ރައީސް ޞާލިހުގެ ކެމްޕޭނަށް ނުހައްގުން ވަސީލަތްތައް ބޭނުންކުރާ މައްސަލަ ބަލާނެކަމަށް އޭސީސީން ބުނެފައި ވާކަމަށް އިދިކޮޅު ކޯލިޝަނުން ބުނެފިއެވެ.

ރައީސް ޞާލިހުގެ ކެމްޕޭނަށް ސަރުކާރުގެ ވަސީލަތްތައް ބޭނުންކޮށް، ސްކޫލު ކުދިންނާއި ސިވިލް ސާވިސް މުވައްޒަފުން ނެރޭ ކަމަށާއި އަދިވެސް އެހެނިހެން ބައިވަރު މައްސަލަ އެބަހުރި ކަމަށް ބުނަމުން، އެ މައްސަލަތަކާއެކު މިއަދު އިދިކޮޅުން ވަނީ އޭސީސީއަށް ގޮސްފައެވެ.

އެ ބައްދަލުވުން ނިންމާލުމަށްފަހު އޭސީސީން ނުކުމެވަޑަގައިގެން މީޑިޔާއާ ވާހަކަ ދައްކަވަމުން މާވަށު ދާއިރާގެ މެމްބަރު އަދި ޕީއެންސީގެ ނައިބު ރައީސް މުހައްމަދު ސައީދު ވިދާޅުވީ ރައީސް ޞާލިހު ކެމްޕޭން ތަކަށް ވަޑައިގެންފައި ސްކޫލު ކުދިންނާއި އޮފީސް މުވައްޒަފުންނާއި ސިވިލް ސާވިސް މީހުން އަދި ކުންފުނިތަކުގެ މުވައްޒަފުންނަށް މަރުހަބާ ކިޔަން ނުކުންނަން ބުނާ މައްސަލަ ބަލާނެކަމަށް އޭސީސީން އަދި މިފަދަ މުއައްސަސާތަކުންވެސް ޔަގީން ދޭ ކަމަށެވެ.

Advertisement

"އެއީ ރައީސުލް ޖުމްހޫރިއްޔާ ވަޑައިގަންނަވަނީކީ ނޫން. ކެމްޕޭން ދަތުރުތަކުގަ މި ސަގާފަތް ކުރިއަށް ގެންދިއުން ހުއްޓާލަން އެންމެ ބޮޑަށް އަޅުގަނޑުމެން މި ވަކާލާތު ކުރަނީ އެންމެ ބޮޑަށް، ފެށުނީއްސުރެވެސް ކެމްޕޭންތަކަށް ރައީސުލް ޖުމްހޫރިއްޔާ ވަޑައިގެންފަ ސްކޫލު ކުދިން ނެރެ މަގުމަތީގައި ބައިތިއްބާ، މި ހުރިހާ ސަކަރާތް ނުޖަހާށޭ،" ސައީދު ވިދާޅުވިއެވެ.

މީގެ އިތުރުން ސައީދު ވިދާޅުވީ ރައީސް ޞާލިހު އެ ކުރައްވާ ދަތުރު ތަކަކީ އެމްޑީޕީގެ ޕްރައިމަރީގެ ކެމްޕޭނަށް ކުރައްވާ ދަތުރުތައް ކަމަށާއި އެ ދަތުރުގައި ހިނގާ މިފަދަ ކަންކަމާމެދު، އިދިކޮޅުން ބޭރު ގައުމުތަކަށް ދިއުމުން ބޭރުގެ ފަރާތްތައް އެ ވާހަކަ ދެއްކި ކަމަށެވެ. އަދި އޭސީއީއަށް ރިޕޯޓު ކުރަން އިރުޝާދު ދިން ކަމަށެވެ.

މިއަދު އޭސީސީގައި ބޭއްވި ބައްދަލުވުމަށްފަހު، އޭސީސީއާއެކު މަޝްވަރާ ކުރެވުނު ކަންތައްތަކާމެދު ބޭރުގައި ކަމާ ގުޅޭ ކޮންފަރެންސްއެއް ބާއްވާނެ ކަމަށް ސައީދު ވިދާޅުވިއެވެ.