ކުރީގެ ރައީސް، ޔާމީން އަބްދުލްގައްޔޫމް ގެ ވެރިކަމުގައި ހުޅުމާލޭ ދެ ވަނަ ފޭސްގައި އަޅާފައިވާ 'ވިނަރެސް' ފްލެޓްތައް ލިބުނު މީހުންގެ ދާއިމީ ލިސްޓު ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން އާއްމުކޮށްފި އެވެ. 

އެޗްޑީސީން ނެރުނު ބަޔާނެއްގައި ބުނީ ދާއިމީ ލިސްޓު ނެރުނީ، ވަގުތީ ލިސްޓަށް ހުށަހަޅާފައިވާ ޝަކުވާތައް ބެލުމަށް ފަހު، ޕްލޭނިން މިނިސްޓްރީން މުރާޖައާކޮށްފަ ކަމަށެވެ. އަދި އެ ލިސްޓުގައި ބޯހިޔާވަހިކަމުގެ އެހެން މަޝްރޫއުތައް ކަމަށްވާ ސީލައިފާއި ހިޔާ އަދި ގުޅީފަޅު ކެޓަގަރީގެ އެއްވެސް މީހަކު ނުހިމެނޭ ކަމަށެވެ.
މީގެ އިތުރުން އެޗްޑީސީން ބުނީ، ލިސްޓުގައި ހިމެނޭ މީހުންގެ ތެރެއިން މައި-އެޕްލިކަންޓް އަދި ކޯ-އެޕްލިކަންޓްގެ ގޮތުގައި އެއް ފޯމަށް ވުރެ ގިނަ ފޯމުގައި ނަން ހިމަނާފައިވާ ފަރާތްތަކަށް ކުރިއަށް ދެވޭނީ އެންމެ ފޯމަކާއެކީގައި ކަމަށެވެ. އަދި ދެމަފިރިން ވަކިން ފޯމު ހުށަހަޅާފައިވީ ނަމަވެސް އެ ފަދަ ފަރާތްތަކަށް ދެވޭނީ އެންމެ ފްލެޓެއް ގަތުމުގެ ފުރުސަތު ކަމަށާ، އެކަން ހައްލު ކުރުމަށް ފުރުސަތު ހުޅުވާލާނެ ކަމަށެވެ. 

މިއާއެކު އެޗްޑީސީން ބުނީ، ވިނަރެސް މަޝްރޫއުން އެޕާޓްމެންޓް ގަތުމަށް ދެން ކުރިއަށް އޮތް މަރުހަލާއަކީ އާއްމު އުސޫލުގެ ދަށުން އަލަށް ޝަރުތު ހަމަވެފައިވާ ފަރާތްތަކުގެ މާލީ ގާބިލިއްޔަތުކަން ބެލުމަށް ބޭނުންވާ ލިޔެކިޔުންތައް ހަމަކުރުުން ކަމަށެވެ. އަދި މި މަރުހަލާ ފުރިހަމަވުމުން، ބުކިން ފީ ނެގުމާއި ވިނަރެސް އެޕާޓްމެންޓް އިހްތިޔާރު ކުރުމުގެ ކަންކަން ކުރިއަށް ގެންދާނެ ކަމަށެވެ. 

އެޗްޑީސީން އިތުރަށް ބުނީ، އެޕާޓްމެންޓް އިހްތިޔާރުކުރުމަށް ފަހު 'ލީސް ޓު އޯން' އަދި 'ފުލްޕޭމަންޓް މޮޑެލްް' ހިޔާރުކޮށްފައިވާ ފަރާތްތަކުގެ މާލީ ގާބިލިއްޔަތުކަން ކަށަވަރު ކުރާނީ ތިން ވަނަ ފަރާތެއް މެދުވެރިކޮށް އިވެލުއޭޝަން ހެދުމަށް ފަހުގައި ކަމަށާ،އަދި ޕޭމަންޓް މޮޑެލް ހިޔާރު ކުރި މީހުންނަށް ފްލެޓް ކަށަވަރު ވާނީ ހުށަހަޅާފައިވާ ލިޔުންތަކަށް ބެލުމަށް ފަހު، މާލީ ގާބިލިއްޔަތުކަން ފުރިހަމަ ވާކަމަށް 'ތާޑް ޕާޓީ އިވެލުއޭޓަރުން' ނިންމުމުން ކަމަށެވެ.

ވިނަރެސް އަކީ ހުޅުމާލެ ފޭސް 2 ގައި އެޗްޑީސީއިން ތަރައްޤީކުރަމުން އަންނަ މެދު ފަންތީގެ ބޯހިޔާވަހިކަމުގެ މަޝްރޫއުއެކެވެ. މި މަޝްރޫއު އަކީ ކުރީގެ ރައީސް ޔާމީންގެ ވެރިކަމުގައި މާލެ ސަރަހައްދުގައި ދިމާވެފައިވާ ބޯހިޔާވަހިކަމުގެ ދަތިތަކަށް ހައްލެއް ހޯދައިދިނުމަށް ފެއްޓެވި މަޝްރޫއުއެކެވެ.

މި މަޝްރޫއުގައި ޖުމްލަ 1344 އެޕާޓްމަންޓް ހިމެނޭގޮތަށް ޖުމްލަ 10 ޓަވަރު ހިމެނެއެވެ. އަދި މިތަނުގައި 2 ވައްތަރެއްގެ އެޕާޓްމަންޓް ހިމެނެއެވެ. 902 އަކަފޫޓު އަދި 883 އަކަފޫޓު ހިމެނޭ މި އެޕާޓްމަންޓް ތަކުގައި 3 ކޮޓަރި އަދި 3 ފާހަނާ އަދި ބެލްކަނީ ހިމެނެއެވެ.