އެމްޑީޕީގެ ރިޔާސީ ޕްރައިމަރީގެ ކެމްޕެއިންގެ ތެރެއިން އެ ޕާޓީގެ ރައީސް އަދި މަޖިލީހުގެ ރައީސް މުހައްމަދު ނަޝީދު ދައްކަވަމުންދަނީ ގައުމުގެ މަސްލަހަތު ގެއްލިދާފަދަ ނުރައްކާތެރި ވާހަކަތައްކަމަށް މަޖިލީހުގެ އައްޑޫ މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވެއްޖެއެވެ.

ރައީސް ނަޝީދުގެ، ކެމްޕެއިންގެ ތެރެއިން އެމަނިކުފާނު ގއ ވިލިނގިލި އަށް ވަޑައިގެން އެމަނިކުފާނު ވަނީ އެ ސަރަހައްދު ވަކި ސަރުކާރެއްގެ ގޮތުގައި ހިންގަން ފެނިވަޑައިގަންނަވާކަމަށް ވިދާޅުވެފައެވެ. އަދި އެކަން ކުރުމަށްޓަކައި ފެޑަރަލް ނިޒާމެއް ގެނައުމަށް ތާއީދު ކުރައްވާކަމަށްވެސް ވިދާޅުވެފައިވެއެވެ.

އެކަމާއި ގުޅިގެން އެމްޑީޕީގެ ރިޔާސީ ޕްރައިމަރީގައި ރައީސް އިބްރާހިމް މުހައްމަދު ސާލިހަށް ތާއީދު ކުރައްވާ ޝަރީފް ނަޝީދަށް އަމާޒު ކުރައްވައި މިއަދު ކުރެއްވި ޓުވީޓް ތަކެއްގައި ވިދާޅުވީ، ރާއްޖޭގެ އެންމެހާ ވަސީލަތަކީ ހުރިހާ ރައްޔިތުންގެ އެއްޗެއްކަމަށެވެ.

އަދި ދިވެހިންނަކީވެސް އެއް ބައެއް ކަމަށާ، ރާއްޖޭގައި ތިބެނީ އެއް ދީނެއްގެ އަހުލުވެރިންކަމަށްވާއިރު، ގައުމު ފޮތި ފޮތިކުރާ ވާހަކަދެއްކުމަކީ މުޅި ގައުމުގެ މަސްލަހަތު ގެއްލިގެންދާ ވާހަކަތަކެއް ކަމަށް އޭނާ ވިދާޅުވި އެވެ. އެފަދަ ގޮތް ގޮތަށް ރައީސް ނަޝީދު ދައްކަވަމުންދަނީ ނުރައްކާތެރި ވާހަކަތަކެއް ކަަމަށްވެސް ޝަރީފް ވިދާޅުވި އެވެ.

މީގެ އިތުރުން ޝަރީފް ކުރެއްވި އެހެން ޓުވީޓެއްގައި އޭނާ ވިދާޅުވީ، ފެޑަރަލް ނިޒާމެއް ގުޅެނީ އާބާދީ އެތައް ސަތޭކަ މިލިއަނަކަށް އަރާ، އެތައް ލައްކަ ކިލޯ މީޓަރެއްގެ ބިން އޮންނަ ގައުމުތަކާއި ކަމަށެވެ. އަދި އެއީ އެތައް ދީނެއްގެ މީހުން ދިރިއުޅެމުންދާ މަދު ގައުމުތަކެއް ކަމަށާ، އެފަދަ ނިޒާމެއް ރާއްޖެއާއި ނުގުޅޭކަމަށެވެ. އަދި ނަޝީދު ދައްކަވަމުންދާ ވާހަކަތަކުގެ ނަތީޖާއަކީ ގައުމު ބައިބައިވެ ފަސާދަވުންކަމަށް ވިދާޅުވިއެވެ.