މިއަހަރުގެ ރޯދަމަހު ރައްޔިތުންނަށް ހިލޭ ކަދުރު ބެހުމާއި ގުޅޭގޮތުން އަދި ވަކި ގޮތެއް ނުނިންމާ ކަމަށާއި، އަދި ކުރިއަށް ދަނީ މަޝްވަރާތަކެއްކަމަށް އިސްލާމިކް މިނިސްޓްރީއިން ބުނެފިއެވެ. 

ކޮންމެ އަހަރެއްގެ ރޯދަ މަހާއި ދިމާކޮށް ސައުދީއިން ދިވެހިންނަށް ހަދިޔާ ކުރާ ކަދުރަކީ ސަރުކާރުގެ ފަރާތުން އެންމެންނަށް ހިލޭ ބަހަމުންދާ އެއްޗެކެވެ. 

ސައުދީއިން ހަދިޔާ ކުރާ ކަދުރު ބެހުމުގެ ކަންކަން ކުރަމުންދަނީ އިސްލާމިކް މިނިސްޓްރީގެ ބެލުމުގެ ދަށުންނެވެ.

އަންނަ މަސްތެރޭގައި މިއަހަރުގެ ރޯދަމަސް ފެށިގެންދާއިރު، މިހާތަނަށް އަދި ސައުދީ ސަރުކާރުން ރާއްޖެއަށް ކަދުރު ހަދިޔާ ކުރިކަމުގެ އެއްވެސް މައުލޫމާތެއް އިސްލާމިކް މިނިސްޓްރީއިން އާންމުކޮށްފައެއް ނުވެއެވެ. 

އެކަމާއި ގުޅޭގޮތުން އިސްލާމިކް މިނިސްޓްރީގެ މީޑިއާ ކޯޑިނޭޓާރާއި "ވޮއިސް" އިން ކުރި ސުވާލަށް ޖަވާބުދެއްވަމުން އެ ބޭފުޅާ ވިދާޅުވީ އަންނަ ރޯދަމަހަށް ރައްޔިތުންނަށް ކަދުރު ބެހުމާއި ގުޅޭގޮތުން އިސްލާމިކް މިނިސްޓްރީއިން މަޝްވަރާތައް ކުރަމުންދާ ކަމަށެވެ.

އެހެން ނަމަވެސް ކަދުރު ބަހާނެތޯ ނޫންތޯ އަދި ބަހާނެ އުސޫލުތަކާއި ބަހަން ފަށާނެ ދުވަހެއް މިހާތަނަށް ކަނޑައަޅާފައި ނުވާކަމަށް އޭނާ ވިދާޅުވި އެވެ. 

ކޮންމެ އަހަރެއްގައިވެސް ކަދުރު ބެހުމަށް ވަކި ޚާއްސަ އުސޫލުތަކެއް ކަނޑައަޅައެވެ.

މާލޭގައި ކަދުރު ބެހުމުގެ ކަންކަން ކުރިއަށް ގެންދަނީ އިސްލާމިކް މިނިސްޓްރީގެ ބެލުމުގެ ދަށުންނެވެ. އަދި އަތޮޅުތެރޭގައި އެކަން ކުރަމުންދަނީ ކައުންސިލްތައް މެދުވެރިކޮށެވެ.