ފުލުހުންގެ ޚިދުމަތަކީ ރައްޔިތުންނާއި ގާތުން ރައްޔިތުން އެދޭފަދަ ޚިދުމަތަކަށް ހަދައި، ފުލުހުން ދެމުންގެދާ ޚިދުމަތް ހަރުދަނާކުރެވޭނެ ކަންކަން ދެނެގަތުމަށް ޕޮލިސް ރިސާރޗް އެންޑް އިނޮވޭޝަން ކޮންފަރެންސްގެ ނަމުގައި ޚާއްޞަ ކޮންފަރެންސެއް ބޭއްވުމަށް ނިންމައިފިއެވެ.

މިކޮންފަރެސް ބޭއްވުމަށް ހަމަޖެހިފައިވަނީ މާޗް މަހުގެ 18 އިން 21 އަށެވެ. މި ކޮންފަރެންސް ކޮންމެ އަހަރަކު ބާއްވަން ވަނީ ނިންމާފައެވެ.

ހޯމް މިނިސްޓްރީއާއި، ފުލުހުންނާއި، ފުލުހުންގެ ބޯޑުން އިސްނަގައިގެން ކުރިއަށް ގެންދާ މި ކޮންފަރެންސަކީ އިލްމީ ދިރާސާތަކެއްގެ މައްޗަށް ކުރިއަށް ގެންދިއުމަށް ހަމަޖެހިފައިވާ ކޮންފަރެންސެވެ. މިކޮންފަރެންސާއި ގުޅޭގޮތުން މައުލޫމާތު ދެއްވުމަށް އިސްކަންދަރު ކޮށީގައި ބޭއްވި ނޫސްވެރިންގެ ބައްދަލުވުމުގައި ހޯމް މިނިސްޓަރ އިމްރާން އަބްދުﷲ ވިދާޅުވީ ފުލުހުންގެ ޚިދުމަތުގެ ފާއިތުވެދިޔަ 89 އަހަރުގެ ތެރޭގައި ޚިދުމަތަށް ބޮޑެތި ބަދަލުތަކެއް ގެނެވިފައިވާކަމަށެވެ.  

Advertisement

ފުލުހުންގެ ޚިދުމަތުގައި ހުރި ރަނގަޅުކުރަންޖެހޭ ކަންކަމަކީ، ރައްޔިތުންގެ ހުރި ކަންބޮޑުވުންތަކަށް ހައްލު ގެނެވޭނެ ގޮތަކަށް އެޖާގަ ދެވިގެން ގެނެވޭ ބަދަލުތަކަށް ވާންޖެހޭކަމަށް މިނިސްޓަރ ވިދާޅުވިއެވެ.

އެގޮތުން މި ކޮންފަރެންސުގެ އެންމެމުހިންމު މަޤްސަދަކީ ރައްޔިތުންގެ ޚިޔާލާއި މަޝްވަރާއާއި، މުޖުތަމައުގެ ބައިވެރިވުން ހިމެނޭ ޚިދުމަތަކަށް ފުލުހުންގެ ޚިދުމަތް ހެދުމެވެ. އަދި އެ ކޮންފަރެންގައި ޤާނޫނު ތަންފީޒުކުރާ އިދާރަތަކާއި، ޔުނިވާސިޓީ، ކޮލެޖް، މަދަނީ ޖަމްއިއްޔާތައް ހިމެނޭހެން އަދި އަމިއްލަ ފަރަތްތަކުންވެސް ކަރުދާސް ހުށަހަޅައި މަޝްވަރާކުރެވިގެން ފުލުހުންގެ ޚިދުމަތް ރަނގަޅު ކުރުމަށް މަސައްކަތް ކުރުމަކީވެސް މި ކޮންފަރެންސްގެ މަޤްޞަދެކެވެ.

މިކޮންފަރެންސުގައި 10 ދާއިރާއަކުން ދިރާސާ ކަރުދާސް ހުށައެޅުމަށް ނިންމާފައިވެއެވެ. އެގޮތުން ކްރައިމް ޕްރިވެންޝަން، ނެޝަނަލް ސެކިއުރިޓީ އެންޑް ކައުންޓާ ޓެރެރިޒަމް، ފައިނޭޝަލް ކްރައިމް އެންޑް އެންޓި މަނީ ލޯންޑަރިން، ސައިބާ ކްރައިމް، ފޮރިންސިކް ލީޑަރޝިޕް އޯގައިނޭޝަން ރެސިލިއަންސް، އިނޮވޭޝަން އެންޑް ޓެކްނޮލޮޖީ، ޓްރާސްޕޯޓް އެންޑް މެރިޓައިމް ސެކިއުރިޓީ، އެފެޝެންސީ އެންޑް އެފްޓިވްނެސް، އަދި ރޯޑް ސޭފްޓީއެވެ.