އެންވަޔަރަމަންޓަލް ޕްރޮޓެކްޝަން އެޖެންސީ (އީޕީއޭ) އިން ށ.ފީވަކު ކައުންސިލް 83,000 ރުފިޔާއިން ޖޫރިމަނާކޮށްފިއެވެ.

މިކަމާއި ގުޅިގެން އީޕީއޭއިން ނެރުނު ނޫސްބަޔާނެއްގައި ބުނީ ށ.ފީވަކު ގޮނޑުދޮށުން ގިނަ އަދަދެއްގެ ވެއްޔާ އަކިރި ނެގުމުގެ ޝަކުވާ އެ އެޖެންސީއަށް ލިބުނީ 7 އޮކްޓޫބަރު 2022ގައި ކަމަށެވެ.

އަދި މި މައްސަލައިގާ އެއެޖެންސީން ބެލިބެލުމާއި އެއްކުރެވުނު މައުލޫމާތަށް ބަލާއިރު ފީވަކު ކައުންސިލް އިދާރާގެ އިސްނެގުމުގެ މަތިން 25 ބަސްތާ ވެއްޔާއި 20 ބަސްތާ އަކިރި ފީވަކު ގޮނޑުދޮށުން ނަގާ ކުޑަކުދިން ކުޅޭ ޕާކެއް ތަރައްގީކުރުމަށްޓަކައި ބޭނުންކޮށްފައިވާކަން ސާބިތުވެފައިވާ ކަމަށް އީޕީއޭގެ ބަޔާނުގައިވެއެވެ.

އެހެންކަމުން، އެމައްސަލައިގައި އަށްޑިހަ ތިންހާސް ފައްސަތޭކަ ފަންސަވީސް (83,525) ރުފިޔާއިން ފީވަކު ކައުންސިލް ޖޫރިމަނާކޮށްފައިވާ ކަމަށްވެސް އީޕީއޭއިން ބުނެއެވެ. 

މިފައިސާ، ސަރުކާރު ބަންދު ދުވަސްތައް ހިމަނައިގެން 30 ދުވަހުގެ ތެރޭގައި ދެއްކުމަށް ފީވަކު ކައުންސިލް އިދާރާއަށް އީޕީއޭ އިން ވަނީ އަންގާފައެވެ.