އަންނަ ހޮނިހިރު ދުވަހު ބޭއްވުމަށް ހަމަޖެހިފައިވާ، އެމްޑީޕީގެ ރިޔާސީ ޕްރައިމަރީއާއި މެދު އިދިކޮޅު ކޯލިޝަންގެ އެއްވެސް ޝައުގުވެރި ކަމެއް ނެތް ކަމަށް ޕީޕީއެމްގެ ތަރުޖަމާނު ހީނާ ވަލީދު ވިދާޅުވެއްޖެ އެވެ. 

އިދިކޮޅު ކޯލިޝަނުން އެމްޑީޕީގެ ޕްރައިމަރީ ގަޑުބަޑު ކުރަން އުޅޭ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ތުހުމަތު ކުރެއްވުމާއި ގުޅިގެން އެކަމަށް ރައްދު ދެއްވައި ހީނާ ކުރެއްވި ޓްވީޓެއްގައި ވިދާޅުވީ، އެ ޕްރައިމަރީ އާއި މެދު އިދިކޮޅުގެ އެއްވެސް ޝައުޤުވެރިކަމެއް ނެތް ކަމަށެވެ. 

އަދި މިވަގުތު އިދިކޮޅުގެ ހުރިހާ ސަމާާލު ކަމެއް ދެެވިފައިވަނިީ ކުރީގެ ރައީސް، އަދި އިދިކޮޅު ކޯލިޝަންގެ ރިޔާސީ ކެންޑިޑޭޓް، ޔާމީން އަބްދުލްގައްޔޫމް އަށް ކުރި "ހަރާމް" ހުކުމުން އެމަނިކުފާނު މިނިވަން ކުރުމަށް ކަމަށްވެސް އޭނާ ވިދާޅުވި އެވެ. 

Advertisement

"އަޅުގަނޑުމެން ތައްޔާރުވަމުން މިދަނީ ރައީސް ޔާމީންގެ  ރިޔާސީ އިންތިޚާބުގެ ކެމްޕެއިންއަށް" ހީނާ ވިދާޅުވިއެވެ. 

ޕްރައިމަރީގެ ކެމްޕެއިނުގައި އއ. މާޅޮހަށް ވަޑައިގެން އެރަށު އެމްޑީޕީގެ މެންބަރުންނާއި ބައްދަލުކުރައްވާ ވާހަކަދައްކަވަމުން ރައީސް ސޯލިހު ވިދާޅުވީ ރިޔާސީ ޕްރައިމަރީގެ އިންތިހާބު އޮންނަ ދުވަސް ކުޑަތަންވެފައިވާއިރު ޕްރައިމަރީގެ ތެރޭގައި އެހެން ކުލަތަކެއް [ސިޔާސީ ޕާޓީތައް] ޖެހެމުން އަންނަ ކަމަށެވެ.

“ސާފުކޮށް އެމްޑީޕީ އަށް ވެރިކަމުގައި ދެމިތިބެ އޮތްކަން އެނގޭތީ، އެކަމަށް ހުރަސް އަޅަން އޮތް ކަންކަން އެބޭފުޅުން (އިދިކޮޅުން) އެ ކުރައްވަނީ. ކުރިޔަށް އޮތް ރިޔާސީ އިންތިހާބުގައި ކިރިޔާވެސް އެބޭފުޅުންނަށް ވާދަ ކޮށްލެވެން އޮތީ މީގެތެރެއަށް ވަދެ މި ގަޑުބަޑު ކޮށްގެން ކަމަށް ފެންނާތީ އެބޭފުޅުން ނިކުމެ އެތިބީ،” ރައީސް ސޯލިހު ވިދާޅުވިއެވެ.