ވާދަވެރި ސިޔާސީ ލީޑަރު ރައީސް ޔާމީން އަބްދުލްގައްޔޫމަށް ހަރާން ހުކުމެއް ކުރެއްވުމަށްފަހު ރައްޔިތުން ގާތަށް ވަޑައިގަތުމުން، ރައްޔިތުން ހަނު ތިއްބަވާނެކަމަށް ރައީސް އިބްރާހިމް މުހައްމަދު ޞާލިހު ހީފުޅުކުރައްވައިގެން ނުވާނެކަމަށް ޕީޕީއެމްގެ ނައިބުރައީސް އަދި މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމު ވިދާޅުވެއްޖެ އެވެ. 

ޝިޔާމު އެފަދައިން ވިދާޅުވެފައިވަނީ އެމްޑީޕީގެ ރިޔާސީ ޕްރައިމަރީއަށް ތާއީދު ހޯއްދެވުމަށް ރައީސް ޞާލިހު ފުވައްމުލަކު ސިޓީއަށް ވަޑައިގަތުމުން ރައްޔިތުން ނިކުމެ މުޒާހަރާ ކުރުމާއި ގުޅިގެން ކުރެއްވި ޓްވީޓެއްގައެވެ. 

ރައީސް ޞާލިހު ފުވައްމުލަކަށް ވަޑައިގަތުމުން އެ ރަށުގެ ރައްޔިތުން ވަނީ އެމަނިކުފާނުގެ އިސްތިއުފާއަށް ގޮވާލާ މުޒާހަރާކޮށްފަ އެވެ. އޭގެ އިތުރުން މި ސަރުކާރު އަޑީގައި އޮވެގެން ރައީސް ޔާމީނުގެ މައްޗަށް ކޮށްފައިވަނީ "ހަރާން ހުކުމެއް" ކަމަށާއި، އެ ހުކުމް ބާތިލުކޮށް އެމަނިކުފާނު މިނިވަންކުރުމަށްވެސް ރައްޔިތުން ގޮވާލާފައި ވެއެވެ. 

Advertisement

ފުވައްމުލަކުގައި މިއަދު ކުރިއަށް ގެންދިޔަ މުޒާހަރާގެ ތެރެއިން/ ފޮޓޯ: އިންޓަނެޓު 

ފުވައްމުލަކު ސިޓީގައި ކުރިއަށް ދިޔަ މުޒާހަރާ ރޫޅާލުމަށް ފުލުހުން ހާލަތާއި ނުބައްދަލު ބާރުގެ ބޭނުން ކުރި މަންޒަރުތައްވެސް ފެނިގެންދިޔައެވެ. އަދި ބާރުގެ ބޭނުން ކުރުމުގެ ތެރޭގައި މުޒާހަރާގެ ބައެއް ބައިވެރިންނަށް އެކިވަރުގެ އަނިޔާތައް ލިބިފައިވާކަމަށް މައުލޫމާތު ލިބެއެވެ. 

އެހެން ނަމަވެސް ހުއްޓާނުލާ ފުވައްމުލަކުގެ ރައްޔިތުން ވަނީ މުޒާހަރާކޮށްފައެވެ. ހަވީރުގެ މުޒާހަރާއަށްފަހު މިރޭވެސް ރައީސް ޞާލިހާއި ދެކޮޅަށް ރައްޔިތުން ވަނީ އަޑުއުފުލާފަ އެވެ. 

އެކަން ފާހަގަކުރައްވާ ޝިޔާމު ވިދާޅުވީ މިނިވަންކަމުގެ ދިފާއުގައި ފުވައްމުލަކު ސިޓީއިން ދެއްކި މިސާލަށް އައްސެރިބަހާއި ސާބަސް ރައްދުކުރައްވާކަމަށެވެ. 

ރައީސް ޔާމީންގެ މައްޗަށް ހަރާން ހުކުމެއްކޮށް ދިވެހިރާއްޖެ އިންޑިއާގެ އަވަށަކަށް ހެއްދެވުމަށްފަހު ރައްޔިތުންގެ ގާތަށް އަނެއްކާވެސް ދެވަނަ ދައުރެއް ހޯއްދެވުމަށް ވަޑައިގަތުމުން ރައްޔިތުން ހަނުތިބެދޭނެކަމަށް ގަބޫލުފުޅުކޮށްގެން ނުވާނެކަމަށް ޝިޔާމު ވިދާޅުވިއެވެ. 

ރައީސް ޞާލިހު ފުވައްމުލަކަށް ވަޑައިގަތުމުން ރައްޔިތުން މުޒާހަރާކޮށްފައިވާއިރު، އައްޑޫ ސިޓީއަށް އެމަނިކުފާނު ކުރެއްވި ދަތުރުފުޅުގައިވެސް ރައްޔިތުން ވަނީ ނުރުހުން ފާޅުކޮށް މުޒާހަރާކޮށްފަ އެވެ.