"ސިސްޓަމް" ހިނގާ ކަމަށް މިސަރުކާރުން ބުނާއިރު، ސިސްޓަމް ހިނގާނަމަ ޔޫތު މިނިސްޓަރު އަހުމަދު މަހްލޫފް ސަރުކާރުގެ ކެބިނެޓް ގައި މިނިސްޓަރެއްގެ މަގާމު ފުރުއްވަން ނުއިންނާނެ ކަމަށް ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދު ވިދާޅުވެއްޖެއެވެ. 

ޑރ.ޖަމީލް މިފައިން ވިދާޅުވެފައިވަނީ ޕްރޮގްރެސިވް ކޮންގުރެސް ކޯލިޝަނުގެ ފަރާތުން މި އަހަރު އޮންނަ ރިޔާސީ އިންތިޚާބަށް ތައްޔާރުވުމުގެ ގޮތުން ބާއްވާ "ހޯޕް ކޮންފަރެންސް" ފެށުމަށް އިއްޔެ ބޭއްވި ރަސްމިއްޔާތުގައި ދެއްކެވި ވާހަކަފުޅުގައެވެ.

ޑރ. ޖަމީލް ވިދާޅުވީ އިންސާފުވެރިކަމާއެކު ވެރިކަމުގެ ސިސްޓަމް ހިނގާ ކަމަށް އަދުގެ ސަރުކާރުން ބުނާއިރު، އެގޮތަށް ސިސްޓަމް ހިނގާނަމަ ތުހުމަތެއް ކުރެވުނީމައި ވަޒީރު ބޭފުޅެއް އެހެން ބޭފުޅެއް ނޯންނާނެކަމަށާއި ގާނޫނު އެންމެންނަށްވެސް ހިނގަން ޖެހޭނެކަމަށެވެ. އެހެން ނަމަވެސް އެކަން އެގޮތަށް ވާތަން ނުފެންނަ ކަމަށްވެސް އޭނާ ވިދާޅުވި އެވެ. 

"ސިސްޓަމް އެބަ ހިނގަޔޯ، ސިސްޓަމެއް ނުހިނގާ، ސިސްޓަމް ހިނގާ ނަމަ މަހްލޫފް ނުހުންނާނެ ކެބިނެޓްގައި، ސިސްޓަމް ހިނގާ ނަމަ ތުހުމަތު ކުރެވުނީމައި އައިޝާއެއް އައިމިނާއެއް ނީންނާނެ" ޑރ. ޖަމީލް ވިދާޅުވިއެވެ.

ޑރ. ޖަމީލް މިފަދައިން ވިދާޅުވެފައި މިވަނީ، އެމްއެމްޕީއާރުސީގެ ޚިޔާނާތުގެ މައްސަލައިގައި އޭނާގެ މައްޗަށް އުފުލާފައިވާ ރިޝްވަތު ހިފުމުގެ ދައުވާގެ ޝަރީޢަތް ކުރިއަށް ނުގެންގޮސް "މަޑު ޖައްސާލާފައި" އޮތުމުން އެކަމަށް އިޝާރާތް ކުރައްވައެވެ. 

އެގޮތުން، މަހުލޫފްގެ މައްޗަށް ދައުވާ އުފުލާފައިވަނީ އޭނާ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރުކަމުގައި ހުންނެވިއިރު 2014 ވަނަ އަހަރުގެ އޮގަސްޓް މަހުގެ 27 ވަނަ ދުވަހު ސްޕެޝަލް އިކޮނޮމިކް ޒޯން ބިލަށް ތާއީދުކޮށް ވޯޓުދިނުމުގެ މުގާބިލުގައި އޭރުގެ ޓޫރިޒަމް މިނިސްޓަރު އަހުމަދު އަދީބު އަބްދުލްޣަފޫރު، އެސްއޯއެފް ޕްރައިވެޓް ލިމިޓެޑްގެ ނަމުގައި ބޭންކު އޮފް މޯލްޑިވްސް ގައި ހުޅުވާފައިވާ އެކައުންޓުގެ ޗެކަކުން މަހުލޫފަށް ދިން 33،000 އެމެރިކާ ޑޮލަރު އޭނާގެ ނަމުގައި ބީއެމްއެލް ގައި ހުޅުވާފައިވާ އެކައުންޓަށް 2014 ވަނަ އަހަރުގެ ސެޕްޓެމްބަރު މަހުގެ 1 ވަނަ ދުވަހު ޖަމާކޮށް ރިޝްވަތު ހިފާފައިވާތީއެވެ.

މި މައްސަލައިގެ އަޑުއެހުން މިދިޔަ އަހަރު ތާވަލް ކުރުމަށްފަހު ދެ ފަހަރެއްގެ މަތިން ކެންސަލްވެސް ކޮށްފައިވާއިރު އޭގެ ފަހުން އިތުރު އަޑުއެހުމެއް ތާވަލް ކޮށްފައެއް ނުވެއެވެ.