިންޓްމެންޓް ހެއްދޭނެ އެވެ. އަދި ކްލިނިކް ހުޅުވާއިރު އެތަނުން ލެބޯޓްރީ ޓެސްޓްތައް ވެސް ހެދޭނެ އެވެ.

މީގެ އިތުރުން އެސްޓީއޯގެ ފާމަސީއަކާއެކު ހިދުމަތްދޭ މި ކްލިނިކްގައި ޕަބްލިކް ހެލްތު ޔުނިޓަކާއި އެހެނިހެން ބައެއް ސިއްހީ ހިދުމަތްތައް ވެސް ފަށަން ވަނީ ނިންމާފަ އެވެ.   

ހިޔާ ސަރަހައްދުގައި ހުޅުމާލެ ހޮސްޕިޓަލުގެ ކުލިނިކެއް ހުޅުވުމުން، ހޮސްޕިޓަލަށް މިހާރު އޮންނަ ޕްރެޝަރު ބޮޑުތަކުން ނުޑަވެގެންދާނެކަމަށް ހުޅުމާލެ ހޮސްޕިޓަލުން ވަނީ ބުނެފައެވެ.

އަދި އެ ކުލިނިކުގެ ސަބަބުން، މިހާރަށްވުރެ ފުޅާކޮށް އަވަސް ޚިދުމަތް ހުޅުމާލޭގެ ރައްޔިތުންނަށް ދެވޭނެކަމަށްވެސް ހޮސްޕިޓަލުން ވަނީ ބުނެފައެވެ.