ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަކީ ވިޝަނަރީ ބޭފުޅެއް ކަމަށް ވިދާޅުވުމުން، އެމަނިކުފާނާއި ޕްރައިމަރީގައި ވާދަކުރައްވާ އެމްޑީޕީގެ ރައީސް މުހައްމަދު ނަޝީދާއި އެމަނިކުފާނަށް ތާއީދު ކުރައްވާ މީހުންނަށް "ހަޖަމެއް" ނުވި ކަމަށް މަރަދޫ ދާއިރާގެ މެންބަރު އިބްރާހީމް ޝަރީފް (މަވޯޓާ ޝަރީފް) ވިދާޅުވެއްޖެއެވެ.
ރައީސް ޞާލިހް ގެ ޕްރައިމަރީ ކެންޕެއިން ޖަލްސާ ނިންމާލުމުގެ ގޮތުން ރޭ އައްޑޫ ސިޓީގައި ބޭއްވި ޖަލްސާގައި ވާހަކަ ދައްކަވަމުން ޝަރީފް ވަނީ، މިދިޔަ ފަސް އަހަރުގެ ތެރޭގައިވެސް ރައީސް ޞާލިހާއި އެއް ފެންވަރަށް ވިޝަނަރީ ލީޑަރެއް، ރާއްޖެ އެކަންޏެއް ނޫން، ދުނިޔޭގައި ވެސް ނެތް ކަމަށެވެ.
އެކަމާއި ގުޅިގެން ރައީސް ނަޝީދަށް ތާއީދު ކުރައްވާ ބައެއް މެންބަރުން އަންނަނީ މީސްމީޑިއާގެ އެކި ޕްލެޓްފޯމް ތަކުގައި ޝަރީފަށް ފާޑުވިދާޅުވަމުންނެވެ.
އެވާހަކަތަކަށް ރައްދު ދެއްވައި ޝަރީފް މިއަދު ކުރެއްވި ޓްވީޓެއްގައި ވިދާޅުވީ، ރޭގެ ޖަލްސާއިން ރައީސް ނަޝީދާއި އެމަނިކުފާނުގެ ޓީމަށް އެންމެ ފުން އަސަރެއް ކުރީ، ރައީސ ޞާލިހަކީ ވިޝަނަރީ ބޭފުޅެއް ކަމަށް އޭނާ ވިދާޅުވުމުން ކަމަށެވެ.
އަދި އެކަން ހަޖަމު ނުވެގެން ގްރޫޕްތަކުގައި ވެސް ރައީސް ނަޝީދު ލިޔުއްވަމުން ގެންދަވާ ކަމަށް ޝަރީފް ވިދާޅުވިއެވެ.
އެމްޑީޕީގެ ރިޔާސީ ޕްރައިމަރީ މާދަމާ ބާއްވަން ހަމަޖެހިފައިވާއިރު، ޕްރައިމަރީގައި ވާދަކުރައްވާ ރައީސް ނަޝީދާއި ރައީސް ޞާލިހް ގެ ފަރާތުންވެސް ފޯރިގަދަ ކެންޕެއިން ހަރަކާތްތަކެއް ވަނީ ފެނިގެން ގޮސްފައެވެ.
އަދި މި އިންތިހާބު ބޮޑުތަނުން ކާމިޔާބު ކުރައްވާނެ ކަމަށް އެ ދެ ބޭފުޅުން ވެސް ވިދާޅުވަމުން އަންނައިރު، މި އިންތިހާބުގެ ނަތީޖާ އަކީ އެމްޑީޕީގެ ކުރިމަގަށް މުހިންމު ނަތީޖާ އަކަށް ވެގެންދާނެ ކަމަށް ސިޔާސީ ތަޖުރިބާކާރުން ބުނެއެވެ.
Advertisement
This content is created and paid for by advertisers and does not involve Voice Journalists
