ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓު ރައީސް ޔާމީން އަބްދުލްގައްޔޫމު މިނިވަންކުރުމަށް އިދިކޮޅުގެ ލީޑަރޝިޕުގެ އިޚްލާސްތެރިކަމެއް ނެތްކަމަށް ވިދާޅުވެ ހޯމް މިނިސްޓަރު އަދި އަދާލަތު ޕާޓީގެ ރައީސް އިމްރާނު ދެއްކެވި ވާހަކަތަކަށް އިދިކޮޅު އިއްތިހާދުގައި ހިމެނޭ ޕީއެންސީގެ ރައީސް އަބްދުއްރަހީމް (އަދުރޭ) ރައްދު ދެއްވައިފިއެވެ. 

ނިމިދިޔަ ހުކުރު ދުވަހު އިިދކޮޅު ކޯލިޝަނުން މާލޭގައި "ބުންވަރު" ގެ ނަމުގައި ސުލްހަވެރި ހިނގާލުމެއް ބާއްވާ ރައީސް ޔާމީން މިނިވަންކުރުމަށް ގޮވާލާ އަޑުއުފުލުމާއި ގުޅިގެން ހޯމް މިނިސްޓަރު އިމްރާނު ވަނީ ފާޑުވިދާޅުވެފައެވެ. އެގޮތުން އިމްރާނު ވިދާޅުވީ އިދިކޮޅުގެ ލީޑަޝިޕްގެ ފަރާތުން އިޚްލާސްތެރިކަން ނުފެންނަކަމަށެވެ. އަދި އެމީހުންގެ އަސްލު މަގްސަދަކީ ރައީސް ޔާމީން މިނިވަންކުރުން ނޫން ކަމަށެވެ. 

އިމްރާނުގެ އެ ވާހަކަތަކަށް ރޭ އިދިކޮޅުން އާޓިފިޝަލް ބީޗުގައި ބޭއްވި ޖަލްސާގައި ވާހަކަދައްކަވަމުން އަބްދުއްރަހީމް ވިދާޅުވީ އިމްރާނުގެ އެ ވާހަކަތަކަކީ ބުންވަރު ހިނގާލުން ހަޖަމުކުރަން ދަތިފުޅުވެގެން ދެއްކެވި ވާހަކަތަކެއްކަމަށެވެ. 

އެއާއެކު އަދުރޭ ވިދާޅުވީ ޕީޕީއެމްގެ އަސްލު އިމްރާނަށް ފެނިވަޑައިގަންނަވާއިރު އޮންނަވާނީ ޖަލުގައި ކަމަށެވެ. 

އަދުރޭ ވިދާޅުވީ ޕީޕީއެމްގެ ރިޔާސީ ޓިކެޓު ރައީސް ޔާމީންއަށް އެރުވުމުންވެސް އިމްރާނަށް އެކަންވެސް ހަޖަމު ނުކުރެވުނު ކަމަށެވެ. 

ޕާޓީގެ އެތެރޭގެ ނިންމުންތަކާއި ހަރަކާތްތަތަކީ އެހެން ޕާޓީއަކުން ބެހެން ޖެހޭ ކަންކަމެއް ނޫންކަމަށް އަބްދުއްރަހީމް ވިދާޅުވިއެވެ. އަދި ޕީޕީއެމްގެ ހަރަކާތްތައް ހަޖަމު ނުވިކަމުގައި ވީނަަމަވެސް، އެ ހަރަކާތްތައް ދާނީ ކުރިއަށް ކަމަށާއި، އެ ހަރަކާތްތައް ނިންމާނީ ރައީސް ޔާމީން އަނބުރާ ވެރިކަމަށް ގެނައުމަށްފަހުގައި ކަމަށް އަބްދުއްރަހީމް ވިދާޅުވި އެވެ.