ކުށްވެރިވެފަ ތިބި މީހުން ހެކިންނަށް ގެނައީމައި އެކަން ބަލައިނުގަނެވޭނެކަމަށް ކުރީގެ ނާއިބު ރައީސް ޑރ. މުހައްމަދު ޖަމީލް އަހުމަދު ވިދާޅުވެއްޖެއެވެ.

ޕީޕީއެމް އިން މިއަދު ފެށި “ހޯޕް ކޮންފަރެންސް 2023” ގައި ވާހަކަދައްކަވަމުން ޖަމީލް ވިދާޅުވީ ރައްޔިތުންނަށް އެންމެ މުހިންމުވާނީ އަދުލުވެރި ޝަރުއީ ނިޒާމެއް ކަމަށެވެ. އަދި އެފަދަ ޝަރުއީ ނިޒާމެއް ގެއްލިފައި އޮންނަ ގައުމަކަށް ދިމާވާނެ އެންމެ ބޮޑު މުސީބާތަކީ އެ ގައުމެއްގެ ސިޔާސީ ވެރިންގެ ރައްކާތެރިކަން ގެއްލިގެން ދިއުންކަމަށާ، ސިޔާސީ ވެރިންނަށް އަނިޔާކުރުމަށްޓަކައި ގެންގުޅޭ އެންމެ ވަރުގަދަ ހަތިޔާރަކީ އެއީކަމަށެވެ. 

"ގައުމެއްގެ ސިޔާސީ މަސައްކަތްކުރުމަކީ އެބަޔަކަށް އަނިޔާ ދޭ ކަމަކަށް ވެގެން މިއުޅެނީ ކީއްވެގެންތޯ؟ ކޮންތާކުތޯ އެވާހަކަ އޮތީ. ކީއްގެންތޯ އަޅުގަނޑުމެން އެކަމަށް ފެން ބޮވައިގަނެގެން މިއުޅެނީ." ޖަމީލް ވިދާޅުވި އެވެ. 

މިއާއެކު ޖަމީލު ވިދާޅުވީ، ގައުމުގައި ތިބޭ ފުލުހުންގެ ހަމައެކަނި ޒިންމާއަކީ ގައުމުގެ އިދިކޮޅުގެ ލީޑަރުގެ މައްޗަށް ތަހުގީގު ހިންގުންކަމަށްވަނީނަމަ ކަމު ނުދާކަމަށާ، އަދި ކުށްވެރިން ހެކިވެރިންގެ ގޮތުގައި ގެނައުމުންވެސް ކަމުނުދާކަމަށެވެ. 

"ބަލާފަ ހޯދާފަ ކުށްވެރިވެފައިވާ މީހުން ހެކިންނަށް ގެނައިމާ ކަމަކު ނުދޭ، ސޯމާލިޔާއާއި އެފްރިކާގެ ގައުމުތަކުގައި ހަރަކާތްތެރިވާގޮތަށް ދިވެހިރާއްޖޭގެ ފުލުހުންގެ މަސައްކަތް އަމާޒު ވީމައި އެ ކަމަކު ނުދޭ، ޕްރޮސެކިއުޓާ ޖެނެރަލްއަކީ ސިޔާސީ ނުފޫޒުގެ ތެރެއަށް ވަދެފައިހުރި ބޭފުޅަކަށްވީމައި ކަމަކު ނުދޭ" ޑރ. ޖަމީލް ވިދާޅުވިއެވެ.

ޖަމީލް އެފަދައިން ވިދާޅުވެފައި އެވަނީ އެމްއެމްޕީއާރުސީގެ ހިޔާނާތުގެ މޭސްތިރިން ކަމުގައިވާ އެ ކުންފުނީގެ މެނޭޖިން ޑިރެކްޓަރ ޒިޔަތު އާއި ކުރީގެ ނައިބު ރައީސް އަހުމަދު އަދީބު ދައުލަތުގެ ހެކިންގެ ގޮތުގައި ރައީސް ޔާމިނާ ދެކޮޅަށް ހެކިބަސް ދިނުމުން ކަމަށް ބެލެވެއެވެ. 

ޖަމީލް އިތުރަށް ވިދާޅުވީ، ޝަރުޢީ ނިޒާމު އިސްލާހު ނުވާކަމުގެ ހެތްކަކީ ވަކި ބަޔަކުގެ މައްޗަށް ނިޒާމު ތަންފީޒުވާތީކަމަށާ، ފިކުރު ތަފާތުވާ މީހުންނާއިމެދު އެކަނި ފިޔަވަޅު އެޅުމަކީ ބަލައިގަނެވޭނެ ކަމެއް ނޫން ކަމަށެވެ. 

"ސިސްޓަމް އެބަ ހިނގަޔޯ، ސިސްޓަމެއް ނުހިނގާ، ސިސްޓަމް ހިނގާ ނަމަ މަހްލޫފް ނުހުންނާނެ ކެބިނެޓްގައި، ސިސްޓަމް ހިނގާ ނަމަ ތުހުމަތު ކުރެވުނީމައި އައިޝާއެއް އައިމިނާއެއް ނީންނާނެ" ޑރ. ޖަމީލް ވިދާޅުވިއެވެ.