ސަރުކާރުގެ "ގެދޮރުވެރިޔާ" ސްކީމްގެ ދަށުން ފަހިދިރިއުޅުން ކޯރޕަރޭޝަނުން ކުރިޔަށް ގެންދާ ބޯހިޔާވަހިކަމުގެ މަޝްރޫޢުތެރެއިން ހުޅުމާލެ ފޭސް 2 ގައި އިމާރާތްކުރަމުން އަންނަ 3 ކޮޓަރީގެ ފްލެޓްތައް ބަލާލުމަށް އާންމުންނަށް ހުޅުވާލައިފިއެވެ.

ފަހިދިރިއުޅުން ކޯރޕަރޭޝަނުން "ވޮއިސް" އަށް މައުލޫމާތު ދިންގޮތުގައި ބަންދު ނޫން ކޮންމެ ދުވަހެއްގެ14:00 - 16:00 އަށް ފްލެޓް ބަލާލުމަށް އާންމުންނަށް ވަދެވޭނެއެވެ.

ފަހި ދިރިއުޅުން ކޯޕަރޭޝަން އިން މާލެ ސަރަހައްދުގައި ހިންގާ ޕްރޮޖެކްޓް ތަކުގެ ނަމަކީ "އަމާން" އެވެ. 

އަމާން ޕްރޮޖެކްޓްގެ "އުދަރެސް" ޓަވަރުގެ 3 ކޮޓަރީގެ މޮކްއަޕް ރޫމް އާންމުނަށް ދައްކާލުމަށް ހުޅުވާލާފައިވާއިރު، މިމަޝްރޫއުގެ ދަށުން 2000 ހައުސިންގ ޔުނިޓު އިމާރާތްކުރެވޭނެއެވެ. މިއީ 900 އަކަފޫޓުގެ 3 ކޮޓަރީގެ 1400 އެޕާރޓްމަންޓް އާއި 650 އަކަފޫޓުގެ 2 ކޮޓަރީގެ 600 އެޕާރޓްމަންޓެވެ.

އަމާން ޕްރޮޖެކްޓްގެ "އުދަރެސް" ޓަވަރުގެ 3 ކޮޓަރީގެ މޮކްއަޕް ރޫމް--ފޮޓޯ: ވޮއިސް

މިމަޝްރޫޢުގެ އަމަލީ މަސައްކަތް ފަށާފައިވަނީ ފެބްރުއަރީ 2022ގައެވެ. އިންޑިއާގެ ޖޭއެމްސީއިން އަޅާ 8 ޓަވަރުގެ މިއަހަރު ނިމޭނެކަމަށް ފަހިދިރިއުޅުން ކޯޕަރޭޝަނުން މައުލޫމާތުދެއެވެ. އަދި އިންޑިއާގެ އެމްބީސީސީން އަޅާ 5 ޓަވަރު ވެސް މިއަހަރު ނިމޭނެކަމަށް އެ ކޯޕަރޭޝަނުން މައުލޫމާތުދެއެވެ.

އަމާން ޕްރޮޖެކްޓްގެ "އުދަރެސް" ޓަވަރުގެ 3 ކޮޓަރީގެ މޮކްއަޕް ރޫމް--ފޮޓޯ: ވޮއިސް

16 ޓަވަރުގެ މައްޗަށް ބަހާލައިގެން ކުރިޔަށްގެންދާ މިމަޝްރޫޢުގެ ހުރިހާ ޓަވަރެއްގެ މަސައްކަތް މިހާރުވަނީ ފަށާފައެވެ. 

މިވަގުތު މިކޯރޕަރޭޝަނުން ކުރިޔަށް ގެންދާ ޖުމްލަ 4000 ހައުސިންގ ޔުނިޓު އިމާރާތްކުރުމުގެ އަމަލީ މަސައްކަތް ވަނީ ފަށާފައެވެ. 

އެފްޑީސީއިން ބުނީ ހައުސިން ޔުނިޓު އަޅާނީ 18 ފްލޯ ހިމެނޭ 32 ޓަވަރުގައި ކަމަށެވެ. ފްލެޓުތައް އަޅަން އެފްޑީސީން ހަވާލުކޮށްފައިވަނީ ނޭޝަނަލް ބިލްޑިންސް ކޮންސްޓްރަކްޝަން ކުންފުނި (އެންބީސީީސީ)އާއި ޖޭއެމްސީ ޕްރޮޖެކްޓްސްއާއެވެ. އެެއިން ކޮންމެ ކުންފުންޏަކާ 16 ޓަވަރު ވަނީ ހަވާލު ކޮށްފައެވެ.

އަމާން ޕްރޮޖެކްޓްގެ "އުދަރެސް" ޓަވަރުގެ 3 ކޮޓަރީގެ މޮކްއަޕް ރޫމް--ފޮޓޯ: ވޮއިސް

މި ދެ ކުންފުންޏާ ހަވާލު ކޮށްފައިވަނީ ތިން ކޮޓަރީގެ 1400 ފްލެޓާއި ދެ ކޮޓަރީގެ 600 ފްލެޓު އެޅުމަށެވެ. ތިން ކޮޓަރީގެ ފްލެޓުތަކުގައި 900 އަކަފޫޓު ހުންނާނެއެވެ. އަދި ދެ ކޮޓަރީގެ ފްލެޓުތަކުގައި 650 އަކަފޫޓު ހުންނާނެއެވެ.

އެ ފްލެޓުތައް އަޅަން އިންޑިއާގެ އެގްޒިމް ބޭންކުން ދެ ލޯނެއްގެ ގޮތުގައި 227 މިލިއަން ޑޮލަރު ދީފައިވެއެވެ. އެއީ 116.45 މިލިއަން ޑޮލަރުގެ ލޯނަކާއި 110.5 މިލިއަން ޑޮލަރުގެ ލޯނެކެެވެ. އެ ލޯންތަކަށް ސަރުކާރުން ވަނީ ސޮވެރިން ގެރެންޓީ ދީފައެވެ.