ފުލުހުން އެންގިޔަސް ވާދަވެރި ސިޔާސީ ލީޑަރު ރައީސް ޔާމީން އަބްދުލްގައްޔޫމުގެ މައްޗަށް މިދިޔަ ޑިސެމްބަރު މަހު ކްރިމިނަލް ކޯޓުން ކުރި 11 އަހަރުގެ ޖަލު ހުކުމަކީ "ހަރާން ހުކުމެއް" ކަަމަށް ކިޔުން ހުއްޓާނުލާނެކަމަށް އިދިކޮޅު ކޯލިޝަންގެ އެކްޝަން ޑިޕާޓުމަންޓުގެ ޗެއާ އަދި މަޖިލީހުގެ ހޯރަފުށީ ދާއިރާގެ ކުރީގެ މެމްބަރު މުހައްމަދު އިސްމާއިލް ވިދާޅުވެއްޖެ އެވެ.
މުހައްމަދު އިސްމާއިލް މިފަދައިން ވިދާޅުވެފައިވަނީ ޕީޕީއެމް އޮފީސް ދޮރުމަތީގައި އޮތް ޖަލްސާއެއްގައި ވާހަކަދައްކަވަމުން ނެވެ.
"ބުންވަރު" ގެ ނަމުގައި އިދިކޮޅުން އަންނަ ހުކުރު ދުވަހު ފުރަމާލޭގައި މުޒާހަރާއެއް ކުރަން ނިންމާފައިވާއިރު، އެ މުޒާހަރާގައި ހަރާން ހުކުން އެ ޝިއާރު ބޭނުން ނުކުރުމަށް ފުލުހުން އަންގާފައިވާކަމަށް މުހައްމަދު އިސްމާއިލް ވިދާޅުވިއެވެ. އެއީ ހަރާން ހުކުން ކިޔުން ހުއްޓުވުމަށް ޖޭއެސްސީއިން އަންގާފައިވާތީކަންވެސް އޭނާ ފާހަގަކުރެއްވި އެވެ.
އެއާއެކު މުހައްމަދު އިސްމާއިލް ވިދާޅުވީ ރައީސް ޔާމިންގެ މައްޗަށް ނުހައްގުން ހުކުމެއް ކުރުމުން ރައްޔިތުންގެ ޝުއޫރުތައް ފާޅުކުރާނެކަމަށެވެ. އަދި ރައްޔިތުން ޝުއޫރުފާޅުކުރަނީ ގާނޫނު އަސާސީއިން ލިބިދޭ ހައްގުގެ ބޭނުން ހިފައިގެންކަމަށް އޭނާ ވިދާޅުވިއެވެ.
އޭގެ އިތުރުން މުހައްމަދު އިސްމާއިލް ވިދާޅުވީ އިދިކޮޅުން ބާއްވާ ހަރަކާތްތަކަކީ ސުލްހަވެރިކަމާއެކު ބާއްވާ ހަރަކާތްތަކެއްކަމަށެވެ. އެ ހަރަކާތްތަކުގައި ފުލުހުންގެ އަމުރުތަކަށް ފުރިހަމަޔަށް ބޯލަނބާ ކަމަށާއި، އެހެން ނަމަވެސް ފުލުހުން އެންގިޔަސް ހަރާން ހުކުން ކިޔުން އިދިކޮޅުން ހުއްޓާނުލާނެކަމަށް މުހައްމަދު އިސްމާއިލް ވިދާޅުވި އެވެ.
"އަޅުގަނޑުމެންގާތުގައި ފުލުހުން ދެންނެވީ ޖުޑިޝަރީއިން އެބައޮތޭ މައްސަލަ ބަލަން ފޮނުވާފަ "ހަރާން ހުކުމް" ކިޔާތީ..އަޅުގަނޑުމެން ދެންނެވިން ހަރާން ހުކުންވެސް ކިޔާނަމޭ.. ދެންއޮތް އެއްޗެއްވެސް ކިޔާނަމޭ.. ކުރަން ޖެހުނު ކޮންމެ ކަމެއްވެސް ކުރާނަމޭ، ގާނޫނު އަސާސީއިން އަޅުގަނޑުމެންނަށް ލިބިދީފައިވާ ހައްގެކޭ އެއީ"
އިދިކޮޅުގެ އެކްޝަން ޑިޕާޓުމަންޓުގެ ޗެއާ މުހައްމަދު އިސްމާއިލް
މުހައްމަދު އިސްމާއިލް ވިދާޅުވީ ރައްޔިތުންގެ ޝުއޫރުތައް ފާޅުކުރުމަށް މިނިސްޓަރުންގެ ގެކޮޅު ކުރިމައްޗަށް އެއްނުވުމަށްވެސް ފުލުހުން އަންގާފައިވާކަމަށެވެ.
އެހެން ނަމަވެސް ފުލުހުން އެފަދައިން އެންގިޔަސް، ސަރުކާރު ޖަވާބުދާރީ ކުރުވުމަށް ކުރާ ކަންކަން ހުއްޓުމެއް ނެތި ކުރިއަށް ގެންދާނެކަމަށް މުހައްމަދު އިސްމާއިލް ވިދާޅުވިއެވެ. އެގޮތުން ވަކި ވަކި މިނިސްޓަރުންނާއި ގުޅުންހުރި ކަންކަމުގައި އަޑުއުފުލުމަށް އެ މިނިސްޓަރުންގެ ގެކޮޅު ކައިރިއަށް އެއްވަން ޖެހިއްޖެނަމަ އެކަންވެސް އިދިކޮޅުން ކުރާނެކަމަށް އޭނާ ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
