އެމްޑީޕީގެ ރައީސް މުހައްމަދު ނަޝީދު އެމްޑީޕީގެ ތެރެއިން އުފައްދަވަން މަސައްކަތް ކުރައްވާ "ފިކުރެއްގެ ދިރުން" ގޮތްޕާއި ކުރީގެ ރައީސް މައުމޫން އަބްދުލް ގައްޔޫމް ޑީއާރްޕީގެ ތެރެއިން އުފެއްދެވި ޒެޑް-ޑީއާރުޕީ އާ މާބޮޑު ތަފާތެއް ނެތް ކަމަށް މަރަދޫ ދާއިރާގެ މަޖިލިސް މެންބަރު އިބްރާހީމް ޝަރީފް (މަވޯޓާ) ވިދާޅުވެއްޖެއެވެ.
ޝަރީފު މިއަދު ކުރެއްވި ޓްވީޓްގައި ވިދާޅުވީ، ރައީސް ނަޝީދުގެ ފެކްޝަންގެ "ފިކުރެއްގެ ދިރުން" އާއި މައުމޫންގެ ޒެޑް-ޑީއާރުޕީ އާ މާބޮޑު ތަފާތެއް ނެތް ކަމަށާއި އެމަނިކުފާނު މަސައްކަތް އެ ފެއްޓެވީ އެމްޑީޕީ ބައިބައި ކޮށްލުމަށް ކަމަށެވެ.
"ނަޝީދު ހިންގަވަން އެ ބޭނުންފުޅުވަނީ މައުމޫންގެ މަގުން." ޝަރީފް ވިދާޅުވި އެވެ.
މިއާއެކު ޝަރީފް ވިދާޅުވީ، ރައީސް ނަޝީދު މިގޮތަށް ކަންތައް ކުރައްވަނީ މިއަހަރު ސެޕްޓެމްބަރ މަހު ބާއްވާ ރިޔާސީ އިންތިހާބު އެމްޑީޕީއަށް ކާމިޔާބު ވިޔަ ނުދިނުމަށް ކަމަށެވެ.
މީގެއިތުރުން ޝަރީފް ވިދާޅުވީ ރައީސް މައުމޫނުވެސް ޑީއާރުޕީ ބައިބައިކޮށްލުމަށް ޕާޓީ ތެރެއިން ޒެޑް-ޑީއާރުޕީގެ ނަމުގައި ގޮތްޕެއް އުފައްދައި ފަހުން އެގޮފި ޕީޕީއެމްގެ ނަމުގައި ވަކި ޕާޓީއެއް އުފެދިގެން ދިޔަ ކަމަށެވެ. އަދި ނަޝީދުގެ ފިކުރެއްގެ ދިރުން އާއި އެއާއި ތަފާތެއް ނެތް ކަމަށްވެސް އޭނާ ވިދާޅުވި އެވެ.
ރިޔާސީ ޕްރައިމަރީގައި ބަލިވެވަޑައިގަތުމުން، އެމްޑީޕީގެ ނަޝީދުގެ ފެކްޝަންގެ މެންބަރުންނާއި ބައްދަލު ކުރައްވައި ވާހަކަ ދައްކަވަމުން އެމަނިކުފާނު ވަނީ، ކެމްޕޭން ސްލޯގަން "ފިކުރެއްގެ ދިރުން" ނަމުގައި އެމްޑީޕީ ތެރެއިން ވަކި ގޮފިތަކެއް އުފެއްދެވުމަށް ހުށަހަޅާފައެވެ. އަދި އެކަން ކަމަށް ޕާޓީގެ ގަވައިދު ތަކާއި އުސޫލުތައްވެސް ތަންދޭ ކަމަށް އެމަނިކުފާނު ވިދާޅުވާއިރު، އެއީ ޕާޓީގެ އުސޫލުތަކާ ހިލާފު ކަމެއް ކަމަށް ޗެއާޕާސަން ފައްޔާޒް އިސްމާއީލް ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
