ޕީޕީއެމްގެ ރިޔާސީ ކެންޑިޑޭޓު ރައީސް ޔާމީން އަބްދުލްގައްޔޫމު އަނބުރާ ވެރިކަމަށް ގެނައުމަށް އިދިކޮޅު ކޯލިޝަނުން ކުރިއަށް ގެންދިޔަ ހޯޕް ކޮންފަރެންސްގެ ބައިވެރިން އަހުދުވެއްޖެ އެވެ. 

ގާތްގަނޑަކަށް 1100 މީހުން ހޯޕް ކޮންފަރެންސްގައި ބައިވެރިވެފައިވާއިރު ރައީސް ޔާމީން އަނބުރާ ވެރިކަމަށް ގެނައުމަށް އަހުދުވެފައިވަނީ ހޯޕް ކޮންފަރެންސް ނިންމާލުމަށް ރޭ އާޓިފިޝަލް ބީޗުގައި ބޭއްވި "ދުއްޕާން" ޖަލްސާގަ އެވެ. 

އެ އަހުދުގައި ބައިވެރިން ވަނީ ރައީސް ޔާމީނަށް ދެވަނަ ދައުރެއް ހޯދާދިނުމަށް އެ ބޭފުޅުންގެ ލެވެލްގައި ކުރެވެން ހުރި ހުރިހާކަމެއް ކޮށްދިނުމަށް އަހުދުވެފައެވެ. 

Advertisement

އިދިކޮޅުން ބޭއްވި ދުއްޕާން ޖަލްސާގެ ތެރެއިން

އެ އަހުދުގެ އިތުރުން ރޭގެ އެ ޖަލްސާގައި ހޯޕް ކޮންފަރެންސްގެ ބައިވެރިން ވަނީ މިދިޔަ ޑިސެމްބަރު މަހުގެ 25 ވަނަ ދުވަހު ކްރިމިނަލް ކޯޓުން ރައީސް ޔާމީންގެ މައްޗަށް ކޮށްފައިވަނީ ހަރާން ހުކުމެއްކަމަށް ގޮވާލާފަ އެވެ. އަދި އެމަނިކުފާނުގެ މައްޗަށް ސިޔާސީ ދައުވާތައް އުފުލުން ހުއްޓާލާ، މިހާރުން މިހާރަށް އެމަނިކުފާނު މިނިވަންކުރުމަށް ބައިވެރިން ވަނީ ގޮވާލައްވާފަ އެވެ. 

ރައީސް ޔާމީން އަނބުރާ ވެރިކަމަށް ގެނައުމަށް ހޯޕް ކޮންފަރެންސްގެ ބައިވެރިން ރޭ އަހުދުވެފައިވާއިރު، އެމީހުންގެ ކޮނޑުގައި އެއެޅުނީ ވަރަށް ބޮޑު ޒިންމާއެއްގެ ގޮތުގައި އިދިކޮޅުގެ ލީޑަޝިޕުން ފާހަގަކުރައްވަ އެވެ. އެކަމާއި ގުޅޭގޮތުން ޕީޕީއެމްގެ ނައިބުރައީސް އަހުމަދު ޝިޔާމު ވިދާޅުވީ، ހޯޕް ކޮންފަރެންސްގެ ބައިވެރިންނަކީ ރައްޔިތުންގެ މަންދޫބުން ކަމަށެވެ.

ލީޑަޝިޕްގެ ބޭފުޅުން މާލޭގައި ކުރައްވާ މަސައްކަތްޕުޅު ރަށްރަށުގައި ކުރައްވާނީ އެ ރަށްރަށުގެ މަންދޫބުން ކަމަށާއި، މި ކޮންފަރެންސްގެ ބޭނުން ހިފާ މިހާރުން ފެށިގެން ކުރިއަށް އޮތް ރިޔާސީ އިންތިޚާބު ރައީސް ޔާމީނަށް ކާމިޔާބުކޮށްދިނުމަށް މަސައްކަތް ފެށުމަކީ ވަރަށް މުހިންމު ކަމެއްކަމަށް ޝިޔާމު ވިދާޅުވި އެވެ.