ކީރިތި ޤުރުއާން އަންދާލުމުގެ ހުއްދަ ސްވިޑްން ސަރުކާރުން ދިން މައްސަލަ އެންމެ ހަރުކަށިކޮށް ކުށްވެރިކޮށް، އެކަމާއި ދެކޮޅަށް ދިވެހީންގެ އަޑު އުފުލައިދިނުމަށް ދިވެހި ސަރުކާރަށް، އިދިކޮޅު ކޯލިޝަނުން ގޮވާލައިފި އެވެ. 

ސްވިޑެން ގެ ފާ-ރައިޓް، ހަރުކަށި ސިޔާސީ ޕާޓީއެއް ކަމަށްވާ "ހާޑް ލައިން" ގެ ހަރުކަށި ފިކުރު ގެ ލީޑަރަކާއި އެ ޕާޓީގެ މެންބަރުން ތަކެއް، އެ ގައުމުގެ ސަރުކާރުގެ ހުއްދަ އާއި ފުލުހުންގެ ހިމާޔަތާއި އެކު، ކީރިތި ޤުރުއާން އެންދި މައްސަލަ ފެންމަތިވުމާއި ގުޅިގެން ގިނަ އަދަދެއްގެ މުސްލިމް ގައުމު ތަކުން އަންނަނީ ނުރުހުން ފާޅުކޮށް ބަޔާން ނެރެމުންނެވެ. 

އަދި އެ މައްސަލަ އާއި ގުޅިގެން، އިދިކޮޅުން ނެރުނު ބަޔާނެއްގައި ވަނީ، ކީރިތި ޤުރުއާން އަންދާލުމުގެ ހުއްދަ ސްވިޑްން ސަރުކާރުން ދިފައިވާތީ، އެކަން އެ ކޯލިޝަންގެ ފަރާތުން އެންމެ ހަރުކަށިކޮށް ކުށްވެރި ކޮށްފައެވެ. އަދި މުސްލިމުންނާއި ދެކޮޅަށް ހިންގޭ މިފަދަ ލާދީނީ އަދި ލާއިންސާނީ ޙަރަކާތްތަކަކީ އެއްގޮތަކަށްވެސް އެ ކޯލިޝަނުން ބަލައިގަންނާނޭ ކަމެއް ނޫން ކަމަށާ އެކަމުގެ ސަބަބުން މުސްލިމުންގެ ހިތްތަކުގައި ނުތަނަވަސްކަން އުފެދި އެހެން ދީންތަކުގެ މީހުންގެ މެދުގައިވެސް ނަފްރަތާއި ރުޅިވެރިކަން އުފެދި ބޮޑު ހަމަނުޖެހުމަކަށް ދިއުމުގެ ފުރުޞަތު ތަނަވަސްވެގެން ހިނގައިދާނޭ ކަމަށް ޤަބޫލުކުރާ ކަމަށްވެސް ބުނެފައިވެއެވެ.

Advertisement

އެހެންކަމުން ސްވިޑްން ސަރުކާރުން ކީރިތި ޤުރުއާން އަންދާލުމަށް ދީފައިވާ ހުއްދަ ބާޠިލުކޮށް ނަފްރަތާއި ރުޅިވެރިކަމަށް ޖާގަ ލިބޭ މިފަދަ ޢަމަލުތަކުން ދުރުވުމަށް އެންމެހާ ޤައުމުތަކަށް އިދިކޮޅުން ވަނީ ގޮވާލާފައެވެ.

"އަދި ސްވިޑްން ސަރުކާރުން ކީރިތި ޤުރުއާން އަންދާލުމުގެ ހުއްދަ ދިން މައްސަލައިގައި ދިވެހި ސަރުކާރުގެ ބަސް ދުނިޔެއަށް އިއްވައި މިކަމާއި އިދިކޮޅަށް ދިވެހީންގެ އަޑު އުފުލައިދިނުމަށް ސަރުކާރަށް ގޮވާލަމެވެ." އިދިކޮޅުގެ ބަޔާނުގައި ބުނެފައިވެއެވެ. 

ސްވިޑެންގައި ގުރުއާން އެންދި މައްސަލަ ކުށްވެރިކޮށް ގިނަ ގައުމުތަކުން ބަޔާން ނެރެފައިވާއިރު އެ ޢަމަލާއި ގުޅިގެން ދިވެހި ސަރުކާރުން އަދި އެއްޗެއް ހާމަކޮށްފައެއް ނުވެއެވެ.