ޕީޕީއެމްގެ އެތެރޭގެ އިންތިޚާބު ބާއްވަންވެސް ސުކޫލުތައް ދީފައިވާކަން ހާމަކޮށްދިނުމަށް އެޑިއުކޭޝަން މިނިސްޓަރު ޑރ. އައިޝަތު އަލީ ޓްވީޓާގައި ހިއްސާ ކުރީ މީގެ އަހަރުތަކެއް ކުރިން ނަގާފައިވާ ވީޑިއޯއެއްކަން ހާމަވެއްޖެ އެވެ.
އެމްޑީޕީގެ ރިޔާސީ ޕްރައިމަރީގެ ވޯޓުލުން ސުކޫލުތަކުގައި ކުރިއަށް ގެންގޮސްފައިވާއިރު، ޕީޕީއެމްގެ ދާއިރާތަކުގެ ރައީސުން ހޮވުމަށް ބޭއްވި އެތެރޭގެ އިންތިޚާބު ކުރިއަށް ގެންދިއުމަށް ސުކޫލުތައް ދީފައި ނުވާކަން ފާހަގަކޮށް ޕީޕީއެމްގެ ސެކެޓްރީ ޖެނެރަލް މުހައްމަދު ތަލާލު ވަނީ އެޑިއުކޭޝަން މިނިސްޓަރަށް ފާޑުވިދާޅުވެފައެވެ.
"ޕީޕީއެމްގެ އެތެރޭގެ އިންތިޚާބު ބާއްވަން ސުކޫލުތައް ހޯދަން އެދުމުން އެޑިއުކޭޝަން މިނިސްޓްރީއިން އެންމެ ސުކޫލެއްވެސް ޕީޕީއެމްއަށް ދޫކޮށްފައެއް ނުވޭ. މިއަދު މި ފެންނަނީ އެމްޑީޕީގެ އިންތިޚާބުގައި ރާއްޖޭގެ ހުރިހާ ސުކޫލެއް ބޭނުންކުރަމުން ދާތަން"
ޕީޕީއެމްގެ ސެކެޓްރީ ޖެނެރަލް މުހައްމަދު ތަލާލު
ތަލާލުގެ އެ ޓްވީޓާއި ގުޅިގެން އެޑިއުކޭޝަން މިނިސްޓަރު ޑރ އައިޝަތު އަލީ ވަނީ ޕީޕީއެމްގެ ގެ އެތެރޭގެ އިންތިޚާބެއް އިސްކަންދަރު ސުކޫލުގައި ކުރިއަށް ގެންދާތަން ފެނިގެންދާ ވީޑިއޯއެއް ހިއްސާކުރައްވާފަ އެވެ.
އެއާއެކު އެކަމަނާ ވިދާޅުވީ ތަލާލު ހެއްދެވީ އިތުރުފުޅެއް ކަމަށެވެ. ޕްރައިމަރީއާއި، ސެނެޓު ހޮވުމާއި ކޮންގްރެސް ބޭއްވުންފަދަ ހަރަކާތްތައް ބޭއްވުމަށް ހުރިހާ ސިޔާސީ ޕާޓީތަކަށްވެސް ސުކޫލުތައް ދޫކުރާކަމަށް މިނިސްޓަރު ވިދާޅުވިއެވެ. އެހެން ނަމަވެސް ކެމްޕޭނު ހަރަކާތްތަކާއި އެހެނިހެން ސިޔާސީ ހަރަކާތްތައް ބާއްވަން އެއްވެސް ސިޔާސީ ޕާޓީއަކަށް ސުކޫލުތައް ދީފައި ނުވާނެކަމަށް މިނިސްޓަރު ވިދާޅުވިއެވެ.
މިނިސްޓަރުގެ އެ ޓްވީޓާއި ގުޅިގެން ޕީޕީއެމްގެ އެސްޖީ ތަލާލު ވިދާޅުވީ، މިނިސްޓަރު ހިއްސާކުރައްވާފައިވާ ވީޑިއޯއަކީ މީގެ އަހަރުތަކެއް ކުރީގެ ވީޑިއޯއެއްކަމަށެވެ.
ޕީޕީއެމުން އެންމެ ފަހުން ބޭއްވި ދާއިރާ އިންތިޚާބު ބޭއްވުމަށް ސުކޫލުތައް ހަމަޖައްސައިދިނުމަށް ފޮނުވި ސިޓީއަށް މިހާތަނަށްވެސް ލިޔުމުން ޖަވާބު ދީފައި ނުވާކަމަށާއި، މިނިސްޓްރީއިން ފޯނުން ގުޅުމަށްފަހު ސުކޫލުތައް ދެވެން ނެތް ވާހަކަ އެންގި ކަމަށް ތަލާލު ވިދާޅުވި އެވެ.
"ތިޔައީ މާ ކުރީގެ ވީޑިއޯއެއް. ޕީޕީއެމް އެންމެ ފަހުން ބޭއްވި ދާއިރާ އިންތިޚާބު އަދި ޕީޕީއެމް ސެނެޓު ހޮވުމަށް ބޭއްވި އިންތިޚާބު ބާއްވަން ސުކޫލުތައް ހޯދަން ފޮނުވާފައިވާ ސިޓީތަކުގެ ޖަވާބުވެސް ފޮނުވާފައެއް ނުވޭ. އަނގަބަހުން ގުޅާފަ ބުނީ ސިޔާސީ ކަންކަމަށް ސިޔާސީ ކަންކަމަށް ސުކޫލުތައް ދޫނުކުރާނެކަމަށް. ހަނދުމަފުޅު ނެތީތޯ؟"
ޕީޕީއެމްގެ ސެކެޓްރީ ޖެނެރަލް މުހައްމަދު ތަލާލު
އެންމެ ފަހުން ޕީޕީއެމުން ބޭއްވި ދާއިރާ ރައީސުން ހޮވާ އިންތިޚާބުގެ ތެރެއިން
އެންމެ ފަހުން ޕީޕީއެމުން ބޭއްވި ދާއިރާ ރައީސުން ހޮވާ އިންތިޚާބު ބާއްވާފައިވަނީ ހެންވޭރު ދަނޑުގައި ޓެންޓުތަކެއް ޖަހައިގެންނެވެ. އަދި ޕީޕީއެމް ސެނެޓު ހޮވުމަށް ބޭއްވި އިންތިޚާބު ކުރިއަށް ގެންދިޔައީ ޕާޓީގެ މައި އޮފީހުގައެވެ.
ޕީޕީއެމުން ގެންދަނީ ސިޔާސީ ޕާޓީތަކުގެ މެދުގައި ތަފާތުކުރުންތައް ގެންގުޅޭކަން ފާހަގަކޮށް ބޮޑެތި ކަންބޮޑުވުންތަކެއްވެސް ހިއްސާކުރަމުންނެވެ. އަދި ވަކި ސިޔާސީ ޕާޓީއަކަށް ވީތީ އިންތިޚާބު ބާއްވަން ސުކޫލުތައް ނުދޭ މައްސަލަ އޭސީސީއިން ބަލައިދިނުމަށް ވެސް އިދިކޮޅުން ވަނީ އެދިފައެވެ.
Advertisement
This content is created and paid for by advertisers and does not involve Voice Journalists
