ރީނދޫ ޓީޝާޓް ލައިގެން ހުރި މީހެއް އިދިކޮޅުގެ މުޒާހަރާއަށް ވަދެ ހަމަނުޖެހުން ހިންގަން އުޅެފިއެވެ. 

ރިޔާސީ އިންތިހާބަށް ތައްޔާރުވުމަށް އިދިކޮޅުން އިއްޔެ ފެށި "ހޯޕް ކޮންފަރެންސް" ގެ ތެރެއިން މިއަދު ހަވީރު 4:00ގައި ފެށި "ބުންވަރު" ހިނގާލުމުން ކުރިއަށް ދަނިކޮށް ރީނދޫ ޓީޝާޓް ލައިގެން ހުރި މީހަކު ފުލުހުންނާއި، އެއްވުން އިންތިޒާމްކުރި ފަރާތްތަކުގެ ސެކިއުރިޓީ ފޫއާޅުވައި އެއްވުމުގެ ތެރެއަށް ވަނީ ވަދެފައެެވެ. 

އެހެން ނަމަވެސް، ފުލުހުންނާއި، އިދިކޮޅު ޕީޕީއެމް/ޕީއެންސީގެ މެންބަރުން ވަނީ އެކަން ހުއްޓުވާފައެވެ. 

ސެކިއުރިޓީ ފޫއަޅުވައި މިމީހާ ވަނުމުގެ ސަބަބުން ކޮންމެވެސް ވަރެއްގެ ހަމަނުޖެހުމެއް ހިނގިކަމުަގއިވިޔަސް، އެއްވުން ވަނީ ސުލްހަވެރިކަމާއެކު އާޓިފިޝަލް ބީޗައް ނިންމާލާފައެވެ. ހަމަނުޖެހުން ހިންގި މީހާއަށް ފުލުހުން ވަނީ އެވަގުތު ރައްކާތެރިކަން ފޯރުކޮށްދިނުމުގެ ގޮތުން ގެއެއްގެ ތެރެއަށް ވައްދާފައެވެ. ނަމަވެސް އޭނާ ހައްޔަރުކޮށްފައެއްނުވެއެވެ.

ގާތްގަނޑަކަށް 5000 އެއްހާ މީހުން ބައިވެރިވި މި ހިނގާލުމުގައި ބައިވެރިން އަންނަނީ އިދިކޮޅުގެ ރިޔާސީ ކެންޑިޑޭޓު، އަދި ކުރީގެ ރައީސް ޔާމީން މިނިވަން ކުރުމަށް ގޮވައިލައި އެމަނިކުފާނަށް ކޮށްފައިވަނީ ހަރާމް ހުކުމެއް ކަމަށް ބުނެ އަޑު އުފުލަމުންނެވެ. 

މި ހިނގާލުމާއި ގުޅޭގޮތުން އިދިކޮޅު ކޯލިޝަންގެ އެކްޝަން ޑިޕާޓުމަންޓުގެ ޗެއާ މުހައްމަދު އިސްމާއިލް ވިދާޅުވީ ހިނގާލުން ކުރިއަށް ގެންދިއުމާއި ގުޅޭގޮތުން ފުލުހުންނާއި ބައްދަލުކޮށްފައިވާކަމަށެވެ. އަދި ފުލުހުންގެ އެއްބާރުލުން މި ހަރަކާތަށް ލިބޭނެކަމުގެ ޔަގީންކަން ދެއްވާފައިވާކަމަށާ، ހިނގާލުން ކުރިއަށްދާނީ ފުލުހުން އިރުޝާދު ދެއްވާފައިވާ ގޮތަށް ކަމަށް މުހައްމަދު އިސްމާއިލް ވިދާޅުވި އެވެ. 

މި ހިނގާލުމުގެ އިތުރުން މިރޭވެސް ހޯޕް ކޮންފަރެންސް ކުރިއަށް ދާއިރު މިނކޮންފަރެސް ނިންމުމަށް މާލޭގައި "ދުއްޕާން" ނަމުގައި ބޮޑު ޖަލްސާއެއް ބޭއްވުމަށްވެސް ވަނީ ހަމަޖެހިފައެވެ.