ޕްރޮގްރެސިވް ކޮންގްރެސް ކޯލިޝަނުން ބާއްވާ އެތެރޭގެ އިންތިޚާބުތައް ބަލައިގެން މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ޑިމޮކްރަސީއަކީ ކޮންއެއްޗެއްކަން ފުރަތަމަ ދަސްކުރުމަށް އިދިކޮޅު އިއްތިހާދުގައި ހިމެނޭ ޕީއެންސީގެ ރައީސް އަބްދުއްރަހީމް ގޮވާލައްވައިފި އެވެ. 

މިއަދު އެމްޑީޕީގެ ރިޔާސީ ޕްރައިމަރީގެ ވޯޓުލުން މުޅި ރާއްޖޭގައި ކުރިއަށް ގެންގޮސްފައިވާއިރު، ބޮޑެތި ހަމަނުޖެހުންތަކާއި ތަޅާފޮޅުންތައް ވަނީ އުފެދިފައެވެ. ބައެއް ސަހަރައްދުތަކުގައި ބަހައްޓާަފައި ހުރި ވޯޓު ފޮށިތައް ފަޅާލާ އެކި ވަރުގެ ގެއްލުންތައް ދީފައިވާއިރު، އެ މައްސަލަތަކާއި ގުޅިގެން 3 މީހަކު ވަނީ ހައްޔަރުވެސް ކޮށްފައެވެ. 

އެމްޑީޕީއަކީ ޒަމާނީ ޑިމޮކްރަސީ ރާއްޖެއަށް ތައާރަފްކުރީ އެ ޕާޓީއިން ކަމަށް ދައުވާކުރަމުން އަންނަ ސިޔާސީ ޕާޓީއަކަށް ވެފައި، އެ ޕާޓީއިން އަބަދުވެސް އަމަލުކުރަމުންދަނީ ޑިމޮކްރަސީގެ ރީތި އުސޫލުގެ ތެރެއިންކަމަށް ބުނަމުންދާއިރު، މި އިންތިޚާބުގައި ފެންނަމުންދާ މަންޒަރުތަކާއި ގުޅިގެން އަދުރޭ ވަނީ ބަހުގެ ހަމަލާތަކެއް އެމްޑީޕީއަށް ރައްދުކޮށްފަ އެވެ. 

Advertisement

އެގޮތުން އަދުރޭ ވިދާޅުވީ އެމްޑީޕީގެ ރިޔާސީ ޕްރައިމަރީއާއި އެ ޕާޓީއިން އެ ތައާރަފު ކުރީ މުޅިން އާ ވައްތަރެއްގެ ޑިމޮކްރަސީއެއްކަމަށެވެ. 

އެމްޑީޕީއަށް މަލާމާތުގެ ބަސްތައް ރައްދުކުރައްވާ އަދުރޭ ކުރެއްވި ޓްވީޓުގައި ވަނީ އެމްޑީޕީގެ އެތެރޭގެ އިންތިޚާބުގައި ހަމަނުޖެހުން ހިންގާ ވީޑިއޯއަކާއި، ޕީޕީއެމްގެ އެތެރޭގެ އިންތިޚާބުގައި ނަގާފައިވާ ފޮޓޯއެއް ހިއްސާކުރައްވާފައެވެ. 

ދެ ފޮޓޯއިން ފެނިގެންދާ މަންޒަރުތައް ބަލާ ދިރާސާކޮށް، އެތެރޭގެ އިންތިޚާބުތައް ޑިމޮކްރަސީގެ އުސޫލުން ކުރިއަށް ގެންދަންވީ ގޮތުގެ ފިލާވަޅުތައް މިއަދު އެމްޑީޕީއިން ޕީޕީއެމްގެ ފަރާތުން ދަސްކުރަން ޖެހޭކަމަށް އަދުރޭ ވިދާޅުވިއެވެ.