ށ. ފީވަކު ގޮނޑުދޮށުން ގިނަ އަދަދެއްގެ ވެއްޔާއި އަކިރި ނެގުމާ ގުޅިގެން އެންވަޔަރަންމަންޓަލް ޕްރޮޓެކްޝަން އޭޖެންސީ (އީޕީއޭ)އިން އެރަށު ކައުންސިލްގެ އިދާރާ ޖޫރިމަނާ ކޮށްފިއެވެ.
އީޕީއޭއިން ނެރުނު ނޫސްބަތާނެއްގައި ބުނީ، ފީވަކު ގޮނޑުދޮށުން ގިނަ އަދަދެއްގެ ވެއްޔާއި އަކިރި ނެގުމުގެ ޝަކުވާ، މިިދިޔަ އަހަރުގެ އޮކްޓޯބަރު މަހުގެ ތެރޭގައި އެ އޭޖެންސީއަށް ލިބުނު ކަމަށެވެ.
އެ އެޖެންސީން ބުނީ، ކުޑަކުދިން ކުޅޭ ޕާކެއް ތަރައްޤީކުރުމަށްޓަކައި އެރަށު ކައުންސިލްގެ އިސްނެގުމުގެ މަތިން، އެރަށު ގޮނޑުދޮށުން 25 ބަސްތާ ވެއްޔާއި 20 ބަސްތާ އަކިރި ނަގައި ބޭނުންކޮށްފައިވާކަން ސާބިތުވެފައިވާ ކަމަށެވެ.
އެހެންކަމުން ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނުން ލިބިދޭ ބާރުގެ ދަށުން އެކުލަވާލެވިފައިވާ، ތިމާވެއްޓަށް ދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލު ހޯދުމުގެ ގަވާއިދަށް ރިޢާޔަތްކޮށް، ފީވަކު ކައުންސިލް ޖޫރިމަނާ ކުރާ ކަމަށެވެ.
އީޕީއޭއިން ފީވަކު ކައުންސިލް ޖޫރިމަނާ ކޮށްފައި ވަނީ 83,525.00 (އަށްޑިހަ ތިންހާސް ފައްސަތޭކަ ފަންސަވީސް) ދިވެހި ރުފިޔާ އަށެވެ.
އެހެންކަމުން ސަރުކާރު ބަންދު ދުވަސްތައް ހިމަނައިގެން 30 ދުވަހުގެ ތެރޭގައި މި ޖޫރިމަނާގެ ފައިސާ އެ އެޖެންސީއަށް ދެއްކުމަށް މިިދިޔަ ބުރާސްފަތި ދުވަހު ފީވަކު ކައުންސިލަށް އީޕީއޭއިން ވަނީ އަންގާފައެވެ.
Advertisement
This content is created and paid for by advertisers and does not involve Voice Journalists
