މި ސަރުކާރުން މަސައްކަތް ކުރަމުންދަނީ ކުރިއަށް އޮތް ރިޔާސީ އިންތިޚާބުގައި ސަރުކާރާއި ވާދަވެރި ސިޔާސީ ޕާޓީ އެކަހެރިކޮށް ބާކީ ކުރުމަށްކަމަށް އިދިކޮޅުން ބުނެފިއެވެ. 

އިދިކޮޅު ކޯލިޝަނުން މިފަދައިން ބުނެފައިވަނީ ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓު ރައީސް ޔާމީން އަބްދުލްގައްޔޫމު ޖަލަށް ލުމާއި ގުޅިގެން އިދިކޮޅުގެ ހުރި ކަންބޮޑުވުންތައް ބައިނަލްއަގުވާމީ ޖަމުއިއްޔާތަކާއި ހިއްސާކުރުމަށް ކުރަމުންދާ މަސައްކަތްތަކާއި ގުޅޭގޮތުން ބޭއްވި ނޫސްވެރިންގެ ބައްދަލުވުމުގަ އެވެ. 

އެގޮތުން އިދިކޮޅު އިއްތިހާދުގައި ހިމެނޭ ޕީއެންސީގެ ނައިބުރައީސް އަދި މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދު ވިދާޅުވީ ރައީސް ޔާމީނުގެ މައްޗަށް ވ އާރަށުގެ މުއާމަލާތާއި ގުޅުވާ ކޮށްފައިވަނީ ނުހައްގު ހުކުމެއް ކަމަށެވެ. އަދި އެއީ ސީދާ އެމަނިކުފާނަކީ ވާދަވެރި ސިޔާސީ ލީޑަރަށް ވީތީ ކުރާ އަނިޔާތަކެއް ކަމަށާއި، އެއީ ސަރުކާރު އަޑީގައި އޮވެގެން ދޭ އަނިޔާތަކެއް ކަމަށެވެ. 

Advertisement

އެއާއެކު ސައީދު ވިދާޅުވީ ރައީސް ޔާމީނަށް މި ސަރުކާރުން ކުރަމުންދާ އަނިޔާތައް ބައިނަލްއަގުވާމީ މުޖުތަމައުގެ ސަމާލުކަމަށް ގެނައުމަށް އިދިކޮޅުން ގިނަ މަސައްކަތްތަކެއް ކުރަމުންދާކަމަށެވެ. އެގޮތުން ދިވެހިރާއްޖޭގައި ހުންނަ ބޭރުގެ އެކި އެކި މިޝަންތަކާއި އިދިކޮޅުގެ ކަންބޮޑުވުންތައް ހިއްސާ ކުރެވިފައިވާކަން އޭނާ ފާހަގަކުރެއްވި އެވެ. 

ސައީދު ވިދާޅުވީ މި ސަރުކާރުން ހިންގަމުންދާ ޑިމޮކްރަސީއާއި ބީރައްޓެހި ކަންތައްތައް ދުނިޔެއަށް ފަޟީހަތް ވެގެން ދިއުމަކީ ޕީޕީއެމް-ޕީއެންސީ ކޯލިޝަނަށް ލިބޭ ކާމިޔާބީއެއް ކަމަށެވެ. 

އެގޮތުން އިންތިޚާބާއި ދެމެދު މި އޮތް ދުވަސްތަކަކީ ބޭރު ފަރާތްތަކުގެ ޕްރެޝަރާއި ފޮރިން މިނިސްޓްރީއިން ކުރިމަތިލާން ޖެހޭނެ ދުވަސްތަކަކަށް ވެގެންދާނެ ކަމަށާއި، ބޭރު ފަރާތްތަކުގެ ސުވާލުތަކަށް ޖާވާބު ނުދެއްވާ ހުންނަވަން ޚާރިޖީ ވަޒީރަށްވެސް އުނދަގޫފުޅު ވާނެކަމަށް ސައީދު ވިދާޅުވި އެވެ.