ސަރުކާރުގެ ކުންފުނިތަކުގެ ހިއްސާ ވިއްކުމަށް މި ސަރުކާރުން މަސައްކަތް ކުރަމުންދާ ކަމަށާއި، އެއީ ރައްޔިތުންނަށް މާލީ ގޮތުން ބޮޑެތި ގެއްލުންތަކެއް ލިބިގެންދާނެ ކަމެއްކަމަށް މަޖިލީހުގެ ފުލިދޫ ދާއިރާގެ މެމްބަރު ފަޒުލް ރަޝީދު ވިދާޅުވެއްޖެ އެވެ.
ފަޒުލް މިފަދައިން ވިދާޅުވެފައިވަނީ ހޮނިހިރު ދުވަހުގެ ރޭ އިދިކޮޅުން މާލޭގެ އާޓިފިޝަލް ބީޗުގައި ބޭއްވި "ދުއްޕާން" ޖަލްސާގައި ވާހަކަދައްކަވަމުން ނެވެ.
ފަޒުލް ވިދާޅުވީ ރައްޔިތުންގެ ފެން ބިލުތައް ކުޑަ ނުކުރެވިގެން އުޅެނީ އެމްޑީޕީގެ ފުރަތަމަ ވެރިކަމުގައި ސަރުކާރުގެ ފެންކުނީގެ 20 އިންސައްތަ ހިއްސާ ބޭރު ކުންފުންޏަކަށް ވިއްކާލުމާއި ގުޅިގެން ކަމަށެވެ.
އެ ހިއްސާ ހޯދުމަށް ރައީސް ޔާމިންގެ ޒައާމަތުގައި މުހިންމު މަސައްކަތްތަކެއް ކުރެވުނު ނަމަވެސް އަލުން އަނބުރާ އެ ހިއްސާ ދިނުމަށް ބޭރުގެ ކުންފުނިން ދެކޮޅު ހަދާފައިވާކަމަށް އޭނާ ވިދާޅުވިއެވެ.
"3 އަހަރުވީއިރުގައި ހިޓާޗީ ކުންފުންޏަށް 16 މިލިއަން ޑޮލަރު އޮތީ ދެއްކިފަ، ޑިވިޑެންޓުގެ ގޮތުގައި ދައްކާ ޚަލާސް ކުރެވިފައި އޮތީ، އެހެން ނަމަވެސް އިތުރަށް 16 މިލިއަން ޑޮލަރު ހުށައެޅީ.. 16 މިލިއަން ޑޮލަރު ހުށައެޅީމާ ހިޓާޗީ ކުންފުނިން ބުނީ ކީކޭތޯ؟ "ނޫން ތިމަންނަމެން ތި އަގުގައެއް ނުވިއްކާނަމޭ، 16 މިލިއަން ޑިލަރަކަށް ތިމަންނަމެން އެމްޑަބްލިއުއެސްސީގެ ހިއްސާއެއް ނުވިއްކާމޭ" ދެން އަޅުގަނޑުމެން ރައީސްއާ މަޝްވަރާކުރުމަށް ފަހު އަޅުގަނޑުމެން ހުށައެޅީ 20 މިލިއަން ޑޮލަރު.. 20 މިލިއަން ޑޮލަރު ދީފަ އަޅުގަނޑުމެން ހިއްސާ ގަންނަން ތައްޔާރޭ. ވިދާޅުވީ ނޫނެކޭ ތި އަގުގައިވެސް އަޅުގަނޑުމެން ނުވިއްކާނަމޭ އެމްޑަބްލިއުއެސްސީގެ 20 ޕަސެންޓު ހިއްސާއެއް. އެމްޑީޕީއިން އެމްޑަބްލިއުއެސްސީގެ ހިއްސާ ވިއްކާލާފަ އޮތީމަ މިއަދާއި ހަމަޔަށް ރައްޔިތުންނަށް ފެނުގެ އަގުހެޔޮ ނުކޮށް ރައީސް ޔާމީނަށް ދައުރު ނިންމާލަން ޖެހުނީ"
ފުލިދޫ ދާއިރާގެ މެމްބަރު ފަޒުލް
އެކަން ފާހަގަކުރައްވާ ފަޒުލް ވިދާޅުވީ މިހާރުވެސް ސަރުކާރުން ކުންފުނިތަކުގެ ހިއްސާ ނުއަގުގައި ބޭރު ފަރާތްތަކަށް ވިއްކާލުމަށް މަސައްކަތް ކުރަމުންދާކަމަށެވެ. އަދި އެއީ ރައްޔިތުންނަށް ބޮޑު ގެއްލުމެއް ލިބޭނެ ކަމެއްކަމަށް އޭނާ ވިދާޅުވިއެވެ.
"ޕީޕީޕީ ގެ އުސޫލުން މިބޭފުޅުން މިހާރު ވެލުއޭޝަންތަކެއް އެބަ ހައްދާ.. ދިވެހި ދައުލަތުގެ ކުންފުނިތައް ބޭރު ކުންފުނިތަކަށް ވިއްކާލުމުގެ މަސައްކަތްތަކެއް މިބޭފުޅުން އެބަ ކުރޭ! މީގެ ނަތީޖާއަކަށް ވާނީ ދިވެހިން އަޅުގަނޑުމެންގެ ޒުވާނުންނަށް ވަޒީފާގެ ފުރުސަތުތައް ނުލިބުން. އަޅުގަނޑުމެންގެ ދިވެހިންނަށް އެތެރެވާ ބޭރު ފައިސާ ބޭރަށް ދިއުން"
ފުލިދޫ ދާއިރާގެ މެމްބަރު ފަޒުލް
އެއާއެކު ފަޒުލް ވަނީ ސަރުކާރު ކުންފުނިތަކުގެ ހިއްސާ ބޭރު ފަރާތްތަކަށް ވިއްކާލުމާއި ރައްޔިތުން ދެކޮޅު ހެދުމަށް ގޮވާލައްވާފަ އެވެ.
ކުންފުނިތަކުގެ ހިއްސާ ވިއްކާލައިފިނަމަ އެ އަނބުރާ ހޯދުމަކީ ދަތިކަމަކަށް ވާނެ ކަމަށާއި، އެފަދައިން އެކަންކަން ކުރާނަމަ މާލީ ގޮތުން ބޮޑެތި ގެއްލުންތަކާއި ރައްޔިތުން ކުރިމަތިލާން ޖެހޭނެކަމަށް ފަޒުލް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
