ވެރިކަން ކުރާ މައި ޕާޓީ، އެމްޑީޕީ މެމްބަރުންނަށްޓަކައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ކޮށްދެއްވި އެންމެ ބޮޑު އެއް ފަސޭހަ އަކީ ރައީސުލްޖުމްހޫރިއްޔާ ގެ މަގާމުގައި ހުންނަ ބޭފުޅަކު ވިދާޅުވާ އެއްޗެއް ތަރުޖަމާ ކޮށްދޭން ނުޖެހުން ކަމަށް ރައްޔިތުންގެ މަޖިލީހުގެ ދާންދޫ ދާއިރާގެ މެންބަރު ޔައުގޫބް ވިދާޅުވެއްޖެއެވެ. 

އެމްޑީޕީގެ ޕްރައިމަރީގެ ދުވަސް ކައިރިވަމުން އަންނަ އިރު، ޕްރައިމަރީގައި ވާދަކުރައްވާ ރައީސް ޞާލިހް އާއި ރައްޔިތުންގެ މަޖިލީހުގެ ރައީސް މުހައްމަދު ނަޝީދުއަށް ތާއީދު ކުރައްވާ މެންބަރުން އަންނަނީ އެބޭފުޅަކު ތާއީދު ކުރައްވާ ފަރާތަށް ކެންޕެއިން ކޮށްދީ، އިދިކޮޅު ކެންޑިޑޭޓް އަށް ބަހުގެ ހަމަލާތައް ރައްދު ކުރަމުންނެވެ. 

އެގޮތުން، ރައީސް ޞާލިހު ގެ ފެކްޝަނުގައި ހިމެނިވަޑައިގަންނަވާ ޔައުގޫބް، ރައީސް ނަޝީދަށް ނުސީދާކޮށް ފާޑުވިދާޅުވެ ކުރެއްވި ޓްވީޓެއްގައި އޭނާ ވަނީ ރައީސް ޞާލިހު ކޮށްދެއްވި އެންމެ ބޮޑު އެއް ފަސޭހަ އަކީ ރައީސުލްޖުމްހޫރިއްޔާ ގެ މަގާމުގައި ހުންނަ ބޭފުޅަކު ވިދާޅުވާ އެއްޗެއް ތަރުޖަމާ ކޮށްދޭން އެމްޑީޕީ މެންބަރުން ކުރަންޖެހުނު ބުރަ މަސައްކަތް ނިމުމަކަށް އައުން ކަމަށެވެ. 

Advertisement

"ރައީސް ޞާލިހު ގެ ހެޔޮ ވެރިކަމުގެ 4 އަހަރުގައި ވިދާޅުވި ހުރިހާ ވާހަކައެއްވެސް ސާފު" ޔައުގޫބް ވިދާޅުވިއެވެ. 

ޔައުގޫބް މިފަދައިން ވިދާޅުވެފައި ވާއިރު, ނަޝީދުގެ ވެރިކަމުގައި އެކި ޕޯޑިއަމްތަކުގައި އެމަނިކުފާނު ދައްކަވާފައިވާ ބައެއް ވާހަކަ ތަކަށް އާއްމުންގެ ފާޑުކިޔުންތައް އަމާޒުވުމާއި ގުޅިގެން އެމަނިކުފާނު ގެ ވާހަކަފުޅު "ތަރުޖަމާ" ކޮށްދީ ހަގީގަތުގައި ވިދާޅުވާން ބޭނުންވި ވާހަކަ ހާމަކޮށްދޭން ޖެހުނު ކަމީ ގިނަ ބައެއްގެ ފާޑުކިޔުންތައް އެކަމަށް އަމާޒުވެގެން ދިޔަ ކަމެކެވެ.