އެމްޑީޕީ ރިޔާސީ ޕްރައިމަރީގެ ކެމްޕެއިނަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު، ގދ. ތިނަދޫ އަށް ވަޑައިގެންނެވުމުން އެރަށުގެ ޕީޕީއެމް ސަޕޯޓަރުން އިހްތިޖާޖް ކޮށްފި އެވެ. 

ރައީސް ޞާލިހުގެ ކެންޕެއިނަށް މިއަދު ތިނަދޫ އަށް ވަޑައިގެންނެވި އިދިކޮޅު ޕީޕީއެމް، ޕީއެންސީގެ ސަޕޯޓަރުން ތިބީ މުޒާހަރާ ކުރަން ބަނދަރުމައްޗަށް ނުކުމެ އެވެ. އަދި އެއަށްފަހު އެރަށު އެމްޑީޕީ ޖަގަހަ ކައިރީގައިވެސް އެޕާޓީ މެންބަރުން ވަނީ މުޒާހަރާ ކޮށްފައެވެ.

އިދިކޮޅުން ކުރަމުންދާ މުޒާހަރާގެ ތެރެއިން، އެ ކޯލިޝަންގެ ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓު ރައީސް ޔާމީންގެ މައްޗަށް ކޮށްފައިވާ "ހަރާމް" ހުކުމް ބާތިލްކޮށް އެމަނިކުފާނު މިނިވަން ކުރުމަށް ވަނީ ގޮވާލާފައެވެ.

Advertisement

މި މުޒާހަރާ ކޮންޓްރޯލް ކޮށް، މުޒާހަރާގެ ބައިވެރިންނަށް ހުރސްއެޅުމުގެ ބެރިކޭޑް ޖަހައި، ގިނަ އަދަދެއްގެ ފުލުހުން ވަނީ އެ ސަރަހައްދުގައި ހަރަކާތްތެރިވެފައެވެ. 

މީގެ ކުރިންވެސް ރައީސް ޞާލިހުގެ ކެންޕެއިނަށް ރަށްރަށަށް ވަޑައިގެންނެވުމުން، އެރަށްރަށަށް ރައީސް ޞާލިހު ވެފައިވާ ވައުދުތައް ނުފުއްދާ ކަމަށާ، އަދި ރައީސް ޔާމީން މިނިވަން ކުރުމަށް ގޮވާލައި މުޒާހަރާ ކޮށްފައިވެއެވެ.