ރ. ރަސްމާދޫ ސުކޫލުގެ ޕްރިންސިޕަލް ޒިޔާދު ރަޝާދު ޗުއްޓީއަށް ދިޔަ ގޮތަށް ސުކޫލަށް ހާޒިރު ނުވެ، ޕްރިންސިޕަލް އެއް ނެތި ސްކޫލު ހިންގަމުންދާތީ އެ ބެލެނިވެރިން ކަންބޮޑުވުން ފާޅުކޮށްފި އެވެ.
ރަސްމާދޫ ކައުންސިލްގެ ރައީސް މުހައްމަދު އާސިފް "ވޮއިސް" އަށް މައުލޫމާތު ދެއްވަމުން ވިދާޅުވީ، އެ ސުކޫލުގެ ޕްރިންސިޕަލަކީ ޅ. ހިންނަވަރަށް އުފަން މީހެއް ކަމަށެވެ. އަދި އޭނާ ޗުއްޓީ ނެގިފަހުން ދެމަސް ދުވަހަށްވުރެ ގިނަ ދުވަސްވެފައިވާ ކަމަށާއި، ދެން އޭނާ އެ ވަޒީފާ އަށް އެރަށަށް ނުދާނެ ކަމަށް އެޑިޔުކޭޝަން އަންގައި އެކަމާއި ގުޅިގެން ނިންމަންޖެހޭ ހުރިހާ ނިންމުމެއް ނިންމާފައިވާ ކަމަށްވެސް މައުލޫމާތު ލިބިފައިވާ އާސިފް ވިދާޅުވިއެވެ.
އެހެން ނަމަވެސް، މިކަން ރަސްމީކޮށް އެ ސުކޫލަށް އޭނާ އަންގާފައި ނުވާއިރު، ޕްރިންސިޕަލް ނެތުމުގެ ސަބަބުން އެ ސުކޫލް ހިންގުމުގެ ކަންކަން މިހާރު ކުރަންޖެހިފައިވަނީ ލީޑިން ޓީޗަރަކަަށް ކަމަށްވެސް އާސިފް ވިދާޅުވިއެވެ.
"ޕްރިންސިޕަލުގެ ލީވިންގެ ކަންކަމާއި ގުޅިގެން ނިންމަންޖެހޭ ކަންކަން މިހާރު ކުރިއަށްދާ ކަމަށް މައުލޫމާތު ލިބެނީ. އެ މަސައްކަތް ނިމުނީމަ ކުރިއަށް އޮތް ގާތްގަނޑަކަށް ދެ ހަފްތާ ތެރޭގައި އައު ޕްރިންސިޕަލެއް ހަމަޖެހޭނެ ކަމަށް އެޑިޔުކޭޝަން މިނިސްޓްރީން އަންގަވާފަ އޮތީ،" އާސިފް ވިދާޅުވި އެވެ.
ރަސްމާދޫ ޕްރިންސިޕަލްގެ މަގާމުގައި ހުންނެވި ޒިޔާދު ރަޝާދު ޗުއްޓީ އަށް ދިޔަ ގޮތަށް ސުކޫލަށް "ފިލާފައި" ވާއިރު، އޭނާ އެމްއެންޕީގެ ކެންޕެއިން ހަރަކާތްތަކުގެ ތެރެއިން އެޕާޓީގެ ރައީސް މުހައްމަދު ނާޒިމްގެ އަރިހުން ފެންނަ ކަމަށް އެރަށު ފަރާތެއް "ވޮއިސް" އަށް ވަނީ މައުލޫމާތު ދެއްވާފައެވެ.
Advertisement
This content is created and paid for by advertisers and does not involve Voice Journalists
