މިއަދު ކުރިއަށް ދިޔަ އެމްޑީޕީގެ ރިޔާސީ ޕްރިމައިރީގެ ވޯޓުގައި ހިނގައިދިޔަ ކަންތަކަށް އެކަނި ބަލާލިޔަސް، މި ގައުމު މިހާރު މި އޮތް ހާލަތު ހަމަޔަކަށް އެޅުވޭނެ ހަމައެކަނި ސިޔާސީ ލީޑަރަކީ ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމުކަން އެނގިގެންދާކަމަށް ޕީޕީއެމްގެ ނައިބުރައީސް އަދި މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމު ވިދާޅުވެއްޖެ އެވެ.

ޝިޔާމު މިފަދައިން ވިދާޅުވެފައިވަނީ އެމްޑީޕީގެ އެތެރޭގެ އިންތިޚާބުގައި ހިނގައިދިޔަ ކަންކަމަށް ފާޑުވިދާޅުވެ ކުރެއްވި ޓްވީޓެއްގައެވެ. 

އެމްޑީޕީގެ އެތެރޭގެ އިންތިޚާބު ކުރިއަށް ދިޔައިރު، ވޯޓު ގަނޑުބަޑުކުރުމަށް މަސައްކަތް ކުރާކަމުގެ ގިނަ ތުހުމަތުތަކެއް ރައީސް މުހައްމަދު ނަޝީދާއި އެމަނިކުފާނުގެ ޓީމުން ދިޔައީ އަމާޒުކުރައްވަމުންނެވެ. އަދި ގަވައިދާއި ޚިލާފު ކަންތައްތަކެއް ވޯޓުލާ މަރުކަޒުތަކުގައި ހިނގަމުން ދިއުމާއި ގުޅިގެން ބައެއް ސަރަހައްދުތަކުގައި މަޝްރަހު ހޫނުވެ ހަމަނުޖެހުންތައް ވަނީ ހިނގާފައެވެ. 

Advertisement

އެކަންކަން ފާހަގަކުރައްވާ ޝިޔާމު ކުރެއްވި ޓްވީޓެއްގައި ވިދާޅުވީ އެމްޑީޕީގެ އެތެރޭގެ އިންތިޚާބުގައި މިއަދު ފެނުނީ ޑިމޮކްރަސީ އުތުރި އެރި މަންޒަރުކަމަށެވެ. ޑިމޮކްރަސީ ހޯދަން އެމްޑީޕީއިން 17 އަހަރު ކުރި ދިގު ދަތުރުން ދަސްވި ކަމަކީ އެތެރޭގެ އިންތިޚާބުތައް ގަނޑުބަޑުކޮށް ހަމަނުޖެހުން އުފެއްދުން ކަމަށްވާނަމަ ހިތާމަ ކުރައްވާކަމަށް ޝިޔާމު ވިދާޅުވިއެވެ. 

އެއާއެކު އޭނާ ވިދާޅުވީ، މިއަދު ހިނގައިދިޔަ ކަންތައްތަކަށް ބަލާއިރު ގައުމު ހަމަމަގަށް އެޅުވޭނެ ފިކުރަކީ ޕީޕީއެމްގެ ފިކުރުކަން އެނގިގެން ދާކަމަށެވެ. އަދި އެ ފިކުރާއެކު، ގައުމު ހަމަމަގަށް އެޅުވޭނެ ހަމައެކަނި ސިޔާސީ ލީޑަރަކީ ރައީސް ޔާމީންކަން އެނގިގެންދާކަމަށް އޭނާ ވިދާޅުވިއެވެ. 

އެމްޑީޕީއިން އެތެރޭގެ އިންތިޚާބު އިއުލާނުކޮށްފައިވަނީ ވާދަވެރި ސިޔާސީ ލީޑަރު ރައީސް ޔާމީންގެ މައްޗަށް ކްރިމިނަލް ކޯޓުން 11 އަހަރުގެ ޖަލު ހުކުމެއް ކުރުމާއި ގުޅިގެން ޖަލަށް ވަޑައިގަތް ފަހުންނެވެ. 

އެމަނިކުފާނުގެ މައްޗަށް ކުރި ހުކުމަކީ ސިޔާސީ ހުކުމެއްކަމަށާއި، އިންތިޚާބުތަކާއި ދިމާކޮށް ރައީސް ޔާމީން ޖަލުގައި ބަންދުކުރުމަކީ މި ސަރުކާރުގެ ސަގާފަތެއްކަމަށް އިދިކޮޅުން ދަނީ ބުނަމުންނެވެ. އަދ ވ އާރަށުގެ މައްސަލައާއި ގުޅިގެން އެމަނިކުފާނުގެ މައްޗަށް އުފުލާފައިވާ ދައުވާތަކާއި ގުޅޭ މައްސަލަ އަވަސްކޮށް ހުކުން ކުރީ އެމްޑީޕީގެ ރިޔާސީ ޕްރައިމަރީއާއި ގުޅިގެންކަމަށް އިދިކޮޅުން ދަނީ ތުހުމަތު ކުރަމުންނެވެ.