ވ. އާރަށު މައްސަލާގައި އިދިކޮޅު އިއްތިހާދުގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް އަށް ކޮށްފައިވަނީ ހައްގު ނޫން ހުކުމެއްކަމަށް ވިދާޅުވާ ސަބަބު ތަކުގެ ތެރެއިން ސަބަބެއް އެމަނިކުފާނުގެ ވަކީލުންގެ ޓީމުގައި ހިމެނިވަޑައިގަންނަވާ ސިޔާޒު ހާމަކުރައްވައިފިއެވެ.

އެމްއެމްޕީއާރުސީގެ ހިޔާނާތުގެ ތެރެއިން، ވ. އާރަށް ކުއްޔަށް ދިނުމުގެ މުއާމަލާތުގައި ރައީސް ޔާމީންގެ މައްޗަށް ދައުލަތުން ކުރި ރިޝްވަތު ހިފުމާއި މަނީ ލޯންޑާ ކުރުމުގެ ކުށް ސާބިތުވާ ކަމަށް ކަނޑައަޅައި އެމަނިކުފާނު 11 އަހަރަށް ޖަލަށް ލުމަށް ހުކުމް ކުރީ މިދިޔަ ޑިސެމްބަރު މަހުގެ 25 ވަނަ ދުވަހު އެވެ.

އެ ހުކުމް ކުރިތާ 22 ދުވަސް ފަހުން އެ މައްސަލަ ނިންމިގޮތުގެ ރިޕޯޓު ގާނޫނީ ވަކީލުންނާއި ހަވާލުކޮށްފައިވަނީ، ރިޕޯޓު ނުދީ ލަސްކުރުމާއި ގުޅިގެން ގިނަ ފާޑުކިޔުންތަކެއް އަމާޒުވީފަހުން ނެވެ. 

Advertisement

އެގޮތުން މައްސަލަ ނިންމި ގޮތުގެ ރިޕޯޓަކީ ހުކުމް އިއްވާއިރު ތައްޔާރުކޮށްފައި އޮންނަންޖެހޭ ރިޕޯޓެއް ކަމަށާއި، އެ ރިޕޯޓު ނުދީ ހިފަހައްޓަނީ ރިޕޯޓަށް އުނި އިތުރު ގެނައުމަށްކަމަށް އިދިކޮޅުންވެސް އޭރު ގެންދިޔައީ ބޮޑެތި ތުހުމަތުތަކެއް ކުރަމުންނެވެ. 

އަދި ރިޕޯޓް ލިބުމާއި އެކު އެ މަނިކުފާނުގެ ވަކީލުންގެ ޓީމުން އަންނަނީ އެ ބޭފުޅުންގެ އެ ވާހަކައަކީ ތެދުކަން ހާމަކުރައްވައި ހެކި ދައްކަވަމުންނެވެ. 

އެގޮތުން، މައްސަލަ ނިންމި ގޮތުގެ ރިޕޯޓުގައި ހުރި އެފަދަ އުނި އިތުރުތައް ހާމަކުރައްވަމުން ޝިޔާޒު ކުރެއްވި ޓްވީޓެއްގައި އޭނާ ވަނީ ރައީސް ޔާމީންގެ މައްޗަށް ދައުލަތުން ކުރާ  ރިޝްވަތު ގަބޫލު ކުރުމުގެ ދައުވާގައި ބަސް ބަދަލުކޮށް ދައުވާ ބަދަލުކޮށްފައިވާ ކަން ފާހަގަކުރައްވާފައެވެ. 

ޝިޔާޒުގެ އެ ވާހަކައަށް ބާރު ދެއްވަމުން އެ ޓުވީޓުގައި އޭނާ ވަނީ، ރައީސް ޔާމީން ގެ ޝަރީޢަތް ކުރިއަށް ދިޔައިރު އެ މަނިކުފާނަށް އިއްވާފައިވާ ދައުވާގެ، ވީޑިއޯގެ ޔޫޓިއުބް ލިންކާއި، އަދި ޝަރީއަތް ނިމުނު ގޮތުގެ ރިޕޯޓް ގައި ދައުވާއަށް އުނިއިތުރު ގެނެސްފައިވާ ގޮތް ހާމަކުރައްވާފައެވެ. 

އެގޮތުން، ޝަރީއަތުގެ މަޖިލީހުގައި އިއްވި ދައުވާގައި، އެމްއެމްޕީއާރުސީ މެދުވެރިކޮށް، ވ އާރަށް ވަކި ފަރާތަކަށް (ޔޫސުފް ނަޢީމަށް) ދިނުމަށް "އިންތިޒާމް ހަމަޖެއްސުމުން"، އެކަމުގެ މުގާބިލުގައި ޔޫސުފް ނައީމްގެ އެކައުންޓުން ރައީސް ޔާމީނަށް ފޮނުވާފައިވާ 1 މިލިއަން ޑޮލަރު އެމަނިކުފާނު ގަބޫލުކޮށްފައިވާ ކަމަށް ބުނެފައިވާއިރު، ޝަރީޢަތް ނިމުނު ގޮތުގެ ރިޕޯޓުގައި "އިންތިޒާމް ހަމަޖެއްސުމުން" ގެ ބަދަލުގައި އިނީ "ނުފޫޒު ފޯރުވުމުން" ނެވެ. 

އެކަން ފާހަގަކުރައްވަމުން ޝިޔާޒް ވިދާޅުވީ މިއީ، "‏ޙައްޤު ނޫން ޙުކުމެއް ކަމަށް ބުނާ ސަބަބުގެ ތެރެއިން ހަމަ ކުޑަ މިންވަރެއް" ކަމަށާ އެގޮތަށް އޮތުމުން ދައުވާވެސް ބަދަލުވާ ކަމަށެވެ.

މީގެ ކުރިންވެސް ޝިޔާޒް ވަނީ ރައީސް ޔާމީންގެ ޝަރީއަތް ނިމުނު ގޮތުގެ ރިޕޯޓުގައިވާ އެފަދަ ކަންކަން ފާހަގަކުރައްވާފަ އެވެ. އެގޮތުން، އެމްއެމްޕީއާރުސީގެ ކުރީގެ މެނޭޖިން ޑިރެކްޓާ ޒިޔަތާއި، ކުރީގެ ނައިބުރައީސް އަހުމަދު އަދީބު ކޯޓަށް ދިން ހެކިބަހުގެ އިތުރުން ގިނަ ވާހަކަތަކެއް މައްސަލަ ނިންމިގޮތުގެ ރިޕޯޓުގައި ހިމަނާފައިވާކަން އޭނާ ވަނީ ހާމަކޮށްދެއްވާފައެވެ.