މިއަދު ކުރިއަށްދިޔަ އެމްޑީޕީގެ ރިޔާސީ ޕްރައިމަރީ އަކީ ކޮރަޕްޝަނާ ފަސާދައިގެ ގުންޑާ އިންތިހާބެއް ކަމަށް ރައްޔިތުންގެ މަޖިލިހުގެ މާފަންނު މެދު ދާއިރާގެ އެމްޑީޕީގެ މެމްބަރު އިބްރާހިމް ރަޝީދު (ބޮންޑެ) ވިދާޅުވެއްޖެއެވެ.

އެމްޑީޕީގެ ރިޔާސީ ޕްރައިމަރީގައި ރައީސް ޞާލިހު ކުރި ހޯއްދެވުމުން ބޮންޑަ ކުރެއްވި ޓުވީޓެއްގައި ވިދާޅުވީ ރައީސް ނަޝީދަށް ތާއީދުކުރާ 39000 މެމްބަރުން ޕާޓީން ބޭރުކޮށްް އަދި ބައެއް މެމްބަރުން އެކިޕާޓީތަކަށް އަރުވާލުމައްފަހު ބޭއްވި މި ހަޑިމުޑުދާރު އިންތިހާބު, ޑިމޮކްރަސީއަށް ލޯބިކުރާ އެއްވެސް ދިވެހި ރައްޔިތަކު ބަލައި ނުގަންނާނެ ކަމަށެވެ.

އަދި މިއީ ކޮރަޕްޝަނާ ފަސާދައިގެ ގުންޑާ އިންތިހާބެއް ކަމަށް ބޮންޑެ ވިދާޅުވިއެވެ.

ބޮންޑެ މިހެން ވިދާޅުވެފައި ވާއިރު، އެމްޑީޕީގެ ދަފުތަރުން 39،000 އަށް ވުރެ ގިނަ މެމްބަރުން ވަކިކޮށްފައިވާ ކަމަށާއި އެއީ ރައީސް އިބްރާހިމް މުހައްމަދު ޞާލިހަށް ވޯޓު ނުދޭނެ ކަމަށް ހީވާ މެމްބަރުން ކަމަށް ޕްރައިމަރީގައި ވާދަކުރެއްވި ކުރީގެ ރައީސް މުހައްމަދު ނަޝީދު ވަނީ މީގެ ކުރިން ތުހުމަތު ކުރައްވާފައެވެ.

"އެމްޑީޕީއަކީ މިނިވަން އަދި އިންސާފުވެރި އިންތިހާބުތައް ބާއްވާ ޕާޓީއެއް. އެކަން ކުރެވޭނީ ކުރިން އިއުލާންކޮށްފައި އޮތް ވޯޓު ލެވޭ މީހުންގެ ލިސްޓު އޮވެގެން،" ނަޝީދު އޭރު ވިދާޅުވިއެވެ.

މި ތުހުމަތާ ގުޅިގެން އެމްޑީޕީން އޭރު ނެރުނު ނޫސްބަޔާނުގައި ބުނެފައި ވަނީ ދަފްތަރު ސައްހަކުރީ އެ ޕާޓީގެ ގައުމީ މަޖިލީހުން ކަމަށެވެ. އަދި ދަފްތަރު އޮތީ ޕާޓީގެ އަސާސީ ގަވާއިދާއި ގައުމީ މަޖިލީހުގެ ނިންމުންތަކާ އެއްގޮތްވާ ގޮތުގެ މަތިން އެކުލަވާލާފައި ކަމަށެވެ.