ބ. ކެޔޮދޫގައި ވެލާތަކެއް ހިފާ، އެ އެއްޗެހި މަރާލި މައްސަލައިގައި ބަޔަކު ހައްޔަރުކޮށްފި އެވެ. 

ފުލުހުންނަށް ލިބުނު މައުލޫމާތަކާ ގުޅިގެން ބ.އަތޮޅު ބަޔޮސްފިއަރ ރިސާވް އާ ގުޅިގެން ހިންގި މި އޮޕަރޭޝަން ގައި އަތުލައިގަތީ ބ.އަތޮޅު ރަށަކަށް ނިސްބަތްވާ ބައެއްކަމަށް މައުލޫމާތު ލިބެއެވެ.

އެ ކަމުގައި 12 މީހުން ޝާމިލުވާކަމަށް ފުލުހުންނާ ހަވާލާދީ ބ.އަތޮޅު ބަޔޮސްފިއަރ ރިސާވް އޮފީހުން ވަނީ ބުނެފަ އެވެ.

Advertisement

ވެލާތައް މަރާލާ އެކި ބައިބައި ވަކިކޮށްފައިވާ ފޮޓޯތަކެއްވެސް ވަނީ ސޯޝަލް މީޑިއާގައި އާންމުވެފަ އެވެ. 

އެ ފޮޓޯތަކުން ފެންނަ ގޮތުގައި ވެލާތައް މަރާލާ އޭހެ އެކި އެކި ބައިތައް ފުޅިމަދު ފޮށިގަނޑުތަކަށް ހުރީ އަޅާފައެވެ. އޭގެ އިތުރުން ދެ ހަންބުރީގައިވެސް ބައެއް ބައިތައް އަޅާފައި ހުއްޓެވެ. އަދި ކެއްކުމަށް ބޭނުންކުރާ ބައެއް ސާމާނާއި ވަޅިތައްވެސް ހުއްޓެވެ. 

މިމައްސަލަ އަންނަނީ ފުލުހުން އިތުރަށް ތަހުޤީގު ކުރަމުންނެވެ. މައުލޫމާތު ލިބޭ ގޮތުގައި މިކަމުގައި އުޅުނު އެންމެންނަށްވެސް ވެލާ ކަހަނބު ހިފާ އެއަށް އަނިޔާދިނުމުން ބޮޑު އަދަދަކުން ޖޫރިމަނާއެއް އަންނާނެއެވެ. 

ދިވެހިރާއްޖޭގެ ވެލާ ކަހަނބަކީ ނެތިދިޔުމުގެ ނުރައްކަލުގައިވާ ދިރުމެއްކަމަށް އިންޓަނޭޝަނަލް ޔޫނިއަން ފޯރ ކޮންޒަވޭޝަން އޮފް ނޭޗާސް (އައި.ޔޫ.ސީ.އެން(އިން ކަނޑައަޅާފައިވާ ދިރުމެކެވެ.

ވެލާ ކަހަނބު ޙިމާޔަތްކޮށްފައިވަނީ "ގުދުރަތީ ގޮތުގައި ނުވަތަ ތަބައީ ގޮތުގައި ރައްކާތެރިކުރާ ދިރޭތަކެއްޗާބެހޭ ޤަވާއިދު" އަދި ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނުގެ 4 ވަނަ މާއްދާގެދަށުންނެވެ.

އެގޮތުން ވެލާ ބިސް ވިއްކުން 1996ވަނަ އަހަރު ވަނީ މަނާކޮށްފައެވެ. އަދި 2006ވަނަ އަހަރު ވެލާކަހަނބު އެންމެ ގިނައިން ބިސްއަޅާކަމަށް ފާހަގަކުރެވިފައިވާ 14 ރަށަކުން ބިސްނެގުން ޤާނޫނީގޮތުން މަނާކުރިއެވެ.