ފަހިދިރިއުޅުން ކޯޕަރޭޝަނާއި ހަވާލުކޮށްގެން ހުޅުމާލޭގެ ދެވަނަ ފިޔަވަހީގައި ތަރައްގީކުރަމުންދާ 4000 ހައުސިން ޔުނިޓުގެ ތެރެއިން ފުރަތަމަ ތޭރަ ޓަވަރުގެ މަސައްކަތް ނިންމާ މިއަހަރު ނިމުމުގެ ކުރިން އެ ތަންތަނުގައި މީހުން ދިރިއުޅެން ފަށާނެކަމަށް އެ ކޯޕަރޭޝަނުން ބުނެފިއެވެ. 

ހުޅުމާލޭގައި 4000 ހައުސިން ޔުނިޓު އެޅުމުގެ މަސައްކަތަކީ މި ސަރުކާރުގެ "ގެދޮރުވެރިޔާ" ސިޔާސަތުގެ ދަށުން ހިންގާ މަޝްރޫއެކެވެ. 

ފަހިދިރިއުޅުން ކޯޕަރޭޝަންގެ ފްލެޓުތައް ބައްލަވާލެއްވުމަށް، އެ ކޯޕަރޭޝަނުން ފްލެޓުތަކަށް ޒިޔާރަތްކޮށްފައިވާއިރު، އެ ތަންތަނީ ހިތްހަމަ ޖެހިލައިގެން މީހުންނަށް އުޅެވޭނެގޮތަށް ޒިސައިންކުރެވިފައިވާ ތަންތަންކަން ޔަގީންކުރެވޭކަމަށް އެ ކޯޕަރޭޝަންގެ މެނޭޖިން ޑިރެކްޓަރު ސަލްފިއްޔާ އަންވަރު ވަނީ ވިދާޅުވެފަ އެވެ. 

އެ މަޝްރޫއުގެ ސްޕީޑާއި ދޭތެރޭގައި ހިތްހަމަ ޖެހޭކަމަށާއި، އެ ކޯޕަރޭޝަނާއި ހަވާލުކުރި 32 ޓަވަރުގެ ތެރެއިން 13 ޓަވަރުގެ މަސައްކަތް މިއަހަރުގެ އޯގަސްޓުމަހާއި ހަމަޔަށް ނިންމާނެކަމަށް އޭނާ ވިދާޅުވިއެވެ. 

އެފްޑީސީއިން ބުނީ ހައުސިން ޔުނިޓު އަޅާނީ 18 ފްލޯ ހިމެނޭ 32 ޓަވަރުގައި ކަމަށެވެ. ފްލެޓުތައް އަޅަން އެފްޑީސީން ހަވާލުކޮށްފައިވަނީ ނޭޝަނަލް ބިލްޑިންސް ކޮންސްޓްރަކްޝަން ކުންފުނި (އެންބީސީީސީ)އާއި ޖޭއެމްސީ ޕްރޮޖެކްޓްސްއާއެވެ. އެެއިން ކޮންމެ ކުންފުންޏަކާ 16 ޓަވަރު ވަނީ ހަވާލު ކޮށްފައެވެ.

މި ދެ ކުންފުންޏާ ހަވާލު ކޮށްފައިވަނީ ތިން ކޮޓަރީގެ 1400 ފްލެޓާއި ދެ ކޮޓަރީގެ 600 ފްލެޓު އެޅުމަށެވެ. ތިން ކޮޓަރީގެ ފްލެޓުތަކުގައި 900 އަކަފޫޓު ހުންނާނެއެވެ. އަދި ދެ ކޮޓަރީގެ ފްލެޓުތަކުގައި 650 އަކަފޫޓު ހުންނާނެއެވެ.

އެ ފްލެޓުތައް އަޅަން އިންޑިއާގެ އެގްޒިމް ބޭންކުން ދެ ލޯނެއްގެ ގޮތުގައި 227 މިލިއަން ޑޮލަރު ދީފައިވެއެވެ. އެއީ 116.45 މިލިއަން ޑޮލަރުގެ ލޯނަކާއި 110.5 މިލިއަން ޑޮލަރުގެ ލޯނެކެެވެ. އެ ލޯންތަކަށް ސަރުކާރުން ވަނީ ސޮވެރިން ގެރެންޓީ ދީފައެވެ.