ދަރިފުޅު ވިހައިގެން އޮފީހުން ޗުއްޓީ އިތުރުކޮށް ނުދިނުމުން ދެމަހުގެ ތުއްތު ދަރިފުޅު ގޮވައިގެން އޮފީހަށް ނިކުމެއްޖެ އެވެ.

ވަޒީފާއާ ބެހޭ ޓްރައިބިއުނަލްގެ މެމްބަރެއް ކަމަށްވާ މަރިޔަމް ޝަމްއާ އިބްރާހިމް (ޝަންމަ) އޭނާގެ ހާލަތު ބަޔާންކޮށް އިންސްޓަގްރާމް ގައި ކޮށްފައިވާ ޕޯސްޓެއްގައި ވަނީ، ތުއްތު ދަރިފުޅަށް ދެ މަސް ވީތަނާ މަސައްކަތަށް ނުކުތުމަށް އޮފީހުން އެންގި ކަމަށެވެ.

އަދި އެފަދައިން އެންގުމުން އޭނާގެ ޗުއްޓީގެ މުއްދަތު އިތުރު ކޮށްދިނުމަށް އޮފީހުގައި އެދުނު ކަމަށާ، އެހެން ނަމަވެސް، އޮފީހުން އޭނާއަށް އެންގީ މުސާރަ ނުލިބޭ ގޮތަށް ނަމަ ގޭގައި މަޑު ކުރެވޭނެ ކަމަށާ، އެނޫން ގޮތަށް ޗުއްޓީ އިތުރު ކުރެވެން ނެތް ކަމަށެވެ.

"އަހަރެންގެ ޗުއްޓީގެ މުއްދަތު އިތުރު ކޮށްދިނުމަށް އެދި އޮފީހުގެ ހެޑްގެ އަރިހުގައި އަހަރެން އާދޭސް ކުރިން. (އެއީ ޗުއްޓީގައި ހުރެވެސް މަސައްކަތް ކުރާގޮތަށް.) އެހެން ނޫނީ ހަމަސް ނޫނީ ދަރިފުޅަށް 4 މަސް ވަންދެން ނަމަވެސް ޗުއްޓީ އިތުރު ކޮށްދިނުމަށް. އެހެންނަމަވެސް އެތަނުން އެއްގޮތެއްވެސް ހަމަޖައްސައި ނުދިން". ޝަންމަގެ ޕޯސްޓުގައި ލިޔެފައިވެއެވެ.

އެހެންކަމުން، ގަޑި އިރަކުން ގަޑި އިރަކުން ތުއްތު ދަރިފުޅަށް ގާތުން ދެމުން ގެ އާއި އޮފީހާއި ދެމެދުގައި ދުވަން ޖެހުމަކީ ވަރަށް ވެސް އުނދަގޫ ކަމަކަށް ވާނެ ކަމަށް އޭނާއަށް ގަބޫލު ކުރެވުމުން ދަރިފުޅު ގޮވައިގެން އޮފީހަށް ދާން ޖެހުނީ ކަމަށް އޭނާ ޕޯސްޓް ކޮށްފައި ވެއެވެ.

ޝަންމަގެ ޕޯސްޓުގައި އޭނާ އިތުރަށް ވިދާޅުވީ، އޭނާގެ ދަރިފުޅަކީ ޕްރީޓާރމް ނުވަތަ ދުވަސް ނުފުރައި ވިހޭ ދަރިއެއް ކަމަށެވެ. އެހެން ކަމުން ދަރިފުޅު ވިހޭއިރުގައި ބަރުދަން ވަރަށް ދަށް ކަމަށާ، ވޭތުވެދިޔަ ދެ މަހަކީީ ވަރަށް އުފާވެރި ދެމަސް ކަމުގައިވީ ނަމަވެސް ގޮންޖެހުންތަކާއި ދިމާވިކަމަށެވެ.

"ދަރިފުޅު ރޭގަނޑު ރަނގަޅަށް ނުނިދާ. ވަރަށް ގިނައިރު ރޯނެ. އެހެންވެ ދެމައިންނަށް އެއްވެސް ވަރަކަށް ހަމަނިންޖެއް ނުލިބެ. ވަރަށް ވަރުބަލި ކަން މަތީގައި އުފަލާއި އެކުގައި ދަރިފުޅު ބަލަމުން މި ދަނީ." ޝަންމަ ވިދާޅުވެފައި ވެއެވެ.

ވިހެއުމާ އެކު ކޮންމެ އަންހެނަކަށް ވެސް ހަ މަހުގެ ޗުއްޓީއެއް ދިނުމަކީ ސަރުކާރުގެ ސިޔާސަތެއް ނަމަވެސް، އެ އުސޫލު، މިނިވަން މުއައްސަސާތަކުގެ މެމްބަރުންނަކަށް ނޯވެ އެވެ. އެކަމަކު އެއީ އެ މުއައްސަސާގެ އެތެރެއިން، އަމިއްލައަށް ކުރެވިދާނެ ކަމެކެވެ.