ރައީސް ވަހީދު މެޓްރޯޕޮލިޓަން ކޮލެޖުގެ 2022 ވަނަ އަހަރުގެ ދަސްވެނިވުން ޝަރަފުވެރިކޮށްދެއްވައިފި
ސްރީލަންކާގެ މެޓްރޯޕޮލިޓަން ކޮލެޖުގައި 2022 ވަނަ އަހަރުގެ ދަސްވެނިވުމުގެ ރަސްމިއްޔާތު ކުރީގެ ރައީސް ޑރ މުހައްމަދު ވަހީދު ހަސަން މަނިކު ޝަރަފުވެރިކޮށްދެއްވައިފި އެވެ.
އެ ރަސްމިއްޔާތު އޮތީ 2023 ޖަނަވަރީ 12 ގައި ކޮލޮމްބޯގެ "ނެލުމް ޕޮކޮނަ މަހިންދަ ރާޖަޕަކްސަ ތިއޭޓާރ"ގައެވެ. މި ރަސްމިއްޔާތުގައި ސްރީލަންކާގެ ބައެއް ކެބިނެޓު މިނިސްޓަރުންނާއި ޕާލިމަންޓު މެމްބަރުންނާއި ބޭރު ގައުމުތަކުގެ ސަފީރުން ބައިވެރިވެވަޑައިގެންފައި ވެއެވެ.
އެ ރަސްމިއްޔާތުގައި ޑރ ވަހީދު ވަނީ ވާހަކަފުޅުދައްކަވާފަ އެވެ.
ޑރ މުހައްމަދު ވަހީދުގެ ވާހަކަފުޅުގައި ސްރީލަންކާއާއި ދިވެހިރާއްޖެއާއި ދެމެދު އޮންނަ ޒަމާންވީ ގާތް ގުޅުމުގެ މައްޗަށް އަލިއަޅުވާލައްވާފަ އެވެ. އަދި މި ވަގުތު ސްރީލަންކާއަށް ދިމާވެފައިވާ އިގްތިސާދީ އަދި އިޖުތިމާއީ ދަތިތަކަށް އަވަސް ހައްލެއް ލިބޭނެކަމަށް އުންމީދުކުރައްވާކަމަށް ވިދާޅުވި އެވެ.
މި ރަސްމިއްޔާތުގައި ޑރ ވަހީދުގެ އަރިހުގައި އެމަނިކުފާނުގެ އަނބިކަނބަލުން އިލްހާމް ހުސެއިންވެސް ބައިވެރިވެވަޑައިގެންނެވި އެވެ.
ސްރީލަންކާއަށް ޑރ ވަހީދު ކުރައްވަމުން ގެންދަވާ ދަތުރުފުޅުގައި ސްރީލަންކާގެ ރައީސް ހިޒް އެކްލެންސީ ރަނިލް ވިކްރަމަސިންހައާއި ކުރީގެ ދެ ރައީސުންގެ އިތުރުން ޚާރިޖީ ވަޒީރާއި ވަނީ ބައްދަލުކުރައްވާފަ އެވެ.
އޭގެ އިތުރުން ބައެއް ކެބިނެޓު މިނިސްޓަރުންނާއި ޕާލިމެންޓު މެމްބަރުންނާއި އެހެނިހެން ސީނިއާ މެމްބަރުންނާއި ވަނީ ބައްދަލުކުރައްވާފަ އެވެ.
އެ ބައްދަލުވުމުގައި ދިވެހިރާއްޖެއާއި ސްރީލަންކާގެ ސިޔާސީ އަދި އިގްތިސާދީ ކަންކަމާމެދު ޚިޔާލުބަދަލު ކުރެއްވި އެވެ.
ޑރ މުހައްމަދު ވަނީ ރާއްޖޭގެ އެންމެ ފަހުގެ ސިޔާސީ މަޝްރަހާ ގުޅޭގޮތުންނާއި، ރައީސް ޔާމީން އަބްދުލްގައްޔޫމަށް އިންސާފު ހޯދައިދިނުމުގައި ހުރި ހުރަސްތަކާއި ބެހޭގޮތުން ވާހަކަދައްކަވާފަ އެވެ.
Advertisement
This content is created and paid for by advertisers and does not involve Voice Journalists