ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ބަދަލުވަމުން އެދަނީ ޑިކްޓޭޓަރަކަކަށް ކަމަށް ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތާރިގު ވިދާޅުވެއްޖެ އެވެ. 

ތާރިގު މިފަދައިން ވިދާޅުވެފައި ވަނީ އެމްޑީޕީގެ ރިޔާސީގެ ޕްރައިމަރީގެ ވޯޓު ގަނޑުބަޑުކޮށްފައިވާކަން ފާހަގަކުރައްވާ ކުރެއްވި ޓްވީޓެއްގައެވެ. 

ރިޔާސީ ޕްރައިމަރީ ޑަބަލް ޑިޖިޓުގެ ތަފާތަކުން މޮޅުވާނެކަމުގެ ޔަގީންކަން ރައީސް ޞާލިހު މާކުރިން ދެއްވާފައިވާއިރު، ރައީސް ޞާލިހުގެ އެ ވާހަކަތަކަށްވެސް ތާރިގު ވަނީ ރައްދުދެއްވާފަ އެވެ. އެގޮތުން ތާރިގު ވިދާޅުވީ އެ ވިދާޅުވީ "ޑަބަލް ޑިޖިޓު" ފެނުނީ ގޭގެއަށް ބެހި (ފައިސާ) ބޮނޑި ބޮނޑިން ކަމަށެވެ. 

Advertisement

އޭގެ އިތުރުން ތާރިގު ވިދާޅުވީ އެތެރޭގެ އިންތިޚާބު ގަނޑުބަޑުކޮށްގެން ރިޔާސީ ޓިކެޓު ހޯއްދެވުމުން، މި އިންތިޚާބުގައި ރައީސް ޞާލިހާއި ވާދަކުރެއްވި މުހައްމަދު ނަޝީދު ކުރިއަށް އޮތް ރިޔާސީ އިންތިޚާބުގައި ޞާލިހުގެ ފަހަތަށް އަރާވަޑައިގަންނަވަން ޖެހޭ އެއްވެސް ސަބަބެއް ނެތް ކަމަށެވެ. 

މީގެ ކުރިން ނާ އިންސާފާއި، ކުޑަކާފާއި ދެކޮޅަށް ވަކާލާތު ކުރި ޕާޓީގެ އެތެރޭގެ އިންތިޚާބުން ފެނުނީ ވަރަށް ހުތުރުކަންތައްތަކެއް ކަމަށް ތާރިގު ވިދާޅުވިއެވެ. 

ދުނިޔޭގައި ފާހަގަކޮށްލެވޭ ޚުދުމުހުތާރު ބައެއް ލީޑަރުންގެ މިސާލުތައްވެސް ނަންގަވަމުން ތާރިގު ވިދާޅުވީ ރައީސް ޞާލިހުވެސް މިހާރު ބަދަލުވަމުންދަނީ އެފަދަ ޚުދުމުހުތާރު ލީޑަރަކަށް ކަމަށެވެ. 

އެމްޑީޕީގެ އެތެރޭގެ އިންތިޚާބު ރައީސް ޞާލިހު އަޑީގައި ހުންނަވާ ގަޑުބަޑުކޮށްފައިވާކަމަށް މި އިންތިޚާބުގައި އެމަނިކުފާނާއި ވާދަކުރެއްވި ނަޝީދާއި، އޭނާގެ ވަފާތެރިން ތުހުމަތުކުރައްވަމުން ދާއިރު، ރައީސް ޞާލިހު 2018 ވަނަ އަހަރު ވެރިކަމަށް ވަޑައިގަތީވެސް އިންތިޚާބު އޮޅުވާލައިގެންކަމަށް އިދިކޮޅުން ގެންދަނީ ކެނޑިނޭޅި ތުހުމަތު ކުރަމުން ނެވެ.