އެމްޑީޕީގެ ރައީސް މުހައްމަދު ނަޝީދުގެ ކެމްޕޭނު ޖަލްސާ ނިންމާލީ ސަލާމަތީ ނުރައްކަލެއް އޮތުމުން ކަމަށް ބައެއް ނޫސްތަކުން ރިޕޯޓުކުރަމުންދާ ޚަބަރު ދިވެހި ފުލުހުންގެ ޚިދުމަތުން ދޮގުކޮށްފި އެވެ.
އެކަމާއި ގުޅޭގޮތުން ދިވެހި ފުލުހުންގެ ޚިދުމަތުން ބުނީ ރައީސް ނަޝީދު ބޭއްވި ކެމްޕޭނު ޖަލްސާ ކުރުކޮށްލަން ޖެހޭފަދަ ސަލާމަތީ ނުރައްކަލެއް އޮތްކަމުގެ މައުލޫމާތު ފުލުހުންގެ ޚިދުމަތަށް ލިބިފައި ނުވާކަމަށެވެ. އަދި އެފަދަ މައުލޫމާތެއް ގައުމީ ދިފާއީ ބާރަށް ލިބިފައިވޭތޯ އެ މުއައްސަސާއިން ސާފުކުރުން އެފަދަ އެއްވެސް މައުލޫމާތެއް ލިބިފައި ނުވާކަން ދިފާއީ ބާރުންވެސް ކަށަވަރުކޮށްދީފައި ވާކަމަށް ފުލުހުން ވަނީ ބުނެފައެވެ.
އަދި ނަޝީދުގެ ޖަލްސާ ކުރުކޮށްލާފައިވަނީ ސަލާމަތީ ނުރައްކަލެއް އޮތުމާއި ގުޅިގެންކަމަށް ބައެއް ނޫސްތަކުން ރިޕޯޓުކޮށްފައި ވަނީ ފުލުހުންގެ ބަހެއް ހޯދުމާއި ނުލާކަންވެސް އެ އިދާރާއިން ވަނީ ހާމަކޮށްފައެވެ.
ނަޝީދުގެ ކެމްޕޭނު ނިންމަވާލެއްވުމަށް ބޭއްވި ޖަލްސާގެ މެދުތެރެއިން އެމަނިކުފާނު ޖަލްސާ މާލަން ދޫކުރައްވާ ވަޑައިގެންފައިވާއިރު، ނަޝީދުގެ ފަރާތްޕުޅުން މައުލޫމާތުދެއްވި އެމްޑީޕީގެ މެމްބަރަކު ވިދާޅުވީ ޖަލްސާ ކުރިއަށް ގެންގޮސްފައިވަނީ ކުރިންވެސް ޕްލޭނު ކުރެވިފައިވާ ގޮތަށް ކަމަށެވެ.
ޖަލްސާ އަވަސްކޮށް ނުވަތަ ކުރުގަޅުވާލާފައި ނުވާކަމަށް އެބޭފުޅާ ވިދާޅުވިއެވެ. އެހެން ނަމަވެސް ޖަލްސާ ނިމުމުގެ ކުރިން ނަޝީދު ވަޑައިގެންނެވި ސަބަބެއް އެ ބޭފުޅާ ހާމަކުރައްވާފައެއް ނުވެއެވެ.
Advertisement
This content is created and paid for by advertisers and does not involve Voice Journalists
