މާތް الله ގެ ވާގިފުޅާއެކު މިހާރު ވެރިކަން ކުރަމުން މިދާ ކޯލިޝަން ސަރުކާރު ކުޑަކަކުލަށް ތިރިކުރާނެކަމަށް ޕީޕީއެމްގެ ނައިބުރައީސް އަދި މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމު ވިދާޅުވެއްޖެ އެވެ. 

ޕީޕީއެމް އޮފީސް ދޮރުމަތީގައި އޮތް ޖަލްސާއެއްގައި ވާހަކަދައްކަވަމުން ޝިޔާމު ވިދާޅުވީ މި ސަރުކާރުގެ ޚުދުމުހުތާރުކަމާއި އަނިޔާވެރިކަން މިހާރު ހައްދުން ނައްޓާފައިވާކަމަށެވެ. 

މިއަދު ޕީޕީއެމް އަކީ ވާދަވެރި ޕާޓީއަށް ވުމުން ކުރަން ޖެހޭ މަސައްކަތަކީ ސަރުކާރު ޖަވާބުދާރީ ކުރުވުން ކަމަށް ވާއިރު، ވާދަވެރި ސިޔާސީ ލީޑަރަށް އެ ޒިންމާ އަދާ ނުކުރެވޭގޮތަށް ހުންނެވީ ހުރަގެއަށްލާފައިކަމަށް ޝިޔާމު ވިދާޅުވިއެވެ. އަދި މިއަދު އެމަނިކުފާނުގެ ފަރާތްޕުޅުން އެ މަސައްކަތް ކުރަންޖެހިފައި އޮތީ ޕާޓީގެ ލީޑާޝިޕާއި އާންމު މެމްބަރުންނަށް ކަމަށް ޝިޔާމު ވިދާޅުވިއެވެ. 

Advertisement

އެވާހަކައާއި ގުޅުވާ ޝިޔާމު ވިދާޅުވީ އިދިކޮޅުގެ އަޑު ކަނޑުވާލުމަށް އިދިކޮޅުގެ މުޒާހަރާތަކުގައި ބައިވެރިވާ ފަރާތްތަކަށް ފުލުހުން މެދުވެރިކޮށް މިހާރަށްވުރެވެސް ބޮޑެތި އަނިޔާތައް ދިނުމަށް ރައީސް ޞާލިހު އަމުރުކުރައްވާ ކަމަށެވެ. 

އެހެން ނަމަވެސް ބައިވެރިންނަށް އަނިޔާކުރަން އެފަދަ ފުރުސަތު ނުދެއްވާނެކަމަށާއި، މި ސަރުކާރު ކުޑަކަކުލަށް ތިރިކުރާނެކަމަށް ޝިޔާމު ވިދާޅުވިއެވެ. 

ޝިޔާމު އިތުރަށް ވިދާޅުވީ ފެބުރުއަރީ މަހު މަޖިލީސް ފެށުމާއެކުވެސް މި ސަރުކާރު ޖަވާބުދާރީ ކުރުވުމުގެ މަސައްކަތް އިތުރު ގިރައަކަށް ލައިގެން ކުރިއަށް ގެންދާނެކަމުގެ ޔަގީންކަން ދޭ ކަމަށެވެ.

އެގޮތުން ސަރުކާރުގެ މާލިއްޔާއަށް ޚިޔާނާތްތެރިވާ ފަރާތްތަކަށް ދެން އިތުރަށް އެކަން ކުރުމުގެ ފުރުސަތު ނުދެއްވާނެކަމަށް ޝިޔާމު ވިދާޅުވިއެވެ. 

އޭގެ އިތުރުން ޝިޔާމު ވަނީ ރައީސް ޔާމީން މިނިވަންކުރުމަށް ކުރެވޭ މަސައްކަތްތައް މިހާރަށްވުރެ ފުޅާކޮށް ކުރިއަށް ގެންދިއުމަށް ރައްޔިތުންނަށް އިލްތިމާސްކުރައްވާފަ އެވެ.