ރައީސް އިބްރާހިމް މުހައްމަދު ޞާލިހްއަކީ މަޤާމް ދިފާއުކުރެއްވުމަށް ކޮންމެފަދަ ކަމެއްކުރުމަށް ފަސްނުޖެހޭނެ ބޭފުޅެއްކަމަށް އިދިކޮޅު ކޯލިޝަންގެ ތަރުޖަމާނު ހީނާ ވަލީދު ވިދާޅުވެއްޖެއެވެ.
ހީނާ މިފަދައިން ވިދާޅުވެފައިމިވަނީ އެމްޑީޕީގެ ރިޔާސީ ޕްރައިމެރީގައި ރައީސް ޞާލިހް ދަތުރުކުރައްވަމުން ގެންދަވާ ރަށްތަކުން، ރައީސް ޞާލިހްއާއި ދެކޮޅަށް އަޑުއުފުލާ އިދިކޮޅު ޕާޓީގެ މެންބަރުން ހައްޔަރުކުރާ މައްސަލާގައި "ވޮއިސް" އަށް ދެއްވި ބަސްދީގަތުމެއްގައެވެ.
އެކަމާއި ގުޅިގެން ހީނާ ވިދާޅުވީ ރަށް ރަށުގައި ތިބޭ ޕީޕީއެމްގެ ސަޕޯޓަރުންނާއި ދޭތެރޭ ހިންގޭ މިފަދަ އަމަލު ތަކަކީ ހިޔާލު ފާޅުކުރުމުގެ މިނިވަން ކަމަށް ހުރަސް އަޅާ ކަމެއް ކަމަށެވެ. އަދި މިއަދު ހައްޔަރު ކުރި މީހާގެ އިތުރުން 130 އާއި ގާތް ކުރާ އަދަދަކަށް މިފަދަ މުޒާހަރާ ތަކުގައި މީހުން ހައްޔަރު ކޮށްފައިވާކަން ހީނާ ފާހަގަކުރެއްވިއެވެ.
ރައީސް އިބްރާހިމް ޞާލިހް އާއި ދެކޮޅަށް ތިނަދޫގައި މިއަދު ވަނީ އިދިކޮޅުން މުޒާހަރާކޮށް، އިދިކޮޅު ލީޑާރު ރައީސް ޔާމީން ދޫކޮށްލުމަށް ގޮވާލާފައެވެ. މި މުޒާހަރާގައި މީހަކު ހައްޔަރު ކުރެވިފައިވާއިރު، މުޒާހަރާގެ ބައިވެރިންނާއި ފުލުހުންނާއި ދެމެދު ވަނީހަމަނުޖެހުން ހިނގާފައެވެ.
"ރައީސް ޞާލިހްގެ މި އަމަލުން ފެންނަނީ ރައީސް ޞާލިހް އަކީ މަޤާމް ދިފާއު ކުރެއްވުމަށް ކޮންމެ ފަދަަ ކަމެއް ކުރުމަށްވެސް ފަސްނުޖެހޭނެކަން. އެކަމުގެ މިސާލަކަށް އެމަނިކުފާނުގެ އެންމެ ގާތް، އަދި ކުރީގެ ރައީސް ނަޝީދާމެދު ރައީސް އިބްރާހިމް ކަންތައްކުރާގޮތް ފުދޭނެ"
ހީނާ ވަލީދު ވިދާޅުވިއެވެ.
މީގެ އިތުން ރައީސް ސޯލިހްގެ ކެމްޕެއިން އަކީ ސަރުކާރުގެ ވަސީލަތްތައް ބޭނުން ކުރައްވައިގެން ކުރިއަށް ގެންދާ ކެންޕެއިނެއްކަމަށާއި، މިއީ ކަނޑައެޅިގެން ކޮރަޕްޝަންގެ އަމަލެއް ކަމަށްވެސް ހީނާ ވަނީ ފާހަގަ ކުރައްވާފައެވެ.
މިއާއެކު ހީނާ ވަނީ ވޭތުވެދިޔަ ރިޔާސީ ދައުރުގައި ރައީސް ޔާމީން ގެނެސް ދެއްވާފައިވާ ތަރައްގީގެ 10 އިންސައްތަވެސް ރައީސް ޞާލިހް އަށް ގެނެސް ދެވިފައި ނުވާ ކަމަށް ވިދާޅުވެފައިވެއެވެ.
Advertisement
This content is created and paid for by advertisers and does not involve Voice Journalists
