ގިނަ އަދަދެއްގެ ބަޔަކާ އެކު އިދިކޮޅު ޕީޕީއެމް، ޕީއެންސީ ކޯލިޝަންގެ "ބުންވަރު" ހިންގާލުން ފަށައިފިއެވެ. 

ރިޔާސީ އިންތިހާބަށް ތައްޔާރުވުމަށް އިދިކޮޅުން އިއްޔެ ފެށި "ހޯޕް ކޮންފަރެންސް" ގެ ތެރެއިން ކުރިއަށް ގެންދާ މި ހަރަކާތް ފަށާފައިވަނީ މިއަދު ހަވީރު 4:00 ގައެވެ. މި ހިނގާލުން ފެށީ މާލޭ ޕީޕީއެމް އޮފީސް ކުރިމަތިންނެވެ.

ބެނާތަކާއެކު ފެށި މި ހިނގާލުމުގައި އިދިކޮޅުގެ ރިޔާސީ ކެންޑިޑޭޓު، އަދި ކުރީގެ ރައީސް ޔާމީންގެ ގިނަ އަދަދެއްގެ ސަޕޯޓަރުން ބައިވެރިވެފައިވާއިރު، އެމީހުން އަންނަނީ އެމަނިކުފާނު މިނިވަން ކުރުމަށް ގޮވައިލައި އެމަނިކުފާނަށް ކޮށްފައިވަނީ ހަރާމް ހުކުމެއް ކަމަށް ބުނެ އަޑު އުފުލަމުންނެވެ. 

Advertisement

މި ހިނގާލުމާއި ގުޅޭގޮތުން އިދިކޮޅު ކޯލިޝަންގެ އެކްޝަން ޑިޕާޓުމަންޓުގެ ޗެއާ މުހައްމަދު އިސްމާއިލް ވިދާޅުވީ ހިނގާލުން ކުރިއަށް ގެންދިއުމާއި ގުޅޭގޮތުން ފުލުހުންނާއި ބައްދަލުކޮށްފައިވާކަމަށެވެ. އަދި ފުލުހުންގެ އެއްބާރުލުން މި ހަރަކާތަށް ލިބޭނެކަމުގެ ޔަގީންކަން ދެއްވާފައިވާކަމަށް މުހައްމަދު އިސްމާއިލް ވިދާޅުވި އެވެ. 

"މި ހިނގާލުން ކުރިއަަށް ގެންދާނީ ޕޮލިހުންނާއި ކޯޑިނޭޓު ކުރެވިގެން މަޖީދީމަގުން ހިނގާފައި ގޮސް، އެނބުރި މަޖީދީމަގުން ޕާޓީ އޮފީސް ދޮރުމައްޗަށް ނިންމާލާނީ. އެނގިވަޑައިގަންނަވާނެ އަޅުގަނޑުމެން މިހެން ހިންގާ ބޮޑެތި ހަރަކާތްތައް ޕޮލިހުންނާއި އެކު މަޝްވަރާ ކުރެވިގެން އަބަދުވެސް ކުރިއަށް ދަނީ، އަދި ޕޮލިހުން އެ ހުއްދަދޭ ގޮތްތަކެއްގެ މައްޗަށް، އެ ހުއްދައިގެ ދަށުން އަމުރުތަކަށް ބޯލަނބައިގެން ކުރިއަށް ގެންދަނީ.." މުހައްމަދު އިސްމާއިލް ވިދާޅުވި އެވެ. 

މި ހިނގާލުމުގެ އިތުރުން މިރޭވެސް ހޯޕް ކޮންފަރެންސް ކުރިއަށް ދާއިރު މިނކޮންފަރެސް ނިންމުމަށް މާލޭގައި "ދުއްޕާން" ނަމުގައި ބޮޑު ޖަލްސާއެއް ބޭއްވުމަށްވެސް ވަނީ ހަމަޖެހިފައެވެ.