މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ހުންނެވީ، ޕީޕީއެމްއިން ޖަހާފައިވާ ދަންތުރައެއްގައި ޖެހިވަޑައިގެންކަމަށް މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވެއްޖެއެވެ.

އިދިކޮޅުން އެމްޑީޕީގެ ރިޔާސީ ޕްރައިމަރީގެ ތެރެއަށް ނުފޫޒު ފޯރުވުމަށް މަސައްކަތްކުރާ ވާހަކަ އާއި ރައީސް ނަޝީދަށް ކެމްޕެއިންކޮށްދެމުންދާ ކަމަށް ތަކުރާރުކޮށް ރައީސް އިބްރާހިމް މުހައްމަދު ޞާލިހު ގެ ކެންޕެއިން ޓީމުން އަންނަނީ ތުހުމަތު ކުރަމުންނެވެ. 

އެގޮތުން ރައީސް ނަޝީދުގެ ކެމްޕެއިން ޓީމުން ކޮށްފައިވާ ފޮޓޯއެއް ރިޓުވީޓް ކުރައްވަމުން އެމްޑީޕީގެ އަންހެނުންގެ ރޫހުގެ ރައީސް ރޮޒައިނާވަނީ އެ ފޮޓޯއިން އެމްޑީޕީގެ މަރަދޫ ފޭދޫގެ މެމްބަރުން ކޮބައިތޯ ސުވާލު ކުރައްވާފައެވެ. އަދި އެ ފޮޓޯގައި ތިބި މީހުންގެ ތެރެއިން އެމްޑީޕީ މަރަދޫ ފޭދޫ ދާއިރާއަށް ނިސްބަތްވަނީ އެންމެ ދެތިން މީހުން ކަމަށް ވެސް އޭނާ ވިދާޅުވި އެވެ. 

"ޕީޕީއެމް މީހުންނަށް އެމްޑީޕީގެ އެތެރޭގެ އިންތިހާބަކު މިހާރު ވޯޓެއް ނުލެވޭނެ. ރައީސް ނަޝީދުގެ ދަތުރުފުޅުގައި މިފަހަރު މިފެންނަނީ ހުސް ޕީޕީއެމް މީހުން ނުކުމެ އުޅޭތަން." ރޮޒައިނާ ވިދާޅުވިއެވެ.

މީގެ އިތުރުން ރޮޒައިނާ ވަނީ، މިހާރު ކަންކަން ވަމުންދާ ގޮތާއިމެދު ރައީސް ނަޝީދު ވިސްނާވަޑައިގަތުން މުހިންމުކަމަށާ އަދި އެމްޑީޕީގެ މެމްބަރުންވެސް ފެންނަމުންދާ ކަންކަމާއިމެދު ފުންކޮށް ވިސްނާލައްވަންޖެހޭކަމަށެވެ.

އަދި ރައީސް ނަޝީދު ހުންނެވީ ރަނގަޅަށްވެސް ޕީޕީއެމްގެ ދަންތުރައެއްގައި ޖެހިވަޑައިގެންކަމަށްވެސް އެނާ ވިދާޅުވިއެވެ.

ރޮޒައިނާގެ އިތުރުން ރައީސް އިބްރާހިމް މުހައްމަދު ޞާލިހު ވެސް ވަނީ ޕީޕީއެމުން އެމްޑީޕީގެ ޕްރައިމަރީގައި ހަރަކާތްތެރިވަމުންދާ ކަމަށް ތުހުމަތު ކުރައްވާފައެވެ. އެހެން ނަމަވެސް އިދިކޮޅުން މިކަން ވަނީ ދޮގޮ ކޮށްފައެވެ. 

އެގޮތުން، ޕީޕީއެމްގެ ތަރުޖަމާނު ހީނާ ވަލީދު ވަނީ އެ ޕްރައިމަރީ އާއި މެދު އިދިކޮޅުގެ އެއްވެސް ޝައުޤުވެރިކަމެއް ނެތް ކަމަށް ވިދާޅުވެފައެވެ. 
އަދި މިވަގުތު އިދިކޮޅުގެ ހުރިހާ ސަމާާލު ކަމެއް ދެެވިފައިވަނިީ ކުރީގެ ރައީސް، އަދި އިދިކޮޅު ކޯލިޝަންގެ ރިޔާސީ ކެންޑިޑޭޓް، ޔާމީން އަބްދުލްގައްޔޫމް އަށް ކުރި "ހަރާމް" ހުކުމުން އެމަނިކުފާނު މިނިވަން ކުރުމަށް ކަމަށްވެސް އޭނާ ވިދާޅުވި އެވެ.