މިއަހަރުގެ ފުރަތަމަ އެއްމަސް ދުވަސް ނުނިމެނީސް ސަރުކާރުން މިއަހަރު ދަތުރުތަކަށް ކުރި ޚަރަދު 5.9 މިލިއަން ރުފިޔާ އަށް އަރައިފިއެވެ.

ފިނޭންސް މިނިސްޓްރީން އާއްމުކުރި ތަފާސް ހިސާބުތައް ދައްކާ ގޮތުގައި 1 ޖެނުއަރީ 2023 އިން 26 ޖެނުއަރީ 2023 ގެ ނިޔަލަށް ސަރުކާރުން ދަތުރުތަކަށް 5.9 މިލިއަން ރުފިޔާ ވަނީ ހަރަދުކޮށްފައެވެ. މިއީ މިދިޔަ އަހަރުގެ މިމުއްދަތައްވުރެ 9 ލައްކަ ރުފިޔާ އިތުރު އަދަދެކެވެ. މިދިޔަ އަހަރު މި މުއްދަތުގައި ސަރުކާރުން ދަތުރުތަކަށް ޚަރަދުކޮށްފައިވަނީ 5.0 މިލިއަން ރުފިޔާއެވެ.

ސަރުކާރުގެ ދަތުރު ތަކުގެ ތަފްސީލް މިނިސްޓްރީގެ ތަފާސްހިސާބުތަކުގައި ހާމަކޮށްފައި ނުވި ނަމަވެސް، މި ޖަނަވަރީ މަހު އޮތް އެމްޑީޕީގެ ރިޔާސީ ޕްރައިމަރީ އިންތިހާބަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ރާއްޖޭގެ ވަރަށް ގިނަ ރަށްރަށަށް ވަނީ ދަތުރު ކުރައްވާފައެވެ. އަދި މިދަތުރު ތަކުގައި އެމަނިކުފާނުގެ އަރިހުގައި ސަރުކާރުގެ ގިނަ މިނިސްޓްރީ ތަކުގެ ވެރިންވެސް ވަނީ ބައިވެވަޑައިގެންފައެވެ. އެހެންކަމުން ދަތުރުތަކަށް އިތުރުވެފައި މިވަނީ ކެންޕެއިނަށް ކުރެއްވި ދަތުރު ތަކުގެ ޚަރަދު ކަމަށް ބެލެވެއެވެ. 

Advertisement

ދަތުރުތަކަށް މިހާތަނަށްވެސް ބޮޑު ޚަރަދެއްކޮށްފައިވާއިރު މިއީ އިންތިހާބު އަހަރު ކަމުން، ރައީސް ޞާލިހާއި، ސަރުކާރުގެ އިސް ފަރާތްތަކުން ރާއްޖޭގެ އެކި ހިސާބުތަކަށްވެސް ދައުލަތުގެ ޚަރަދުގައި ކެންޕެއިނަށް ވަޑައިގަންނަވާނެ ކަމަށް ބެލެވެއެވެ. އެހެންކަމުން، މި މިއަހަރު ދަތުރުތަކަށް ކަނޑައަޅާފައިވާ 210.2 މިލިއަން ރުފިޔާ ބަޖެޓަށްވުރެ ގިނައިން ޚަރަދުވާނެ ކަމަށް ބެލެވެއެވެ.

މިދިޔަ އަހަރު ވެސް ދަތުރުތަކަށް 203 މިލިއަން ރުފިޔާ ބަޖެޓް ކުރުމަށްފަހު އަހަރު ނިމުނުއިރު ދަތުރުތަކަށް 235.4 މިލިއަން ރުފިޔާ ހަރަދު ކުރިއެވެ.