ގޭންގް ރޭޕް ކޭހެއް ރިޕޯޓު ކުރަން ދިޔަ އިންޑިޔާގެ މުސްލިމް ނޫސްވެރިއެއް ކަމަށް ވާ ސިއްދީޤް ކައްޕަން ދެ އަހަރަށް ފަހު ޖަލުން މިނިވަން ވެއްޖެއެވެ.

ސިއްދީޤް ކައްޕަން ޖަލުގައި ހުންނަތާ 2 އަހަރު ބަޔާއި ވަނީ ގާތްވެފައެވެ. ސިއްދީޤް ހައްޔަރުކޮށްފައިވަނީ 2020 ވަނަ އަހަރުގެ އޮކްޓޯބަރ މަހުގެ ތެރޭގައި ގޭންގް ރޭޕް ކޭސް އެއްގެ ރިޕޯޓް ކުރުމަށް ދަތުރު ކުރަމުންދަނިކޮށް އުއްތަރްޕްރަދޭޝް އިންނެވެ. އެއަށް ފަހު  އޭނާ ޖަލަށް ލައިފައިވަނީ މަނީ ލޯޑަރިންގ ގެ މައްސަލައެއްގެ ތުހުމަތު އޭނާގެ ބޮލުގައި އަޅުވައިފައެވެ. ސިއްދީޤް ޖަލުގައި ބަންދުކޮށްފައި ބަހަށްޓައިފައިވަނީ އެއްވެސް ޙުކުމެއް ނުކޮށެވެ. އޭނާ ޖަލުން މިނިވަން ކޮށްފައިމިވަނީ އޭނާ ޖަލުން ދޫކޮށްލުމަށް އަމުރުކުރިތާ އެއްމަސް ދުވަސް ފާއިތުވި ފަހުންނެވެ.

ސިއްދީޤް ޖަލަށް ލައިފައިވަނީ އިންޑިޔާގެ ޕީނަލް ކޯޑުގެ ދަށުން މަނީ ލޯޑަރިންގ އާއި ގުޅުން ހުރި ގިނަ ތުހުމަތު ތަކަކާއި އެކުއެވެ. ނަމަވެސް 2022 ސެޕްޓެމްބަރ ގައި ސްޕްރީމް ކޯޓުން އޭނާއަށް ވަނީ ބެއިލް ލިބިފައެވެ.

"ދެ އަހަރު ބަޔަށްފަހު ޖަލުން ސަލާމަތްވުމުން އަހަރެން ވަރަށް އުފާވެއްޖެ، އަހަރެންގެ އުއްމީދަކީ އަހަރެންގެ މައުސޫމް ކަން ސާބިތުކުރުން" 43 އަހަރުގެ ސިއްދީޤް ބުނެފައިވެއެވެ.

.

ސިއްދީޤް އާއި އޭނާ ގެ ޑްރައިވަރު މުހައްމަދް އައްލާމް އާއި އަދި އިތުރު ތިން މީހަކު މުސްލިމް އޮގަނައިޒޭޝަނަކަށް ނިސްބަތްވާ ކަމަށް ބުނެ ހައްޔަރު ކޮށްފައިވެއެވެ.

ސިއްދީޤް މިހާތަނަށްވެސް ވަނީ މިމައްސަލައިގައި އޭނާގެ މައުސޫމް ކަން ސާބިތު ކޮށްދީފައެވެ. އޭނާ ބުނެފައިވަނީ އޭނާ ކެރެލާއިން ފުރައިގެން ފެށި ދަތުރަކީ ނޫސްވެރިއެއްގެ ހައިސިއްޔަތުން އޭނާގެ ޑިޔުޓީ އަދާ ކުރުމަށް ކުރި ދަތުރެއް ކަމަށެވެ.

"އަހަރެން ދިޔައީ ރިޕޯޓް ކުރުމަށް، އޭގަ އޮތް ގޯހަކީ ކޮބައި؟، އަހަރެން އަތުގައި އޮތީ ދެ ގަލަމާއި ނޯޓް ޕެޑެއް އެކަނި" ހިންދޫންގެ ޤަދަރުވެރި އާއިލާ އެއްގެ ހިމެނޭ ގޭންގަކުން ރޭޕް ކުރި ޒުވާން އަންހެންކުއްޖެއްގެ މައްސަލަ ރިޕޯޓް ކޮށް އެކަމުގެ ތަފްސީލް ގެނެސްދިނުމަށް މަސައްކަތް ކުރި ސިއްދީޤް ބުނެފައިވެއެވެ.