ކުރިއަށް އޮތް ރިޔާސީ އިންތިޚާބުގައި ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ ރިޔާސީ ޓިކެޓު ލިބިވަޑައިގަންނަވާނީ ޕާޓީގެ ރައީސް ޔާމީން އަބްދުލްގައްޔޫމަށްކަމަށާއި އެކަމާއި އެއްވެސް ބޭފުޅަކު ދެކޮޅު ނަހައްދަވާކަމަށް އިދިކޮޅު އިއްތިހާދުގައި ހިމެނޭ ޕީއެންސީގެ ނައިބު ރައީސް އަދި މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދު ވިދާޅުވެއްޖެ އެވެ. 

ސައީދު މިފަދައިން ވިދާޅުވެފައިވަނީ ރައީސް ޔާމީން ޖަލުގައި ހުންނެވުމާއި ގުޅިގެން ޕާޓީގެ ރިޔާސީ ޓިކެޓު ހޯއްދެވުމަށް ޕާޓީގެ އެތެރެއިން ބަޔަކު މަސައްކަތް ކުރާކަމަށް ބައެއް ނޫސްތަކުގައި ލިޔަމުންދާ ޚަބަރުތައް ދޮގު ކުރައްވާ ވާހަކަފުޅު ދައްކަވަމުންނެވެ. 

އެގޮތުން އިދިކޮޅުން ރޭ އާޓިފިޝަލް ބީޗުގައި ބޭއްވި "ދުއްޕާން" ޖަލްސާގައި ވާހަކަދައްކަވަމުން ސައީދު ވިދާޅުވީ ލީޑަރޝިޕްގެ ހުރިހާ ބޭފުޅުން މިވަގުތު ތިއްބެވީ އިދިކޮޅު ކޯލިޝަން ވަގުތީގޮތުން ހިންގެވުމާއި ހަވާލުވެވަޑައިގެން ހުންނެވި ޕީއެންސީގެ ރައީސް އަބްދުއްރަހީމްގެ ފަހަތްޕުޅުގައި ކަމަށެވެ. އަދި މި ވަގުތު އިދިކޮޅުގެ ހަރަކާތްތައް ކުރިއަށް ގެންދާނީވެސް އަބްދުއްރަހީމްގެ އިރުޝާދާއި އެއްގޮތަށްކަމަށެވެ. 

ޕާޓީގެ ލީޑަޝިޕްގެ މެދުގައި އޮތް އެއްބައިވަންތަކަން ރޫޅާލާ ބައިބައިކުރުމަށް އެއްވެސް ޖާގައެއް ނެތްކަމަށާއި، ޕާޓީގެ ރިޔާސީ ޓިކެޓު ލިބިވަޑައިގަންނަވާނީ ޕާޓީގެ ޖޮއިންޓު ސެނެޓުގެ އިއްތިފާގުން ނިންމާފައިވާ ގޮތަށް ރައީސް ޔާމީނަށްކަމަށް ސައީދު ވިދާޅުވި އެވެ. 

ސައީދު ވިދާޅުވީ ރައްޔިތުންގެ އުންމީދު ގުޅިފައިވަނީ ރައީސް ޔާމީނަށް ކަމަށެވެ. އެމަނިކުފާނުގެ ތަސައްވަރަކީ ޒުވާނުންނާއި، ކުޑަކުދިންނާއި ދޮށީ އުމުރުގެ މީހުންގެ ކުރިމަގު ބިނާކޮށް، ރައްޔިތުންނަށް އުފާ ފާގަތި ދިިރިއުޅުމެއް ހޯދައިދޭނެ ތަސައްވަރެއް ކަމަށެވެ. 

މިހާރު ސަރުކާރުން އެކި ގޮތްގޮތުން ރައްޔިތުންނަށް ކުރަމުންދާ "ދުއްޕާން" ނިނުމަކަށް ގެނެސްދެއްވާނީވެސް ކުރިއަށް އޮތް ރިޔާސީ އިންތިޚާބު ކާމިޔާބުކުރައްވާ ރައީސް ޔާމީންކަމާމެދު ޝައްކު ނުކުރައްވާކަމަށް ސައީދު ވިދާޅުވި އެވެ.