ޕީޕީއެމްގެ ރައީސް  ޔާމީން އަބްދުލްގައްޔޫމު ދެން ސަލާމަތެއް ނުވާނެކަމަށާއި، ރިޔާސީ އިންތިޚާބުގައި ވާދަކުރަން ބޭނުންނަމަ ޕީޕީއެމުން އެހެން ކެންޑިޑޭޓެއް ހޯދުމަށް ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) މެނޭޖިން ޑިރެކްޓަރު މޫސާ އަލި މަނިކު (މޫކޭ) ވިދާޅުވެއްޖެ އެވެ. 

މޫކޭ މިފަދައިން ވިދާޅުވެފައިވަނީ ހުކުރު ދުވަހުގެރޭ ކާނިވާ ސަރަހައްދުގައި އޮތް ރައީސް ޞާލިހުގެ ކެމްޕޭނު ޖަލްސާގައި ވާހަކަދައްކަވަމުން ނެވެ. 

ރައީސް ޔާމީންގެ މައްޗަށް ވ. އާރަށުގެ މުއާމަލާތާއި ގުޅުވާ ކޮށްފައިވާ ހުކުމް ހައިކޯޓުގައި އިސްތިއުނާފުކުރުމަށް ރައީސް ޔާމީންގެ ގާނޫނީ ޓީމުން މަސައްކަތް ކުރައްވަމުންދާ މި ދަނޑިވަޅުގައި މޫކޭ ވިދާޅުވީ ރައީސް ޔާމީން އޮންނާނީ ޖަލުގައި ކަމަށެވެ.

މި ސަރުކާރުން ނިންމި މަޝްރޫއުތައް ޚުލާސާ ކުރައްވަމުން މޫކޭ ކިޔުއްވަމުން ދިޔަ ލިސްޓު ކުރުކޮށްލައްވަމުން އެންމެ ފަހުކަމެއްގެ ގޮތުގައި ވިދާޅުވީވެސް ރައީސް ޔާމީން ޖަލަށްލި ވާހަކައެވެ. އަދި އެކަން ނިމިއްޖެކަމަށް މޫކޭ ވިދާޅުވިއެވެ. 

މޫކޭ ދެން ވިދާޅުވީ އެމްޑީޕީގެ ރިޔާސީ ޕްރައިމަރީގެ ތެރެއަށް ވަނުމަށް ޕީޕީއެމުން މަސައްކަތް ކުރަމުންދާކަމަށެވެ. އަދި އެ މަސައްކަތުގައި ޕާޓީގެ ތެރެއިންވެސް ބަޔަކު މަސައްކަތް ކުރަމުންދާކަމަށެވެ. އެއާއެކު އޭނާ ވަނީ މިހާރުން މިހާރަށް އެކަން ހުއްޓާލުމަށްފަހު އަންނަ ރިޔާސީ އިންތިޚާބުގައި ޕީޕީއެމުން ނެރޭނެ ކެންޑިޑޭޓެއް ހޯދުމުގެ މަސައްކަތް ފެށުމަށް ގޮވާލައްވާފަ އެވެ. 

ރައީސް ޞާލިހުގެ ކެމްޕޭނު ޖަލްސާގައި ވާހަކަދެއްކެވި ހުރިހާ ބޭފުޅުންވެސް ވަނީ ރައީސް ޔާމީނަށް ގިނަ ފާޑުކިޔުންތަކެއް އަމާޒުކުރައްވާފަ އެވެ. 

މިފަހަކަށް އައިސް އެމްޑީޕީގެ ރައީސް މުހައްމަދު ނަޝީދު ރައީސް ޔާމީނަށް ތައުރީފު ކުރައްވަމުން ދާ ދިއުމަށްވެސް ޖަލްސާގައި ވާހަކަދެއްކެވި ބައިވެރިން ވަނީ ރައްދުދެއްވާފަ އެވެ.

އެގޮތުން ޑިފެންސް މިނިސްޓަރު މާރިޔާ ދީދީގެ ވާހަކަފުޅުގައި ވަނީ ރައީސް ނަޝީދު ރައީސް ޔާމީނާއި ބައިޔަތުހިފައި ދާނެތީ ކަންބޮޑުވެ ވަޑައިގަންނަވާކަމަށް ވިދާޅުވެފައެވެ. 

އެމްޑީޕީގެ އެތެރޭގެ އިންތިޚާބާއި ދިމާކޮށް ރައީސް ޔާމީންގެ ނަންފުޅު ބޭނުންކުރަމުންދާ ދިއުމާއި ގުޅިގެން އިދިކޮޅުން ދަނީ ނުރުހުން ފާޅުކުރަމުންނެވެ. އެގޮތުން އެމްޑީޕީގެ ދެ ރައީސުންގެ ދެމެދުގައި އޮތް ވާދަވެރިކަމެއްގައި، ދެ ރައީސުންވެސް ރައީސް ޔާމިންގެ ނަންފުޅު ބޭނުންކުރައްވަނީ ސިޔާސީ ތާއީދު ހޯއްދެވުމަށްކަމަށް އިދިކިޅުން ދަނީ ބުނަމުންނެވެ.